ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠪᠠᠭ᠋ᠠᠷᠬᠠᠯᠳᠥ ᠰᠢᠭᠤᠶᠢᠳᠥ
ᠦᠢᠯᠡᠴᠢᠯᠡᠭᠡ
ᠰᠦᠯᠳᠡ ᠶᠢᠨ ᠲᠠᠬᠢᠯᠭ᠎ᠠ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2025/2/8
        ᠲᠤᠭ ᠰᠦᠯᠳᠡ ᠶᠢᠨ ᠲᠠᠬᠢᠯᠭ᠎ᠠ ᠳᠤ ᠴᠢᠩᠭᠢᠰ ᠤᠨ ᠬᠠᠷ᠎ᠠ ᠰᠦᠯᠳᠡ ᠶᠢᠨ ᠲᠠᠬᠢᠯᠭ᠎ᠠ᠂ ᠬᠠᠰᠠᠷ ᠤᠨ ᠠᠯᠠᠭ  ᠰᠦᠯᠳᠡ ᠶᠢᠨ ᠲᠠᠬᠢᠯᠭ᠎ᠠ᠂ ᠶᠢᠰᠦᠨ ᠬᠥᠯᠲᠦ ᠴᠠᠭᠠᠨ ᠰᠦᠯᠳᠡ ᠶᠢᠨ ᠲᠠᠬᠢᠯᠭ᠎ᠠ ᠪᠠᠭᠲᠠᠨ᠎ᠠ᠃             ᠬᠠᠷᠠᠭ᠎ᠠ ᠶᠡᠬᠡᠲᠦ ᠬᠠᠷ᠎ᠠ ᠰᠦᠯᠳᠡ ᠶᠢᠨ ᠲᠠᠬᠢᠯᠭ᠎ᠠ              ᠬᠠᠷᠠᠭ᠎ᠠ ᠶᠡᠬᠡᠲᠦ ᠬᠡᠲᠡᠭ ᠨᠢ ᠬᠤᠯᠠ ᠠᠴᠠ ᠬᠠᠷᠠᠭᠳᠠᠬᠤ ᠭᠡᠰᠡᠨ ᠤᠳᠬ᠎ᠠ ᠲᠠᠢ ᠶᠤᠮ᠃ ᠬᠠᠷ᠎ᠠ ᠰᠦᠯᠳᠡ ᠶᠢᠨ  ᠪᠦᠲᠦᠴᠡ ᠶᠢᠨ ᠣᠷᠣᠢ ᠶᠢᠨ ᠬᠢᠯᠪᠡᠷ ᠨᠢ ᠬᠤᠶᠠᠷ ᠬᠤᠷᠤᠭᠤ ᠬᠢᠷᠢ ᠥᠷᠭᠡᠨ᠂ ᠨᠢᠭᠡ ᠲᠣᠬᠤᠢ ᠮᠣᠬᠤᠭᠤ ᠢᠷ ᠲᠠᠢ  ᠵᠢᠲᠡ ᠶᠢᠨ ᠬᠡᠯᠪᠡᠷᠢ ᠲᠠᠢ ᠳᠣᠣᠷ᠎ᠠ ᠪᠠᠨ ᠣᠩᠭᠢ ᠲᠠᠢ ᠲᠡᠮᠦᠷ ᠡᠳ᠋ ᠶᠤᠮ᠃ ᠣᠩᠭᠢᠨ ᠤ ᠤᠷᠲᠦ  ᠨᠢ ᠲᠦᠷᠪᠠᠨ  ᠢᠮᠠᠬᠤ ᠢᠯᠡᠭᠦᠦ ᠪᠠᠶᠢᠵᠤ᠂ ᠣᠩᠭᠢᠨ ᠤ ᠳᠣᠣᠷ᠎ᠠ ᠲᠠᠯ᠎ᠠ ᠶᠢᠨ ᠤᠭᠯᠠᠭᠤᠷᠭ᠎ᠠ ᠶᠢᠨ ᠨᠦᠭᠡᠨ ᠤ ᠳ᠋ᠢᠶᠠᠮᠧᠲᠷ ᠨᠢ ᠨᠢᠭᠡ  ᠢᠮᠠᠬᠤ ᠢᠯᠡᠭᠦᠦ ᠪᠠᠶᠢᠳᠠᠭ᠃ ᠣᠩᠭᠢᠨ ᠤ ᠳᠡᠭᠡᠷ᠎ᠡ ᠲᠠᠯ᠎ᠠ ᠳᠤ ᠮᠥᠩᠭᠦᠨ ᠲᠥᠭᠦᠷᠢᠭ ᠴᠠᠷ᠎ᠠ ᠶᠢ ᠨᠦᠬᠡᠯᠡᠨ  ᠲᠣᠭᠲᠠᠭᠠᠵᠠᠢ᠃ ᠴᠠᠷ᠎ᠠ ᠶᠢᠨ ᠳ᠋ᠢᠶᠠᠮᠧᠲᠷ ᠨᠢ ᠨᠢᠭᠡ ᠲᠣᠬᠤᠢ᠂ ᠴᠠᠷ᠎ᠠ ᠶᠢᠨ ᠬᠦᠪᠡᠭᠡ ᠪᠠᠷ ᠨᠢ ᠨᠠᠶᠠᠨ ᠨᠢᠭᠡᠨ ᠪᠢᠴᠢᠬᠠᠨ  ᠨᠦᠬᠡ ᠭᠠᠷᠭᠠᠵᠠᠢ᠃ ᠡᠭᠦᠨ ᠠᠴᠠ ᠪᠠᠨ ᠭᠤᠷᠪᠠᠨ ᠲᠥᠭᠡ ᠲᠦᠷᠪᠠᠨ ᠬᠤᠷᠤᠭᠤ ᠤᠷᠲᠦ ᠬᠡᠭᠡᠷ ᠠᠵᠢᠷᠭᠠᠨ ᠤ ᠲᠡᠯ ᠢ  ᠤᠩᠭᠤᠨ ᠢᠮᠠᠭᠠᠨ ᠲᠠᠰᠠᠮ᠎ᠠ ᠪᠠᠷ ᠰᠦᠯᠵᠢᠨ ᠤᠨᠵᠠᠶᠢᠯᠭᠠᠵᠠᠢ᠃ ᠡᠭᠦᠨ ᠢ ᠬᠦᠬᠦᠯ ᠬᠡᠲᠡᠭ᠃             ᠬᠠᠷ᠎ᠠ ᠰᠦᠯᠳᠡ ᠶᠢᠨ ᠲᠠᠬᠢᠯᠭ᠎ᠠ ᠶᠢ ᠪᠢᠯᠢᠭ ᠤᠨ ᠤᠯᠠᠷᠢᠯ ᠤᠨ ᠳᠣᠯᠣᠳᠤᠭᠠᠷ ᠰᠠᠷ᠎ᠠ ᠶᠢᠨ ᠠᠷᠪᠠᠨ ᠲᠦᠷᠪᠠᠨ᠋ ᠤ ᠡᠳᠦᠷ ᠶᠠᠪᠤᠭᠳᠠᠭᠤᠯᠳᠠᠭ ᠶᠤᠮ᠃ ᠲᠠᠬᠢᠯᠭ᠎ᠠ ᠡᠬᠢᠯᠡᠮᠡᠭᠴᠡ ︽ᠢᠮᠠᠭ᠎ᠠ ᠰᠢᠭᠦᠬᠦ︾ ᠶᠣᠰᠣᠯᠠᠯ ᠶᠠᠪᠤᠭᠤᠯᠳᠠᠭ᠃ ᠨᠢᠭᠡ  ᠤᠩᠭᠤᠨ ᠬᠠᠷ᠎ᠠ ᠢᠮᠠᠭ᠎ᠠ ᠶᠢ ᠬᠠᠷ᠎ᠠ ᠢᠰᠡᠭᠡᠢ ᠳᠡᠭᠡᠷ᠎ᠡ ᠤᠨᠠᠭᠠᠵᠤ᠂ ᠵᠠᠷᠤᠴᠠ ᠬᠥᠯ ᠢ ᠨᠢ ᠴᠢᠩᠭᠠᠭᠠᠵᠤ᠂ ᠮᠡᠳᠡᠭᠡᠴᠢᠨ  ᠠᠮᠠ ᠶᠢ ᠨᠢ ᠠᠳᠬᠤᠵᠤ᠂ ᠰᠠᠶᠢᠨ ᠡᠷ᠎ᠡ ᠥᠷᠥᠴᠡᠯᠡᠵᠦ ᠭᠤᠣᠯ ᠢ ᠨᠢ ᠲᠠᠰᠤᠯᠤᠮᠠᠭᠴᠠ ᠪᠠᠰᠠ ᠨᠢᠭᠡ ᠵᠠᠷᠤᠴᠠ ᠠᠷᠠᠰᠤ ᠶᠢ ᠨᠢ ᠥᠪᠴᠢᠵᠦ᠂ ᠲᠦᠷᠪᠠᠨ ᠰᠢᠭᠢᠷ᠎ᠡ ᠲᠠᠢ ᠠᠷᠠᠰᠤ ᠶᠢ ᠨᠢ ᠰᠠᠩ ᠤᠨ ᠦᠷᠦᠭᠡ ᠳᠡᠭᠡᠨ ᠡᠯᠭᠦᠨ᠎ᠡ᠃ ᠮᠢᠬ᠎ᠠ ᠪᠠᠷ ᠨᠢ  ᠥᠳᠬᠡ ᠪᠡᠯᠡᠳᠬᠡᠵᠦ ᠵᠤᠯᠠ ᠡᠷᠭᠦᠭᠡᠳ ᠰᠠᠩ ᠲᠠᠯᠪᠢᠵᠤ ᠤᠩᠰᠢᠯᠭ᠎ᠠ ᠬᠢᠵᠦ ᠬᠡᠷᠬᠡᠮᠲᠡᠨ ᠲᠡᠷᠢᠭᠦᠯᠡᠨ ᠡᠨᠡ ᠠᠷᠡᠰᠦᠨ᠋ ᠳᠠᠭᠠᠨ ᠮᠥᠷᠭᠦᠵᠦ ᠲᠠᠬᠢᠯᠭ᠎ᠠ ᠬᠢᠳᠡᠭ᠃ ᠡᠨᠡ ᠶᠣᠰᠣᠯᠠᠯ ᠪᠣᠯ ᠦᠨᠡᠨ ᠳᠡᠭᠡᠨ ᠢᠵᠠᠭᠤᠷ ᠤᠨ ᠬᠠᠷ᠎ᠠ ᠲᠤᠭ ᠢᠶᠠᠨ  ᠲᠠᠬᠢᠵᠦ ᠪᠠᠶᠢᠭ᠎ᠠ ᠤᠴᠢᠷ ᠪᠣᠯᠣᠨ᠎ᠠ᠃ ᠢᠩᠭᠢᠵᠦ ᠪᠠᠷᠠᠭᠠᠳ ᠲᠠᠬᠢᠯᠭᠠᠴᠢᠨ ᠠᠴᠠ ᠰᠠᠷᠬᠤᠳ ᠲᠤ ᠳᠡᠪᠲᠦᠭᠡᠭᠰᠡᠨ  ᠬᠠᠳᠠᠭ ᠢᠶᠠᠷ ᠰᠦᠯᠳᠡ ᠶᠢᠨ ᠬᠢᠯᠪᠡᠷ᠂ ᠴᠠᠷ᠎ᠠ ᠵᠡᠷᠭᠡ ᠶᠢ ᠠᠷᠢᠭᠤᠳᠬᠠᠨ ᠴᠡᠪᠡᠷᠯᠡᠵᠦ᠂ ᠬᠦᠬᠦᠯ ᠢ ᠨᠢ ᠰᠢᠨᠡᠳᠬᠡᠨ ᠤᠭ  ᠣᠷᠣᠨ ᠳᠤᠨᠢ ᠪᠠᠬᠢᠯᠡᠵᠦ ᠲᠠᠯᠪᠢᠨ᠎ᠠ᠃             ᠬᠠᠷ᠎ᠠ ᠰᠦᠯᠳᠡ ᠶᠢ ᠲᠣᠭᠰᠢᠭᠤᠯᠬᠤ ᠲᠠᠬᠢᠯᠭ᠎ᠠ ᠶᠢ ᠯᠤᠤ ᠵᠢᠯ ᠲᠣᠬᠢᠶᠠᠯᠳᠤᠬᠤ ᠪᠦᠷᠢ ᠶᠠᠪᠤᠭᠳᠠᠭᠤᠯᠤᠨ᠎ᠠ᠃  ᠲᠠᠬᠢᠯᠭ᠎ᠠ ᠶᠢᠨ ᠶᠣᠰᠣ ᠭᠤᠷᠢᠮ ᠨᠢ ᠪᠠᠷᠤᠭ ᠠᠳᠠᠯᠢᠬᠠᠨ᠂ ᠭᠠᠭᠴᠠ ᠬᠦ ᠠᠳᠠᠯᠢ ᠦᠭᠡᠢ ᠨᠢ ᠲᠦᠷᠪᠠᠨ ᠬᠥᠮᠥᠨ ᠬᠥᠯ ᠢᠶᠠᠨ ᠲᠡᠭᠡᠭᠯᠡᠵᠦ ᠪᠦᠷᠭᠦᠳ ᠰᠢᠪᠠᠭᠤ ᠰᠢᠭ᠋ ᠳᠠᠯᠢᠵᠤ ᠰᠦᠯᠳᠡ ᠪᠠᠨ ᠪᠠᠷᠢᠨ ᠲᠠᠬᠢᠯᠭ᠎ᠠ ᠶᠢᠨ ᠰᠢᠷᠡᠭᠡᠨ ᠳᠡᠭᠡᠷ᠎ᠡ  ᠲᠣᠭᠰᠢᠭᠤᠯᠤᠨ᠎ᠠ᠃ ᠬᠠᠷ᠎ᠠ ᠰᠦᠯᠳᠡ ᠪᠣᠯ ᠮᠣᠩᠭᠤᠯᠴᠤᠳ ᠤᠨ ᠴᠡᠷᠢᠭ ᠡᠷ᠎ᠡ ᠶᠢᠨ ᠲᠤᠭ ᠪᠠᠶᠢᠵᠤ᠂ ᠴᠡᠷᠢᠭ ᠡᠷᠡᠴᠦᠳ  ᠲᠠᠬᠢᠳᠠᠭ ᠪᠣᠯᠬᠤᠷ ᠡᠮᠡᠭᠲᠡᠶᠢᠴᠦᠳ ᠢ ᠬᠠᠷ᠎ᠠ ᠰᠦᠯᠳᠡ ᠲᠣᠭᠰᠢᠭᠤᠯᠬᠤ ᠲᠠᠬᠢᠯᠭ᠎ᠠ ᠳᠤ ᠣᠷᠣᠯᠴᠠᠭᠤᠯᠳᠠᠭ ᠦᠭᠡᠢ᠃  ᠤᠴᠢᠷ ᠨᠢ ᠰᠦᠯᠳᠡ ᠲᠣᠭᠰᠢᠭᠤᠯᠬᠤ ᠳᠤ ᠴᠢᠰᠤ ᠨᠥᠵᠢ ᠰᠠᠴᠤᠵᠤ ᠠᠯᠠᠵᠤ ᠨᠢᠲᠤᠯᠬᠤ ᠦᠢᠯᠠ ᠲᠠᠢ ᠲᠤᠯᠠ  ᠡᠮᠡᠭᠲᠡᠢ ᠬᠥᠮᠥᠨ ᠪᠦᠬᠦᠨ ︽ᠡᠬᠡ ᠪᠣᠯᠣᠭᠰᠠᠳ︾ ᠪᠣᠯᠬᠤᠷ ᠥᠷᠥ ᠵᠥᠭᠡᠯᠡᠨ ᠰᠡᠳᠬᠢᠯ ᠲᠠᠢ ᠪᠠᠶᠢᠵᠤ᠂ ᠤᠶᠠᠷᠠᠵᠤ  ᠭᠤᠳᠤᠷᠠᠳᠠᠭ᠃ ᠦᠬᠦᠭᠰᠡᠨ ᠬᠥᠮᠥᠨ ᠭᠠᠷᠭᠠᠭᠰᠠᠨ᠂ ᠡᠪᠡᠳᠴᠢᠨ ᠲᠣᠮᠣᠭᠤ ᠳᠤ ᠨᠡᠷᠪᠡᠭᠳᠡᠭᠰᠡᠨ᠂ ᠬᠡᠷᠡᠭ ᠡᠷᠭᠢᠭᠦᠦ ᠳᠤ  ᠥᠷᠲᠥᠭᠰᠡᠨ ᠬᠥᠮᠥᠨ ᠢ ᠲᠠᠬᠢᠯᠭ᠎ᠠ ᠳᠤ ᠣᠷᠣᠯᠴᠠᠭᠤᠯᠳᠠᠭ ᠦᠭᠡᠢ ᠪᠢᠯᠡ᠃         ᠬᠠᠰᠠᠷ ᠤᠨ ᠠᠯᠠᠭ ᠰᠦᠯᠳᠡ ᠶᠢᠨ ᠲᠠᠬᠢᠯᠭ᠎ᠠ              ᠬᠠᠰᠠᠷ ᠤᠨ ᠠᠯᠠᠭ ᠰᠦᠯᠳᠡ ᠪᠣᠯ ᠮᠣᠩᠭᠤᠯ ᠤᠨ ᠭᠤᠷᠪᠠᠨ ᠲᠤᠭ ᠰᠦᠯᠳᠡ ᠶᠢᠨ ᠨᠢᠭᠡ ᠨᠢ ᠶᠤᠮ᠂ ᠰᠦᠯᠳᠡ ᠶᠢᠨ ᠬᠡᠯᠪᠡᠷᠢ ᠨᠢ ᠶᠡᠭᠡ ᠲᠥᠯᠥᠪ ᠳᠡᠭᠡᠨ ᠬᠠᠷ᠎ᠠ ᠰᠦᠯᠳᠡ ᠲᠠᠢ ᠠᠳᠠᠯᠢ ᠪᠤᠯᠪᠠᠴᠦ ᠰᠦᠯᠳᠡ ᠶᠢᠨ ᠬᠦᠬᠦᠯ ᠢ ᠮᠤᠷᠢᠨ᠋ ᠤ ᠬᠠᠷ᠎ᠠ ᠴᠠᠭᠠᠨ ᠲᠡᠯ ᠢᠶᠠᠷ ᠬᠢᠭᠰᠡᠨ ᠤᠴᠢᠷ ᠠᠴᠠ ᠠᠯᠠᠭ ᠰᠦᠯᠳᠡ ᠭᠡᠵᠡᠢ᠃ ᠠᠯᠠᠭ ᠰᠦᠯᠳᠡ ᠶᠢ ᠶᠡᠷᠦ ᠳᠡᠭᠡᠨ  ᠬᠠᠰᠠᠷ ᠤᠨ ᠠᠯᠠᠭ ᠰᠦᠯᠳᠡ ᠬᠡᠲᠡᠭ᠃ ᠬᠠᠰᠠᠷ ᠤᠨ ᠠᠯᠠᠭ ᠰᠦᠯᠳᠡ ᠪᠣᠯ ᠬᠠᠰᠠᠷ ᠤᠨ ᠡᠷᠬᠡ ᠰᠦᠷ᠂ ᠬᠦᠴᠦᠨ  ᠴᠢᠳᠠᠯ ᠲᠡᠷᠢᠭᠦᠲᠡᠨ ᠢ ᠲᠥᠯᠥᠭᠡᠯᠡᠬᠦ ᠰᠦᠯᠳᠡ ᠰᠢᠲᠦᠭᠡᠨ ᠪᠣᠯᠣᠨ᠎ᠠ᠃ ᠴᠢᠩᠭᠢᠰ ᠬᠠᠭᠠᠨ ᠬᠠᠷᠠᠭ᠎ᠠ ᠶᠡᠬᠡᠲᠦ ᠬᠠᠷ᠎ᠠ  ᠰᠦᠯᠳᠡ ᠪᠠᠨ ᠡᠷᠭᠦᠨ ᠮᠣᠷᠳᠠᠬᠤ ᠳᠤ ᠠᠷᠤ ᠠᠴᠠ ᠨᠢ ᠬᠠᠰᠠᠷ ᠠᠯᠠᠭ ᠰᠦᠯᠳᠡ ᠪᠠᠨ ᠮᠠᠨᠳᠤᠭᠤᠯᠤᠨ ᠴᠡᠷᠢᠭ ᠢᠶᠠᠨ  ᠲᠠᠶᠢᠴᠢᠯᠠᠨ ᠤᠷᠤᠭᠰᠢᠯᠠᠳᠠᠭ ᠭᠡᠵᠦ ᠬᠡᠯᠡᠳᠡᠭ ᠶᠤᠮ᠃ ᠠᠯᠠᠭ ᠰᠦᠯᠳᠡ ᠶᠢᠨ ᠬᠢᠯᠪᠡᠷ ᠤᠨ ᠬᠠᠪᠲᠠᠭᠠᠢ ᠲᠠᠯ᠎ᠠ ᠳᠤ  ᠲᠤᠯᠤᠭᠠᠨ ᠪᠤᠷᠬᠠᠨ ᠤᠳᠤ ᠶᠢᠨ ᠳᠦᠷᠰᠦ ᠶᠢ ᠮᠥᠩᠭᠦ ᠪᠠᠷ ᠰᠢᠭᠢᠳᠬᠡᠨ ᠤᠷᠠᠯᠠᠵᠠᠢ᠃ ᠲᠤᠯᠤᠭᠠᠨ ᠪᠤᠷᠬᠠᠨ ᠤᠳᠤ ᠪᠣᠯ  ᠭᠤᠴᠢᠨ ᠭᠤᠷᠪᠠᠨ ᠲᠡᠭᠷᠢ ᠶᠢᠨ ᠨᠢᠭᠡ ᠨᠢ ᠪᠣᠯᠣᠨ᠎ᠠ᠃ ︽ᠠᠲᠠᠭ᠎ᠠ ᠲᠡᠭᠷᠢ︾᠎ ᠶᠢ ᠰᠢᠲᠦᠭᠴᠢᠳ ᠴᠥᠮ ᠲᠤᠯᠤᠭᠠᠨ  ᠪᠤᠷᠬᠠᠨ ᠤᠳᠤᠨ ᠢ ᠰᠢᠲᠦᠳᠡᠭ᠃             ᠠᠯᠠᠭ ᠰᠦᠯᠳᠡ ᠶᠢ ᠪᠠᠷᠰ ᠵᠢᠯ ᠲᠣᠭᠰᠢᠭᠤᠯᠳᠠᠭ ᠪᠥᠭᠡᠳ ᠲᠣᠭᠰᠢᠭᠤᠯᠬᠤ ᠳᠠᠭᠠᠨ ᠠᠯᠠᠭ ᠰᠦᠯᠳᠡ ᠶᠢᠨ  ᠡᠰᠢᠨ ᠳᠤ ᠮᠢᠩᠭᠠᠨ ᠪᠢᠯᠢᠭᠦᠨ ᠤᠷᠠᠯᠠᠭᠰᠠᠨ ᠳᠤᠭᠲᠤᠢ ᠬᠢᠳᠡᠭ᠃ ᠪᠢᠯᠢᠭᠦᠨ ᠬᠡᠲᠡᠭ ᠨᠢ ᠨᠢᠳᠦ ᠶᠢᠨ ᠬᠦᠨᠳᠦᠳᠬᠡᠯ  ᠶᠤᠮ᠃ ᠠᠯᠠᠭ ᠰᠦᠯᠳᠡ ᠶᠢ ᠪᠠᠷᠰ ᠵᠢᠯ ᠤᠨ ᠡᠪᠦᠯ ᠤᠨ ᠳᠤᠮᠳᠠ ᠰᠠᠷ᠎ᠠ ᠶᠢᠨ ᠭᠤᠷᠪᠠᠨ ᠳᠤ ᠲᠣᠭᠰᠢᠭᠤᠯᠵᠤ  ᠲᠠᠬᠢᠳᠠᠭ᠃ ᠮᠣᠩᠭᠤᠯᠴᠤᠳ ᠠᠴᠠ ᠪᠤᠰᠤᠳ ᠦᠨᠳᠦᠰᠦᠲᠡᠨ ᠲᠤᠰ ᠲᠠᠬᠢᠯᠭ᠎ᠠ ᠶᠢᠨ ᠦᠢᠯᠠ ᠳᠤ ᠣᠷᠣᠯᠴᠠᠳᠠᠭ ᠦᠭᠡᠢ᠃  ᠰᠦᠯᠳᠡ ᠲᠣᠭᠰᠢᠭᠤᠯᠵᠤ ᠪᠠᠷᠠᠮᠠᠭᠴᠠ ᠤᠯᠠᠨ ᠢᠶᠠᠷ ᠢᠶᠠᠨ ᠬᠤᠮᠣᠷᠭᠠᠨ ᠠᠪᠠ ᠬᠢᠵᠦ᠂ ᠵᠡᠭᠡᠷ᠎ᠡ ᠪᠤᠶᠤ ᠲᠠᠤᠯᠠᠢ ᠠᠯᠠᠵᠤ  ᠰᠦᠯᠳᠡ ᠳᠡᠭᠡᠨ ᠪᠣᠷᠣ ᠭᠥᠷᠥᠭᠡᠰᠦᠨ ᠤ ᠥᠳᠬᠡ ᠶᠢᠨ ᠲᠠᠬᠢᠯᠭ᠎ᠠ ᠬᠢᠳᠡᠭ᠃             ᠶᠢᠰᠦᠨ ᠬᠥᠯᠲᠦ ᠴᠠᠭᠠᠨ ᠰᠦᠯᠳᠡ ᠶᠢᠨ ᠲᠠᠬᠢᠯᠭ᠎ᠠ              ᠶᠢᠰᠦᠨ ᠬᠥᠯᠲᠦ ᠴᠠᠭᠠᠨ ᠰᠦᠯᠳᠡ ᠪᠣᠯ ᠮᠣᠩᠭᠤᠯᠴᠤᠳ ᠤᠨ ᠢᠯᠭᠤᠬᠰᠡᠨ ᠭᠤᠷᠪᠠᠨ ᠶᠡᠭᠡ ᠲᠤᠭ ᠰᠦᠯᠳᠡ ᠶᠢᠨ ᠨᠢᠭᠡ ᠶᠤᠮ᠃ ᠰᠡᠷᠡᠯ ᠠᠵᠢᠷᠭᠠᠨ ᠤ ᠲᠡᠯ ᠬᠢᠯᠭᠠᠰᠤ ᠪᠠ ᠬᠦᠬᠦᠯ ᠬᠢᠳᠡᠭ ᠠᠴᠠ ᠴᠠᠭᠠᠨ ᠰᠦᠯᠳᠡ ᠭᠡᠵᠡᠢ᠃             ᠴᠠᠭᠠᠨ ᠰᠦᠯᠳᠡ ᠨᠢ ᠭᠤᠣᠯ ᠳᠠᠭᠠᠨ ᠨᠢᠭᠡ ᠲᠣᠮᠣ ᠰᠦᠯᠳᠡ᠂ ᠲᠡᠭᠦᠨ ᠢᠶᠠᠨ ᠲᠣᠭᠤᠷᠢᠭᠤᠯᠤᠨ ᠨᠠᠢᠮᠠᠨ  ᠳᠠᠭᠠᠯᠲᠠ ᠰᠦᠯᠳᠡ ᠲᠠᠢ ᠲᠤᠯᠠ ᠶᠢᠰᠦᠨ ᠬᠥᠯᠲᠦ ᠴᠠᠭᠠᠨ ᠰᠦᠯᠳᠡ ᠭᠡᠵᠡᠢ᠃ ᠴᠠᠭᠠᠨ ᠰᠦᠯᠳᠡ ᠨᠢ ᠭᠤᠷᠪᠠᠨ  ᠦᠵᠦᠭᠦᠷᠲᠦ ᠲᠡᠮᠦᠷ ᠰᠡᠷᠡᠭᠡ ᠮᠠᠶ᠋ᠢᠭ ᠲᠠᠢ ᠡᠳ᠋ ᠶᠤᠮ᠃ ᠰᠡᠷᠡᠭᠡᠨ ᠤ ᠬᠤᠶᠠᠷ ᠲᠠᠯ᠎ᠠ ᠨᠢ ᠨᠤᠮᠤ ᠪᠠᠨ ᠲᠥᠯᠥᠭᠡᠯᠡᠵᠦ᠂  ᠭᠤᠣᠯ ᠤᠨ ᠵᠢᠲᠡ ᠰᠢᠭ᠋ ᠶᠠᠭᠤᠮ᠎ᠠ ᠨᠢ ᠰᠤᠮᠤ ᠶᠢ ᠲᠥᠯᠥᠭᠡᠯᠡᠵᠦ ᠪᠠᠶᠢᠭ᠎ᠠ ᠬᠡᠲᠡᠭ᠃ ᠴᠠᠷ᠎ᠠ᠂ ᠣᠩᠭᠢ᠂ ᠬᠦᠬᠦᠯ᠂ ᠡᠰᠢ  ᠨᠢ ᠪᠤᠰᠤᠳ ᠰᠦᠯᠳᠡ ᠲᠠᠢ ᠠᠳᠠᠯᠢ ᠮᠥᠷᠲᠡᠭᠡᠨ ᠲᠠᠬᠢᠯᠭ᠎ᠠ ᠨᠢ ᠴᠦ ᠶᠡᠭᠡ ᠲᠥᠯᠥᠪ ᠳᠡᠭᠡᠨ ᠠᠳᠠᠯᠢᠬᠠᠨ ᠪᠠᠶᠢᠳᠠᠭ  ᠶᠤᠮ᠃ ᠭᠠᠭᠴᠠ ᠬᠦ ᠴᠠᠭᠠᠨ ᠰᠦᠯᠳᠡ ᠲᠣᠭᠰᠢᠭᠤᠯᠬᠤ ᠲᠠᠬᠢᠯᠭ᠎ᠠ ᠨᠢ ᠪᠤᠰᠤᠳ ᠰᠦᠯᠳᠡ ᠲᠠᠢ ᠠᠳᠠᠯᠢ ᠦᠭᠡᠢ᠃  ᠯᠤᠤ ᠵᠢᠯ ᠪᠤᠯᠬᠤ ᠪᠦᠷᠢ ᠠᠷᠪᠠᠳᠤᠭᠠᠷ ᠰᠠᠷ᠎ᠠ ᠶᠢᠨ ᠰᠢᠨ᠎ᠡ ᠶᠢᠨ ᠭᠤᠷᠪᠠᠨ ᠤ ᠯᠤᠤ ᠴᠠᠭ ᠲᠤ ᠰᠦᠯᠳᠡ  ᠲᠣᠭᠰᠢᠭᠤᠯᠬᠤ ᠲᠠᠬᠢᠯᠭ᠎ᠠ ᠬᠢᠨ᠎ᠡ᠃ ᠲᠠᠬᠢᠯᠭᠠᠴᠢᠨ ᠠᠴᠠ ᠲᠣᠯᠢ ᠪᠠᠷᠢᠵᠤ ᠣᠶᠢᠭᠰᠠᠨ ᠬᠡᠷᠡᠯ ᠢ ᠰᠦᠯᠳᠡ ᠶᠢᠨ  ᠬᠠᠭᠤᠴᠢᠨ ᠰᠢᠯᠪᠢ ᠳᠤ ᠲᠤᠰᠬᠠᠵᠤ᠂ ᠲᠠᠬᠢᠨ ᠰᠢᠨ᠎ᠡ ᠰᠢᠯᠪᠢ ᠳᠡᠭᠡᠷ᠎ᠡ ᠲᠤᠰᠬᠠᠨ᠎ᠠ᠃ ᠡᠭᠦᠨ ᠢ ᠬᠡᠷᠡᠯ ᠰᠢᠩᠭᠡᠭᠰᠡᠨ  ᠰᠠᠩ ᠠᠪᠤᠨ᠎ᠠ ᠬᠡᠲᠡᠭ᠃ ᠢᠩᠭᠢᠭᠡᠳ ᠰᠦᠯᠳᠡ ᠶᠢᠨ ᠬᠦᠬᠦᠯ᠂ ᠰᠢᠯᠪᠢ᠂ ᠵᠢᠲᠡ ᠶᠢ ᠰᠢᠨᠡᠳᠬᠡᠨ ᠰᠣᠯᠢᠳᠠᠭ ᠶᠤᠮ᠃  ᠢᠩᠭᠢᠭᠡᠳ ᠰᠦᠯᠳᠡ ᠰᠢᠭᠦᠷᠡᠭᠦᠯᠬᠦ ᠳᠤ ᠰᠦᠯᠳᠡ ᠶᠢ ᠬᠠᠪᠰᠤᠷᠤᠨ ᠲᠠᠬᠢᠬᠴᠢ ᠠᠴᠠ ᠡᠷᠡᠦ ᠶᠢ ᠨᠢ ᠬᠤᠯᠤᠭᠤ  ᠲᠤᠯᠲᠠᠯ᠎ᠠ ᠵᠠᠭᠠᠭᠰᠠᠨ ᠬᠤᠨᠢᠨ ᠲᠣᠯᠣᠭᠠᠢ ᠶᠢ ᠵᠠᠭᠠᠮᠠᠭ ᠲᠠᠢ ᠴᠢᠰᠤᠨ ᠳᠤ ᠲᠦᠷᠦᠵᠦ ᠰᠦᠯᠳᠡ ᠤᠷᠤᠭᠤ ᠭᠤᠷᠪᠠ  ᠭᠤᠷᠪᠠ ᠬᠠᠪᠰᠤᠨ᠎ᠠ᠃ ᠢᠷᠦᠭᠡᠯᠴᠢ ᠲᠤᠩ ᠦᠯᠢᠶᠡᠵᠦ᠂ ᠬᠠᠷᠠᠩᠭ᠎ᠠ ᠳᠡᠯᠡᠳᠦᠨ ︽ᠡᠨᠡ ᠡᠳᠦᠷ ᠤᠨ ᠡᠨᠡ ᠴᠠᠭ ᠲᠤ᠂  ᠭᠠᠳᠠᠭᠠᠳᠤ ᠲᠠᠯᠠᠢ ᠶᠢᠨ ᠲᠡᠷᠲᠡᠭᠡ᠂ ᠭᠠᠷᠬᠤ ᠨᠠᠷᠡᠨ ᠤ ᠵᠦᠭ ᠲᠤ ᠡᠷᠢᠶᠡᠨ ᠰᠢᠯᠪᠢᠲᠦ᠂ ᠡᠷᠭᠢᠭᠦᠯ ᠤᠯᠠᠭᠠᠨ  ᠤᠷᠤᠭᠤᠯᠲᠤ᠂ ᠡᠷᠭᠢᠭᠦᠦ ᠡᠩᠭᠡᠷᠲᠦ᠂ ᠡᠪᠡᠰᠦᠨ ᠮᠠᠯᠠᠭᠠᠶᠢᠲᠤ᠂ ᠫᠢᠷᠠᠩ ᠴᠠᠭᠠᠨ ᠱᠠᠭᠠᠶᠢᠲᠤ᠂ ᠪᠠᠭᠠᠷᠠᠩ ᠤᠨ ᠲᠣᠯᠣᠭᠠᠢ  ᠤᠷᠤᠭᠤ᠂ ᠰᠢᠯᠡᠭᠡ ᠤᠷᠬᠢᠬᠰᠠᠳ ᠢ ᠤᠷᠬᠢᠪᠡ᠂ ᠭᠤᠯᠢᠳ︕ ᠭᠤᠯᠢᠳ︕ ᠭᠤᠯᠢᠳ︕ ᠳᠤᠤᠭᠠᠷᠭᠠᠨ᠎ᠠ︕︾ ᠭᠡᠵᠦ  ᠴᠠᠭᠠᠨ ᠰᠦᠯᠳᠡ ᠲᠣᠭᠰᠢᠭᠤᠯᠬᠤ ᠥᠴᠢᠭ ᠳᠠᠭᠤᠳᠠᠵᠤ ᠪᠠᠷᠠᠭᠠᠳ ᠰᠦᠯᠳᠡ ᠶᠢ ᠠᠷᠢᠭᠤᠳᠬᠠᠨ ᠤᠭ ᠣᠷᠣᠨ ᠳᠤᠨᠢ  ᠪᠤᠴᠠᠭᠠᠨ ᠵᠣᠯᠢᠭ ᠲᠤ ᠭᠠᠷᠬᠤ ᠬᠥᠮᠥᠨ ᠢ ᠶᠠᠪᠤᠭᠤᠯᠤᠨ᠎ᠠ᠃ ᠲᠠᠷᠠᠭ᠎ᠠ ᠨᠢ ᠰᠦᠯᠳᠡ ᠴᠢᠩᠭᠢᠬᠦ ᠲᠠᠶᠢᠯᠭ᠎ᠠ ᠬᠢᠵᠦ᠂ ᠨᠠᠶᠢᠷ  ᠨᠠᠭᠠᠳᠤᠮ ᠪᠤᠯᠬᠤ ᠳᠤ ︽ᠲᠠᠰᠢᠭᠤᠷᠴᠢ︾ ᠭᠡᠭᠴᠢ ᠲᠤᠰᠬᠠᠢ ᠬᠥᠮᠥᠨ ᠲᠣᠮᠢᠯᠠᠨ ᠨᠠᠭᠠᠳᠤᠮ ᠢ ᠲᠣᠬᠢᠷᠠᠭᠤᠯᠬᠤ ᠶᠢᠨ  ᠬᠠᠮᠲᠤ ᠰᠣᠭᠲᠣᠭᠤ ᠬᠥᠯᠴᠥᠭᠦᠦ ᠬᠥᠮᠥᠰ ᠢ ᠳᠠᠬᠢᠯᠭᠠᠨ ᠭᠠᠵᠠᠷ ᠤᠷᠤᠭᠤᠯᠬᠤ ᠶᠢ ᠴᠢᠩᠭ᠎ᠠ ᠬᠤᠷᠢᠭᠯᠠᠨ᠎ᠠ᠃
  
ᠢᠷᠡᠯᠲᠡ᠄ ᠲᠠᠷᠬᠠᠨ ᠮᠤᠤᠮᠢᠩᠭᠠᠨ ᠤ ᠵᠠᠰᠠᠭ ᠤᠨ ᠣᠷᠳᠣᠨ ᠤ ᠮᠣᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠭᠠᠯ ᠲᠠᠬᠢᠬᠤ ᠶᠣᠰᠣᠨ
ᠰᠢᠭᠤᠶᠢᠲᠤ ᠶᠢᠨ ᠰᠣᠶᠣᠯ ᠲᠡᠦᠬᠡ᠄ ᠡᠪᠦᠯ ᠤᠨ ᠲᠤᠶᠢᠯ ᠨᠦᠭᠡᠨ ᠭᠡᠷ ᠤᠨ ᠰᠠᠬᠢᠭᠤᠯᠰᠤᠨ ᠲᠠᠬᠢᠬᠤ - ᠠᠭᠤᠷᠬᠠᠢ ᠶᠢᠨ ᠁
ᠣᠪᠣᠭ᠎ᠠ
ᠲᠠᠪᠤᠨ ᠥᠩᠭᠡ ᠶᠢᠨ ᠬᠠᠳᠠᠭ ᠤᠨ ᠪᠡᠯᠭᠡᠳᠡᠯ
ᠴᠠᠢ ᠪᠠᠷᠢᠬᠤ ᠶᠣᠰᠣᠠ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号