ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠪᠠᠭ᠋ᠠᠷᠬᠠᠯᠳᠥ ᠰᠢᠭᠤᠶᠢᠳᠥ
ᠦᠢᠯᠡᠴᠢᠯᠡᠭᠡ
ᠣᠪᠣᠭ᠎ᠠ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2024/10/17
        ᠮᠣᠳᠣ᠂ ᠴᠢᠯᠠᠭᠤ᠂ ᠰᠢᠷᠣᠢ᠂ ᠵᠦᠯᠭᠡ ᠵᠡᠷᠭᠡ ᠶᠢ ᠣᠪᠣᠭᠠᠯᠠᠵᠤ ᠴᠣᠭᠴᠠᠯᠠᠭᠰᠠᠨ ᠣᠪᠣᠭᠤᠷ ᠲᠤᠪᠤᠭᠤᠷ ᠶᠠᠭᠤᠮ᠎ᠠ  ᠶᠢ ᠣᠪᠣᠭ᠎ᠠ ᠭᠡᠲᠡᠭ᠃             ᠮᠣᠩᠭᠤᠯᠴᠤᠳ ᠤᠨ ᠡᠷᠲᠡᠨ ᠤ ᠡᠪᠦᠭᠡ ᠳᠡᠭᠡᠳᠦᠰ ᠵᠦᠭ ᠴᠢᠭ᠂ ᠠᠭᠤᠯᠠ ᠤᠰᠤ᠂ ᠡᠭᠡᠷᠡᠮ᠎ᠡ ᠲᠠᠯ᠎ᠠ᠂ ᠭᠤᠪᠢ ᠡᠯᠡᠰᠦ᠂ ᠪᠡᠷᠬᠡ ᠪᠠᠷᠳᠠᠭ᠎ᠠ ᠲᠠᠢ ᠭᠠᠵᠠᠷ ᠢᠶᠠᠷ ᠵᠣᠷᠴᠢᠬᠤ ᠳᠤ ᠪᠠᠨ ᠬᠡᠳᠦᠨ ᠴᠢᠯᠠᠭᠤ ᠮᠣᠳᠣ ᠶᠢ ᠣᠪᠣᠭᠠᠯᠠᠵᠤ ᠲᠡᠮᠳᠡᠭ ᠪᠤᠯᠭᠠᠵᠦ ᠪᠠᠶᠢᠪᠠ᠃ ᠪᠠᠰᠠ ᠲᠡᠭᠷᠢ ᠭᠠᠵᠠᠷ ᠪᠣᠯᠣᠨ ᠪᠠᠶᠢᠭᠠᠯᠢ ᠶᠢᠨ ᠶᠠᠩᠵᠤ ᠪᠦᠷᠢ ᠶᠢᠨ ᠦᠵᠡᠭᠳᠡᠯ ᠢ ᠡᠯᠳᠡᠪ ᠶᠠᠩᠵᠤ  ᠪᠠᠷ ᠲᠠᠭᠠᠮᠠᠭᠯᠠᠵᠤ᠂ ᠲᠡᠭᠦᠨ ᠢ ᠪᠦᠷ ᠨᠢᠭᠤᠴᠠ ᠲᠡᠯᠲᠡ ᠶᠢᠨ ᠶᠠᠮᠠᠷ ᠨᠢᠭᠡᠨ ᠷᠢᠳᠢ ᠰᠢᠳᠢ ᠲᠠᠢ ᠡᠵᠡᠳ ᠰᠠᠬᠢᠭᠤᠯᠰᠤᠨ  ᠲᠠᠢ ᠬᠡᠮᠡᠨ ᠰᠦᠰᠦᠭᠯᠡᠵᠦ ᠢᠲᠡᠭᠡᠳᠡᠭ ᠪᠠᠶᠢᠭᠰᠠᠨ ᠠᠴᠠ ᠬᠡᠳᠦᠨ ᠴᠢᠯᠠᠭᠤ ᠣᠪᠣᠭᠠᠯᠠᠵᠤ᠂ ᠪᠠᠯᠠᠷᠯᠢᠭ ᠦᠶ᠎ᠡ ᠶᠢᠨ ᠲᠡᠬᠢᠯ ᠮᠥᠷᠭᠦᠯ ᠦᠢᠯᠡᠳᠳᠡᠭ ᠪᠠᠶᠢᠵᠠᠢ᠃ ᠢᠩᠭᠢᠭᠡᠳ ᠣᠪᠣᠭ᠎ᠠ ᠨᠢ ᠮᠣᠩᠭᠤᠯᠴᠤᠳ ᠤᠨ ᠲᠡᠭᠷᠢ᠂ ᠭᠠᠵᠠᠷ᠂ ᠯᠤᠤᠰ ᠢ ᠰᠢᠲᠦᠵᠦ ᠲᠠᠬᠢᠬᠤ ᠲᠠᠪᠴᠠᠩ ᠪᠣᠯᠪᠠ᠃ ᠣᠪᠣᠭ᠎ᠠ ᠳᠠᠬᠢᠭᠰᠠᠨ ᠨᠢ ᠮᠥᠨ ᠴᠦ ᠠᠭᠤᠯᠠ ᠬᠠᠶᠢᠷᠬᠠᠨ᠂ ᠭᠤᠣᠯ ᠤᠰᠤ᠂ ᠡᠪᠡᠰᠦ ᠮᠣᠳᠣ ᠪᠠᠨ ᠬᠠᠶᠢᠷᠠᠯᠠᠭᠰᠠᠨ ᠬᠤᠷᠸ᠎ᠠ ᠶᠢᠨ ᠣᠷᠴᠢᠨ ᠠᠬᠤᠢ ᠶᠢᠨ ᠰᠦᠢᠳᠦᠯ ᠪᠤᠵᠠᠷᠳᠠᠯ ᠠᠴᠠ ᠬᠠᠮᠠᠭᠠᠯᠠᠭᠰᠠᠨ ᠲᠡᠦᠬᠡᠲᠦ ᠪᠣᠳᠠᠲᠤ ᠠᠵᠢᠯᠯᠠᠭ᠎ᠠ ᠪᠤᠯᠬᠤ ᠶᠤᠮ᠃ ᠮᠣᠩᠭᠤᠯᠴᠤᠳ ᠤᠨ ᠣᠪᠣᠭ᠎ᠠ ᠪᠣᠰᠬᠠᠵᠤ ᠲᠡᠮᠳᠡᠭ ᠪᠤᠯᠭᠠᠬᠤ᠂ ᠪᠠᠰᠠ ᠪᠢᠰᠢᠭᠦᠢ ᠤᠯᠠᠨ ᠣᠪᠣᠭ᠎ᠠ ᠪᠣᠰᠬᠠᠵᠤ ᠲᠠᠬᠢᠯ ᠲᠠᠪᠢᠭ ᠡᠷᠭᠦᠭᠰᠡᠨ ᠵᠠᠩ ᠦᠢᠯᠡ ᠨᠢ ᠭᠡᠲᠦ ᠬᠡᠳᠦᠨ ᠵᠠᠭᠤᠨ᠂ ᠮᠢᠩᠭᠠᠨ ᠵᠢᠯ ᠤᠨ ᠲᠡᠦᠬᠡ ᠲᠠᠢ ᠪᠣᠯᠵᠠᠢ᠃             ᠣᠪᠣᠭᠠᠨ ᠤ ᠲᠦᠷᠦᠯ ᠵᠦᠢᠯ             ᠮᠣᠩᠭᠤᠯᠴᠤᠳ ᠤᠨ ᠣᠪᠣᠭ᠎ᠠ ᠨᠢ ᠲᠠᠬᠢᠯᠭ᠎ᠠ ᠲᠠᠢ᠂ ᠲᠠᠬᠢᠯᠭ᠎ᠠ ᠦᠭᠡᠢ᠂ ᠬᠠᠭᠠᠰ ᠬᠤᠭᠤᠰ ᠲᠠᠬᠢᠯᠭ᠎ᠠ ᠲᠠᠢ ᠭᠡᠵᠦ ᠠᠩᠭᠢᠯᠠᠭᠳᠠᠨ᠎ᠠ᠃ ᠣᠪᠣᠭ᠎ᠠ ᠨᠤᠭᠤᠳ ᠨᠢ ᠲᠤᠰ ᠲᠤᠰ ᠲᠤ ᠪᠠᠨ ᠤᠴᠢᠷ ᠤᠳᠬ᠎ᠠ ᠲᠠᠢ ᠤᠯᠠᠨ ᠵᠦᠢᠯ ᠢᠶᠠᠷ ᠢᠯᠭᠠᠭᠳᠠᠬᠤ ᠪᠥᠭᠡᠳ ᠲᠠᠬᠢᠯᠭ᠎ᠠ ᠲᠠᠢ᠂ ᠲᠠᠬᠢᠯᠭ᠎ᠠ ᠦᠭᠡᠢ ᠨᠢ ᠶᠠᠭᠤᠮᠠᠨ ᠤ ᠤᠴᠢᠷ ᠲᠤ ᠪᠠᠶᠢᠭᠤᠯᠤᠭᠰᠠᠨ ᠢᠶᠠᠷ ᠢᠶᠠᠨ ᠲᠣᠭᠲᠠᠭᠠᠭᠳᠠᠨ᠎ᠠ᠃ ᠮᠣᠩᠭᠤᠯᠴᠤᠳ ᠤᠨ ᠣᠪᠣᠭᠠᠨ ᠤ ᠲᠦᠷᠦᠯ ᠵᠦᠢᠯ ᠢ ᠪᠠᠭᠴᠠᠯᠠᠪᠠᠯ᠂ ᠲᠡᠭᠷᠢ ᠣᠪᠣᠭ᠎ᠠ᠂ ᠣᠪᠣᠭ ᠠᠶᠢᠮᠠᠭ ᠤᠨ ᠣᠪᠣᠭ᠎ᠠ᠂ ᠵᠠᠩᠵᠤᠨ ᠣᠪᠣᠭ᠎ᠠ᠂ ᠳᠤᠷᠠᠰᠬᠠᠯ ᠤᠨ ᠣᠪᠣᠭ᠎ᠠ᠂ ᠬᠤᠷᠠᠬᠤ ᠣᠪᠣᠭ᠎ᠠ᠂ ᠤᠩᠭᠤᠨ ᠣᠪᠣᠭ᠎ᠠ᠂ ᠠᠯᠪᠠᠨ ᠣᠪᠣᠭ᠎ᠠ᠂ ᠰᠦᠮ᠎ᠡ ᠬᠡᠶᠢᠳ ᠤᠨ ᠣᠪᠣᠭ᠎ᠠ᠂ ᠰᠦᠯᠳᠡ ᠣᠪᠣᠭ᠎ᠠ᠂ ᠨᠣᠶᠠᠨ ᠣᠪᠣᠭ᠎ᠠ᠂ ᠠᠶᠢᠯ ᠤᠰᠤᠨ ᠤ ᠣᠪᠣᠭ᠎ᠠ᠂ ᠬᠠᠷᠢᠶᠠᠯ ᠤᠨ ᠣᠪᠣᠭ᠎ᠠ᠂ ᠵᠢᠷᠤᠬᠠᠢ ᠣᠪᠣᠭ᠎ᠠ᠂ ᠨᠠᠭᠤᠷ ᠤᠰᠤᠨ ᠤ ᠣᠪᠣᠭ᠎ᠠ᠂ ᠲᠡᠮᠳᠡᠭ ᠣᠪᠣᠭ᠎ᠠ᠂ ᠬᠡᠦᠬᠡᠳ  ᠤᠨ ᠣᠪᠣᠭ᠎ᠠ᠂ ᠮᠠᠯ ᠤᠨ ᠣᠪᠣᠭ᠎ᠠ᠂ ᠠᠪᠠ ᠠᠩᠨᠠᠭᠤᠷ ᠤᠨ ᠣᠪᠣᠭ᠎ᠠ᠂ ᠠᠮᠢᠳᠠᠨ ᠤᠷᠭᠤᠮᠠᠯ ᠤᠨ ᠣᠪᠣᠭ᠎ᠠ᠂ ᠲᠠᠩᠭᠠᠷᠢᠭ ᠣᠪᠣᠭ᠎ᠠ᠂ ᠬᠤᠯᠠᠭᠠᠶᠢᠴᠢ ᠶᠢᠨ ᠣᠪᠣᠭ᠎ᠠ ᠭᠡᠬᠦ ᠮᠡᠲᠦ ᠤᠯᠠᠨ ᠶᠠᠩᠵᠤ ᠶᠢᠨ ᠣᠪᠣᠭ᠎ᠠ ᠪᠤᠢ᠃             ᠣᠪᠣᠭᠠᠨ ᠤ ᠪᠠᠷᠢᠯᠭ᠎ᠠ ᠪᠦᠲᠦᠴᠡ᠂ ᠲᠤᠭ᠎ᠠ ᠪᠠᠶᠢᠷᠢᠯᠠᠯ             ᠣᠪᠣᠭ᠎ᠠ ᠳᠤ ᠲᠠᠩ ᠣᠪᠣᠭ᠎ᠠ ᠪᠤᠶᠤ ᠤᠯᠠᠨ ᠣᠪᠣᠭ᠎ᠠ ᠪᠠᠶᠢᠳᠠᠭ᠃ ᠲᠠᠩ ᠣᠪᠣᠭ᠎ᠠ ᠠᠴᠠ ᠪᠤᠰᠤᠳ ᠤᠯᠠᠨ ᠣᠪᠣᠭ᠎ᠠ ᠨᠢ ᠭᠤᠣᠯ ᠣᠪᠣᠭ᠎ᠠ ᠪᠠ ᠪᠠᠭ᠎ᠠ ᠣᠪᠣᠭ᠎ᠠ ᠪᠠᠷ ᠪᠦᠷᠢᠯᠳᠦᠨ᠎ᠡ᠃ ᠭᠤᠣᠯ ᠣᠪᠣᠭ᠎ᠠ ᠶᠢ ᠪᠠᠰᠠ ᠶᠡᠭᠡ ᠣᠪᠣᠭ᠎ᠠ᠂ ᠪᠦᠳᠦᠭᠦᠨ ᠣᠪᠣᠭ᠎ᠠ᠂ ᠨᠣᠶᠠᠨ ᠣᠪᠣᠭ᠎ᠠ᠂ ᠵᠠᠩᠵᠤᠨ ᠣᠪᠣᠭ᠎ᠠ᠂ ᠲᠥᠪ ᠣᠪᠣᠭ᠎ᠠ ᠭᠡᠲᠡᠭ᠃ ᠪᠠᠭ᠎ᠠ ᠣᠪᠣᠭ᠎ᠠ ᠶᠢ ᠪᠣᠯ ᠱᠠᠪᠢ ᠣᠪᠣᠭ᠎ᠠ᠂ ᠭᠤᠴᠤᠭ ᠣᠪᠣᠭ᠎ᠠ᠂ ᠬᠠᠷᠠᠭᠤᠯ ᠣᠪᠣᠭ᠎ᠠ᠂ ᠬᠤᠶᠠᠭ ᠣᠪᠣᠭ᠎ᠠ᠂ ᠰᠦᠪᠡᠭᠡ ᠣᠪᠣᠭ᠎ᠠ᠂ ᠰᠠᠬᠢᠭᠤᠰᠤ ᠣᠪᠣᠭ᠎ᠠ᠂ ᠳᠠᠭᠠᠯᠲᠠ ᠣᠪᠣᠭ᠎ᠠ ᠭᠡᠲᠡᠭ᠃ ᠠᠷᠠᠳ ᠤᠨ ᠶᠠᠷᠢᠶᠠᠨ ᠳᠤ ᠱᠠᠪᠢ ᠣᠪᠣᠭ᠎ᠠ ᠭᠡᠵᠦ ᠬᠡᠯᠡᠬᠦ ᠨᠢ ᠳᠡᠶᠢᠯᠦᠩᠭᠦᠢ ᠰᠢᠭ ᠪᠠᠶᠢᠳᠠᠭ᠃ ᠱᠠᠪᠢ ᠣᠪᠣᠭᠠᠨ ᠤ ᠲᠤᠭ᠎ᠠ ᠪᠣᠯᠣᠨ ᠪᠠᠶᠢᠷᠢᠯᠠᠯ ᠨᠢ ᠣᠪᠣᠭᠠᠨ ᠤ ᠶᠠᠩᠵᠤ ᠬᠡᠯᠪᠡᠷᠢ ᠪᠦᠲᠦᠴᠡ ᠶᠢᠨ ᠴᠢᠬᠤᠯᠠ ᠵᠦᠢᠯ ᠨᠢ ᠪᠤᠯᠬᠤ ᠮᠥᠷᠲᠡᠭᠡᠨ ᠣᠪᠣᠭᠠᠨ ᠰᠣᠶᠣᠯ ᠤᠨ ᠪᠢᠰᠢᠭᠦᠢ ᠲᠠᠯᠲᠡ ᠤᠳᠬ᠎ᠠ ᠨᠢ ᠮᠥᠨ ᠡᠭᠦᠨ ᠳᠤ  ᠪᠠᠨ ᠪᠤᠢ᠃             ᠲᠠᠩ ᠣᠪᠣᠭ᠎ᠠ            ᠲᠠᠩ ᠣᠪᠣᠭ᠎ᠠ ᠭᠡᠲᠡᠭ ᠨᠢ ᠭᠠᠭᠴᠠ ᠣᠪᠣᠭ᠎ᠠ ᠶᠢ ᠬᠡᠯᠡᠨ᠎ᠡ᠃ ᠡᠶᠢᠮᠦ ᠣᠪᠣᠭᠠᠨ ᠳᠤ ᠠᠶᠢᠯ ᠠᠶᠢᠮᠠᠭ ᠤᠨ ᠣᠪᠣᠭ᠎ᠠ᠂ ᠮᠠᠯ ᠤᠨ ᠣᠪᠣᠭ᠎ᠠ᠂ ᠵᠢᠷᠤᠬᠠᠢ ᠣᠪᠣᠭ᠎ᠠ᠂ ᠠᠮᠢᠳᠡᠨ ᠤᠷᠭᠤᠮᠠᠯ ᠤᠨ ᠣᠪᠣᠭ᠎ᠠ ᠪᠠᠭᠲᠠᠨ᠎ᠠ᠃ ᠠᠷᠠᠳ ᠤᠨ ᠬᠡᠯᠡᠯᠭᠡ ᠳᠤ ᠲᠠᠩ ᠣᠪᠣᠭ᠎ᠠ ᠪᠠᠨ ᠪᠡᠯᠭᠡᠳᠡᠵᠦ ᠨᠢᠭᠡ ᠣᠪᠣᠭ᠎ᠠ᠂ ᠭᠠᠭᠴᠠ ᠣᠪᠣᠭ᠎ᠠ ᠭᠡᠵᠦ ᠳᠡᠮᠡᠢ ᠬᠡᠯᠡᠳᠡᠭ ᠦᠭᠡᠢ᠃ ︽ᠳᠦᠭᠦᠷᠡᠩ ᠣᠪᠣᠭ᠎ᠠ︾ ᠭᠡᠵᠡᠭᠡᠳᠡᠭ ᠶᠤᠮ᠃             ᠬᠤᠶᠠᠷ ᠣᠪᠣᠭ᠎ᠠ            ᠬᠤᠶᠠᠷ ᠣᠪᠣᠭ᠎ᠠ ᠪᠣᠯ ᠶᠡᠭᠡ ᠪᠠᠭ᠎ᠠ ᠶᠢᠨ ᠬᠡᠮᠵᠢᠶ᠎ᠡ᠂  ᠬᠡᠯᠪᠡᠷᠢ ᠨᠢ ᠠᠳᠠᠯᠢᠬᠠᠨ ᠬᠤᠣᠰ ᠣᠪᠣᠭ᠎ᠠ ᠶᠢ ᠬᠡᠯᠡᠨ᠎ᠡ᠃ ᠵᠠᠬ᠎ᠠ ᠬᠢᠯᠢ ᠶᠢᠨ ᠬᠠᠶᠢᠴᠢ ᠣᠪᠣᠭ᠎ᠠ ᠨᠢ ᠪᠦᠷ ᠬᠤᠶᠠᠷ ᠣᠪᠣᠭ᠎ᠠ ᠪᠣᠯᠣᠨ᠎ᠠ᠃ ᠠᠬ᠎ᠠ ᠳᠡᠭᠦᠦ ᠲᠡᠭᠷᠢ ᠲᠠᠬᠢᠬᠤ ᠣᠪᠣᠭ᠎ᠠ ᠴᠦ ᠬᠤᠶᠠᠷ ᠪᠠᠶᠢᠳᠠᠭ᠃             ᠭᠤᠷᠪᠠᠨ ᠣᠪᠣᠭ᠎ᠠ            ᠭᠤᠷᠪᠠᠨ ᠣᠪᠣᠭ᠎ᠠ ᠨᠢ ᠭᠤᠷᠪᠠᠨ ᠭᠠᠯᠪᠠ ᠶᠢᠨ ᠣᠪᠣᠭ᠎ᠠ ᠭᠡᠲᠡᠭ᠃ ᠡᠨᠡ ᠨᠢ ᠥᠩᠭᠡᠷᠡᠭᠰᠡᠨ ᠭᠠᠯᠪᠠ ᠶᠢᠨ ᠺᠠᠱᠢᠪᠡ᠂ ᠡᠨᠡ ᠭᠠᠯᠪᠠ ᠶᠢᠨ ᠱᠠᠭᠵᠠᠮᠤᠨᠢ᠂ ᠢᠷᠡᠬᠦ ᠭᠠᠯᠪᠠ ᠶᠢᠨ ᠮᠠᠶᠢᠳᠠᠷᠢ ᠭᠤᠷᠪᠠᠨ ᠪᠤᠷᠬᠠᠨ ᠢ ᠰᠢᠲᠦᠵᠦ ᠪᠣᠰᠬᠠᠭᠰᠠᠨ ᠣᠪᠣᠭ᠎ᠠ ᠪᠣᠯᠣᠨ᠎ᠠ᠃ ᠡᠭᠦᠨ ᠢ ᠪᠠᠰᠠ ᠭᠤᠷᠪᠠᠨ ᠴᠠᠭ ᠤᠨ ᠪᠤᠷᠬᠠᠨ ᠤ ᠣᠪᠣᠭ᠎ᠠ ᠭᠡᠲᠡᠭ᠃ ᠪᠠᠰᠠ ᠲᠡᠭᠷᠢ᠂ ᠭᠠᠵᠠᠷ᠂ ᠬᠥᠮᠥᠨ ᠤ ᠣᠪᠣᠭ᠎ᠠ ᠬᠡᠮᠡᠨ ᠭᠤᠷᠪᠠᠨ ᠣᠪᠣᠭ᠎ᠠ ᠪᠣᠰᠬᠠᠳᠠᠭ᠃ ᠭᠤᠣᠯ ᠳᠤ ᠨᠢ ᠶᠡᠭᠡ ᠣᠪᠣᠭ᠎ᠠ ︵ᠬᠥᠮᠥᠨ ᠤ ᠣᠪᠣᠭ᠎ᠠ︶ ᠬᠤᠶᠠᠷ ᠲᠠᠯ᠎ᠠ ᠳᠤ ᠨᠢ ᠨᠢᠭᠡ ᠨᠢᠭᠡ ᠱᠠᠪᠢ ᠣᠪᠣᠭ᠎ᠠ ᠪᠣᠰᠬᠠᠳᠠᠭ᠃ ᠭᠤᠷᠪᠠᠨ ᠬᠤᠰᠢᠭᠤᠨ ᠤ ᠵᠠᠬ᠎ᠠ ᠬᠢᠯᠢ ᠶᠢᠨ ᠠᠭᠤᠯᠵᠠᠷ ᠤᠨ ᠲᠡᠮᠳᠡᠭ ᠣᠪᠣᠭ᠎ᠠ ᠪᠣᠯ ᠭᠤᠷᠪᠠᠯᠵᠢᠨ ᠪᠠᠶᠢᠷᠢᠰᠢᠯ ᠲᠠᠢ ᠠᠳᠠᠯᠢᠬᠠᠨ ᠭᠤᠷᠪᠠᠨ ᠣᠪᠣᠭ᠎ᠠ ᠪᠣᠰᠬᠠᠳᠠᠭ ᠶᠤᠮ᠃             ᠲᠦᠷᠪᠠᠨ ᠣᠪᠣᠭ᠎ᠠ            ᠭᠤᠣᠯ ᠳᠤ ᠪᠠᠨ ᠨᠢᠭᠡ ᠶᠡᠭᠡ ᠣᠪᠣᠭ᠎ᠠ᠂ ᠲᠣᠭᠤᠷᠢᠭᠠᠳ ᠭᠤᠷᠪᠠᠨ ᠱᠠᠪᠢ ᠣᠪᠣᠭ᠎ᠠ  ᠲᠠᠢ ᠲᠦᠷᠪᠠᠨ ᠣᠪᠣᠭ᠎ᠠ ᠶᠢ ᠲᠦᠷᠪᠠᠨ ᠳᠥᠰᠢᠳ ᠤᠨ ᠲᠡᠭᠷᠢ ᠳᠠᠬᠢᠭᠰᠠᠨ ᠣᠪᠣᠭ᠎ᠠ ᠬᠡᠲᠡᠭ᠃ ᠲᠦᠷᠪᠠᠨ ᠳᠥᠰᠢᠳ  ᠤᠨ ᠲᠡᠭᠷᠢ ᠭᠡᠲᠡᠭ ᠨᠢ ᠪᠦᠭᠡ ᠮᠥᠷᠭᠦᠯ ᠤᠨ ᠶᠡᠷᠠ ᠶᠢᠰᠦᠨ ᠲᠡᠭᠷᠢ ᠶᠢᠨ ᠨᠢᠭᠡ ᠨᠢ ᠪᠤᠯᠬᠤ ᠰᠢᠲᠦᠭᠡᠨ ᠶᠤᠮ᠃ ᠮᠥᠨ ᠴᠦ ᠦᠯᠢᠭᠡᠷ ᠤᠨ ᠡᠪᠲᠦ ᠲᠦᠷᠪᠠᠨ ᠠᠮᠢᠳᠡᠨ ᠢ ᠰᠠᠬᠢᠭᠤᠯᠰᠤᠨ ᠪᠣᠯᠭᠠᠨ ᠰᠢᠲᠦᠭᠰᠡᠨ ᠣᠪᠣᠭ᠎ᠠ ᠪᠣᠯᠣᠨ᠎ᠠ᠃ ᠡᠨᠡ ᠨᠢ ᠵᠠᠭᠠᠨ᠂ ᠪᠡᠴᠢᠨ᠂ ᠲᠠᠤᠯᠠᠢ᠂ ᠪᠣᠯᠵᠣᠮᠣᠷ ᠡᠪ ᠨᠡᠶᠢᠯᠡᠵᠦ᠂ ᠥᠨᠳᠥᠷ ᠮᠣᠳᠣᠨ ᠠᠴᠠ ᠵᠢᠮᠢᠰ ᠲᠡᠭᠦᠵᠦ ᠢᠳᠡᠭᠰᠡᠨ ᠦᠯᠢᠭᠡᠷ ᠪᠤᠯᠬᠤ ᠶᠤᠮ᠃             ᠲᠠᠪᠤᠨ ᠣᠪᠣᠭ᠎ᠠ            ᠲᠠᠪᠤᠨ ᠣᠪᠣᠭ᠎ᠠ ᠶᠢ ᠵᠠᠶᠠᠭᠠᠨ ᠲᠠᠪᠤᠨ ᠲᠡᠭᠷᠢ ᠶᠢᠨ ᠣᠪᠣᠭ᠎ᠠ ᠭᠡᠲᠡᠭ᠃ ᠵᠠᠶᠠᠭᠠᠨ ᠲᠠᠪᠤᠨ ᠲᠡᠭᠷᠢ ᠭᠡᠲᠡᠭ ᠨᠢ ᠣᠷᠣᠨ ᠤ ᠲᠡᠭᠷᠢ᠂ ᠡᠴᠢᠭᠡ ᠶᠢᠨ ᠲᠡᠭᠷᠢ᠂ ᠡᠬᠡ ᠶᠢᠨ ᠲᠡᠭᠷᠢ᠂ ᠰᠦᠯᠳᠡ ᠲᠡᠭᠷᠢ᠂ ᠠᠮᠢᠨ ᠲᠡᠭᠷᠢ ᠪᠣᠯᠣᠨ᠎ᠠ᠃ ᠲᠠᠪᠤᠨ ᠣᠪᠣᠭ᠎ᠠ ᠶᠢ ᠪᠠᠰᠠ ᠲᠠᠪᠤᠨ ᠬᠤᠰᠢᠭᠤ ᠮᠠᠯ ᠤᠨ ᠬᠡᠰᠢᠭ ᠲᠣᠭᠲᠠᠬᠤ ᠣᠪᠣᠭ᠎ᠠ ᠬᠡᠮᠡᠨ ᠪᠡᠯᠭᠡᠳᠡᠵᠦ ᠭᠤᠣᠯ ᠣᠪᠣᠭ᠎ᠠ ᠪᠠᠨ ᠠᠳᠤᠭᠤᠨ ᠣᠪᠣᠭ᠎ᠠ᠂ ᠲᠦᠷᠪᠠᠨ ᠱᠠᠪᠢ ᠣᠪᠣᠭ᠎ᠠ ᠪᠠᠨ ᠬᠤᠨᠢ᠂ ᠢᠮᠠᠭ᠎ᠠ᠂ ᠲᠡᠮᠡᠭᠡ᠂ ᠦᠬᠡᠷ ᠤᠨ ᠣᠪᠣᠭ᠎ᠠ ᠬᠡᠮᠡᠵᠦ᠂ ᠭᠤᠣᠯ ᠣᠪᠣᠭᠠᠨ ᠤ ᠲᠤᠭ ᠤᠨ ᠡᠰᠢᠨ ᠠᠴᠠ ᠴᠠᠭᠠᠨ ᠶᠣᠷᠤᠭ ᠳᠡᠭᠡᠷ᠎ᠡ ᠮᠣᠷᠢ ᠪᠠᠷᠯᠠᠭᠰᠠᠨ ᠳᠠᠷᠴᠤᠭ ᠬᠡᠶᠢᠰᠬᠡᠵᠦ᠂ ᠲᠠᠬᠢᠯᠭ᠎ᠠ ᠶᠢᠨ ᠦᠶ᠎ᠡ ᠳᠤ᠂ ᠭᠤᠣᠯ ᠣᠪᠣᠭᠠᠨ ᠤ ᠪᠠᠨ ᠲᠤᠭ ᠤᠨ ᠡᠰᠢᠨ ᠠᠴᠠ ᠤᠩᠭᠠᠰᠤᠨ ᠳᠡᠭᠡᠰᠦ ᠲᠠᠲᠠᠵᠤ ᠲᠦᠷᠪᠠᠨ ᠱᠠᠪᠢ ᠣᠪᠣᠭ᠎ᠠ ᠲᠠᠢ ᠬᠤᠯᠪᠣᠵᠤ᠂ ᠳᠡᠭᠡᠰᠦᠨ ᠠᠴᠠ ᠪᠠᠨ ᠠᠵᠢᠷᠭᠠᠨ ᠲᠡᠯ᠂ ᠪᠤᠤᠷ᠎ᠠ ᠶᠢᠨ ᠤᠬᠪᠤᠭ ︵ᠥᠷᠪᠡᠯᠭᠡ︶᠂ ᠪᠤᠬ᠎ᠠ᠂ ᠬᠤᠴᠠ᠂ ᠤᠬᠤᠨ᠎ᠠ ᠶᠢᠨ ᠤᠩᠭᠠᠰᠤ ᠤᠶᠠᠵᠤ ᠲᠠᠬᠢᠯᠭ᠎ᠠ ᠬᠢᠵᠦ ᠮᠠᠯ  ᠤᠨ ᠬᠡᠰᠢᠭ ᠳᠠᠯᠠᠯᠳᠠᠭ ᠶᠤᠮ᠃             ᠲᠤᠯᠤᠭᠠᠨ ᠣᠪᠣᠭ᠎ᠠ            ᠦᠷ᠎ᠡ ᠬᠡᠦᠬᠡᠳ ᠤᠨ ᠢᠶᠠᠨ ᠠᠮᠢ ᠨᠠᠰᠤ ᠶᠢ ᠤᠷᠲᠤᠳᠬᠠᠬᠤ ᠳᠤ ᠳᠠᠭᠠᠳᠬᠠᠭᠰᠠᠨ ᠦᠷ᠎ᠡ ᠶᠢᠨ ᠬᠤᠲᠤᠭ ᠭᠤᠶᠣᠭᠰᠠᠨ ᠤᠳᠬ᠎ᠠ ᠲᠠᠢ ᠬᠡᠦᠬᠡᠳ ᠤᠨ ᠣᠪᠣᠭ᠎ᠠ ᠨᠢ ᠲᠤᠯᠤᠭᠠᠨ ᠣᠪᠣᠭ᠎ᠠ ᠪᠠᠶᠢᠳᠠᠭ᠃ ᠠᠷᠠᠳ ᠤᠨ ᠤᠯᠠᠮᠵᠢᠯᠠᠯ ᠶᠠᠷᠢᠶᠠᠨ ᠳᠤ ︽ᠳᠣᠲᠣᠭᠠᠳᠤ ᠡᠩᠭᠡᠷ ᠲᠤ ᠨᠢ ᠲᠤᠯᠤᠭᠠᠨ ᠬᠡᠦᠬᠡᠳ ᠲᠠᠢ ᠪᠣᠯ︾ ᠬᠡᠮᠡᠨ ᠢᠷᠦᠭᠡᠳᠡᠭ ᠲᠣᠭᠠᠨ ᠤ ᠪᠡᠯᠭᠡᠳᠡᠯ ᠨᠢ ᠬᠡᠦᠬᠡᠳ ᠤᠨ ᠣᠪᠣᠭᠠᠨ ᠲᠤᠭ᠎ᠠ ᠲᠠᠢ ᠢᠵᠢᠯᠰᠢᠵᠦ ᠪᠤᠢ᠃ ᠵᠠᠷᠢᠮ ᠨᠤᠲᠤᠭ ᠲᠤ ︽ᠲᠤᠯᠤᠭᠠᠨ ᠪᠤᠷᠬᠠᠨ ᠤᠳᠤ ︵ᠲᠤᠯᠤᠭᠠᠨ ᠡᠪᠦᠭᠡᠨ︶ ᠳᠠᠬᠢᠭᠰᠠᠨ ᠲᠤᠯᠤᠭᠠᠨ ᠣᠪᠣᠭ᠎ᠠ ᠶᠢ ᠮᠥᠨ ᠬᠡᠦᠬᠡᠳ ᠤᠨ ᠣᠪᠣᠭ᠎ᠠ︾ ᠭᠡᠲᠡᠭ᠃ ᠵᠠᠷᠢᠮ ᠭᠠᠵᠠᠷ ᠲᠤ ᠪᠠᠰᠠ ᠶᠠᠮᠠᠨᠳᠠᠭ᠂ ᠭᠤᠩᠭᠢᠷ᠂ ᠵᠠᠮᠰᠡᠷᠡᠩ᠂ ᠭᠤᠮᠪᠤ᠂ ᠯᠾᠮᠦ᠂ ᠨᠠᠮᠰᠠᠷᠠᠢ᠂ ᠴᠦᠢᠵᠢᠯ ᠲᠤᠯᠤᠭᠠᠨ ᠳᠣᠭᠰᠢᠳ ᠢ ᠲᠤᠯᠤᠭᠠᠨ ᠣᠪᠣᠭ᠎ᠠ ᠬᠡᠮᠡᠳᠡᠭ ᠪᠠᠶᠢᠨ᠎ᠠ᠃ ᠲᠤᠯᠤᠭᠠᠨ ᠣᠪᠣᠭᠠᠨ ᠤ ᠪᠠᠶᠢᠷᠢᠰᠢᠭᠤᠯᠤᠯᠲᠠ ᠨᠢ ᠭᠤᠣᠯ ᠣᠪᠣᠭᠠᠨ ᠤ ᠵᠡᠭᠦᠨ ᠪᠠᠷᠠᠭᠤᠨ ᠲᠠᠯ᠎ᠠ ᠳᠤ ᠭᠤᠷᠪᠠ ᠭᠤᠷᠪᠠᠨ ᠱᠠᠪᠢ ᠣᠪᠣᠭ᠎ᠠ ᠲᠠᠢ ᠪᠠᠶᠢᠳᠠᠭ᠃             ᠶᠢᠰᠦᠨ ᠣᠪᠣᠭ᠎ᠠ            ᠵᠦᠭ ᠴᠢᠭ ᠢ ᠵᠢᠭᠠᠭᠰᠠᠨ ᠲᠡᠮᠳᠡᠭ ᠣᠪᠣᠭ᠎ᠠ᠂ ᠴᠠᠭᠠᠨ ᠰᠦᠯᠳᠡ ᠣᠪᠣᠭ᠎ᠠ᠂ ᠬᠠᠷᠢᠶᠠᠯ  ᠤᠨ ᠣᠪᠣᠭ᠎ᠠ ᠵᠡᠷᠭᠡ  ᠨᠢ ᠶᠢᠰᠦᠨ ᠣᠪᠣᠭ᠎ᠠ ᠪᠠᠶᠢᠳᠠᠭ᠃ ᠶᠢᠰᠦ ᠶᠢᠨ ᠲᠤᠭ᠎ᠠ ᠨᠢ ᠮᠣᠩᠭᠤᠯᠴᠤᠳ ᠤᠨ ᠰᠢᠲᠦᠯᠭᠡ ᠪᠢᠰᠢᠷᠡᠯ ᠳᠠᠬᠢ ᠲᠣᠭᠠᠨ ᠤ ᠪᠡᠯᠭᠡᠳᠡᠯ ᠤᠨ ᠴᠢᠬᠤᠯᠠ ᠨᠢᠭᠡ ᠨᠢ ᠪᠤᠯᠳᠠᠭ ᠶᠤᠮ᠃ ᠵᠦᠭ ᠴᠢᠭ ᠢ ᠵᠢᠭᠠᠭᠰᠠᠨ ᠲᠡᠮᠳᠡᠭ ᠣᠪᠣᠭ᠎ᠠ ᠨᠢ ᠭᠤᠣᠯ ᠣᠪᠣᠭᠠᠨ ᠤ ᠬᠤᠶᠢᠨ᠎ᠠ ᠡᠮᠦᠨ᠎ᠡ ᠪᠤᠶᠤ ᠵᠡᠭᠦᠨᠲᠡᠢ ᠪᠠᠷᠠᠭᠤᠨᠲᠠᠢ ᠨᠢ ᠴᠡᠭ ᠱᠤᠭᠤᠮ ᠳᠡᠭᠡᠷ᠎ᠡ ᠳᠥᠷᠪᠡ ᠲᠦᠷᠪᠠᠨ ᠱᠠᠪᠢ ᠣᠪᠣᠭ᠎ᠠ ᠪᠣᠰᠬᠠᠵᠤ ᠲᠡᠮᠳᠡᠭ ᠪᠣᠯᠭᠠᠳᠠᠭ ᠶᠤᠮ᠃ ᠶᠢᠰᠦᠨ ᠬᠥᠯᠲᠦ ᠴᠠᠭᠠᠨ ᠲᠤᠭ ᠰᠦᠯᠳᠡ ᠶᠢᠨ ᠣᠪᠣᠭ᠎ᠠ ᠨᠢ ᠭᠤᠣᠯ ᠣᠪᠣᠭᠠᠨ ᠤ ᠲᠦᠷᠪᠠᠨ ᠵᠦᠭ ᠨᠠᠢᠮᠠᠨ ᠵᠣᠪᠬᠢᠰ ᠲᠤ ᠨᠠᠢᠮᠠᠨ ᠱᠠᠪᠢ ᠣᠪᠣᠭ᠎ᠠ  ᠲᠠᠢ ᠪᠠᠶᠢᠵᠤ᠂ ᠨᠠᠢᠮᠠᠨ ᠱᠠᠪᠢ ᠣᠪᠣᠭ᠎ᠠ  ᠨᠢ ᠨᠠᠢᠮᠠᠨ ᠡᠯᠴᠢ ᠰᠦᠯᠳᠡ ᠶᠢᠨ ᠣᠪᠣᠭ᠎ᠠ ᠪᠤᠯᠬᠤ ᠶᠤᠮ᠃ ᠪᠠᠰᠠ ᠶᠡᠭᠡ ᠣᠪᠣᠭ᠎ᠠ ᠪᠠᠨ ᠳᠠᠭᠠᠭᠤᠯᠵᠤ ᠨᠠᠢᠮᠠᠨ ᠱᠠᠪᠢ ᠣᠪᠣᠭ᠎ᠠ ᠶᠢ ᠨᠢᠭᠡᠨ ᠱᠤᠭᠤᠮ ᠢᠶᠠᠷ ᠵᠢᠭᠰᠠᠭᠠᠵᠤ᠂ ᠨᠢᠭᠡ ᠨᠢ ᠨᠢᠭᠡ ᠠᠴᠠ  ᠪᠠᠨ ᠪᠠᠭᠠᠪᠲᠤᠷ᠂ ᠶᠢᠰᠦᠨ ᠣᠪᠣᠭ᠎ᠠ ᠪᠣᠰᠬᠠᠭᠰᠠᠨ ᠨᠢ ᠬᠠᠷᠢᠶᠠᠯ ᠤᠨ ᠣᠪᠣᠭ᠎ᠠ ᠪᠣᠯᠣᠨ᠎ᠠ᠃             ᠠᠷᠪᠠᠨ ᠭᠤᠷᠪᠠᠨ ᠣᠪᠣᠭ᠎ᠠ           ᠮᠣᠩᠭᠤᠯᠴᠤᠳ ᠤᠨ ᠡᠪᠦᠭᠡ ᠳᠡᠭᠡᠳᠦᠰ ᠤᠵᠠᠭᠤᠷ ᠠᠴᠠ ᠠᠷᠪᠠᠨ ᠭᠤᠷᠪᠠ ᠭᠡᠰᠡᠨ ᠲᠤᠭ᠎ᠠ ᠶᠢ ᠰᠠᠶᠢᠨ ᠤ ᠪᠡᠯᠭᠡᠳᠡᠯ ᠤᠨ ᠲᠤᠭ᠎ᠠ ᠬᠡᠮᠡᠨ ᠬᠡᠷᠡᠭᠯᠡᠭᠰᠡᠭᠡᠷ ᠢᠷᠡᠵᠠᠢ᠃ ᠡᠶᠢᠮᠦ ᠠᠴᠠ ᠣᠪᠣᠭᠠᠨ ᠰᠣᠶᠣᠯ ᠤᠨ ᠰᠢᠲᠦᠯᠭᠡ ᠪᠢᠰᠢᠷᠡᠯ ᠳᠤ ᠠᠷᠪᠠᠨ ᠭᠤᠷᠪᠠ ᠶᠢᠨ ᠲᠤᠭ᠎ᠠ ᠪᠠᠷ ᠣᠪᠣᠭ᠎ᠠ ᠪᠣᠰᠬᠠᠳᠠᠭ ᠪᠢᠯᠡ᠃ ᠵᠢᠱᠢᠶᠡᠯᠡᠪᠡᠯ᠂ ︽ᠲᠡᠮᠦᠵᠢᠨ ᠤ ᠠᠷᠪᠠᠨ ᠭᠤᠷᠪᠠᠨ ᠨᠠᠰᠤᠨ ᠠᠴᠠ ᠬᠡᠢ ᠮᠣᠷᠢ ᠰᠡᠷᠭᠦᠭᠰᠡᠨ︾ ᠠᠷᠪᠠᠨ ᠭᠤᠷᠪᠠᠨ ᠣᠪᠣᠭ᠎ᠠ᠂ ︽ᠴᠢᠩᠭᠢᠰ ᠬᠠᠭᠠᠨ ᠤ ᠴᠡᠷᠢᠭ ᠤᠨ ᠠᠷᠪᠠᠨ ᠭᠤᠷᠪᠠᠨ ᠬᠦᠷᠢᠶ᠎ᠡ ᠶᠢ ᠳᠤᠷᠠᠰᠬᠠᠭᠰᠠᠨ︾ ᠠᠷᠪᠠᠨ ᠭᠤᠷᠪᠠᠨ ᠣᠪᠣᠭ᠎ᠠ ᠪᠤᠢ᠃ ᠪᠠᠰᠠ ᠪᠦᠭᠡ ᠮᠥᠷᠭᠦᠯ ᠤᠨ ᠨᠣᠮᠯᠠᠯ ᠳᠤ ︽ᠠᠷᠪᠠᠨ ᠭᠤᠷᠪᠠᠨ ᠠᠲᠠᠭ᠎ᠠ ᠲᠡᠭᠷᠢ ᠳᠤ ᠪᠠᠨ ᠲᠠᠬᠢᠯᠭ᠎ᠠ ᠶᠢᠨ ᠮᠠᠨᠳᠤᠯ ᠪᠣᠰᠬᠠᠬᠤ︾ ᠭᠡᠵᠦ ᠠᠷᠪᠠᠨ ᠭᠤᠷᠪᠠᠨ ᠣᠪᠣᠭ᠎ᠠ ᠪᠣᠰᠬᠠᠭᠰᠠᠨ ᠪᠠᠶᠢᠳᠠᠭ ᠶᠤᠮ᠃ ᠠᠷᠪᠠᠨ ᠭᠤᠷᠪᠠᠨ ᠠᠲᠠᠭ᠎ᠠ ᠲᠡᠭᠷᠢ ᠭᠡᠲᠡᠭ ᠨᠢ᠄ ᠳᠡᠭᠡᠳᠦ᠂ ᠳᠤᠮᠳᠠ᠂ ᠳᠣᠣᠷᠠᠳᠤ ᠭᠤᠷᠪᠠᠨ ᠲᠡᠭᠷᠢ᠂ ᠤᠮᠠᠷᠠᠲᠤ ᠵᠦᠭ ᠤᠨ ᠭᠤᠷᠪᠠᠨ ᠲᠡᠭᠷᠢ᠂ ᠵᠡᠭᠦᠨ ᠬᠤᠶᠢᠨ᠎ᠠ᠂ ᠵᠡᠭᠦᠨ᠂ ᠵᠡᠭᠦᠨ ᠡᠮᠦᠨ᠎ᠡ᠂ ᠡᠮᠦᠨ᠎ᠡ᠂ ᠪᠠᠷᠠᠭᠤᠨ᠂ ᠪᠠᠷᠠᠭᠤᠨ ᠬᠤᠶᠢᠨ᠎ᠠ ᠲᠤᠯᠤᠭᠠᠨ ᠲᠡᠭᠷᠢ ᠨᠡᠶᠢᠲᠡ ᠠᠷᠪᠠᠨ ᠭᠤᠷᠪᠠᠨ ᠲᠡᠭᠷᠢ ᠪᠣᠯᠣᠨ᠎ᠠ᠃ ᠠᠷᠪᠠᠨ ᠭᠤᠷᠪᠠᠨ ᠣᠪᠣᠭᠠᠨ ᠤ ᠪᠠᠶᠢᠷᠢᠯᠠᠯ ᠳᠤ ᠶᠡᠭᠡ ᠣᠪᠣᠭ᠎ᠠ ᠪᠠᠨ ᠳᠠᠭᠠᠭᠤᠯᠵᠤ ᠠᠷᠪᠠᠨ ᠬᠤᠶᠠᠷ ᠱᠠᠪᠢ ᠣᠪᠣᠭ᠎ᠠ ᠶᠢ ᠬᠤᠶᠠᠷ ᠲᠠᠯ᠎ᠠ ᠳᠤ ᠵᠢᠷᠭᠤᠭ᠎ᠠ ᠵᠢᠷᠭᠤᠭ᠎ᠠ ᠪᠠᠷ ᠨᠢᠭᠡ ᠮᠥᠷ ᠢᠶᠠᠷ ᠵᠢᠭᠰᠠᠭᠠᠨ ᠪᠣᠰᠬᠠᠳᠠᠭ ᠪᠤᠶᠤ ᠵᠠᠷᠢᠮ ᠭᠠᠵᠠᠷ ᠲᠤ ᠶᠡᠭᠡ ᠣᠪᠣᠭ᠎ᠠ ᠪᠠᠨ ᠲᠣᠭᠤᠷᠢᠭᠤᠯᠤᠨ ᠠᠷᠪᠠᠨ ᠬᠤᠶᠠᠷ ᠱᠠᠪᠢ ᠣᠪᠣᠭ᠎ᠠ ᠪᠣᠰᠬᠠᠳᠠᠭ ᠴᠦ ᠪᠤᠢ᠃             ᠬᠤᠷᠢᠨ ᠲᠤᠯᠤᠭᠠᠨ ᠣᠪᠣᠭ᠎ᠠ            ᠮᠣᠩᠭᠤᠯ ᠤᠯᠤᠰ ᠲᠠᠬᠢ ᠬᠡᠷᠦᠯᠦᠨ ᠤ ᠪᠠᠶᠠᠨ᠋ᠤ᠋ᠯᠠᠭᠠᠨ ᠤ ᠣᠷᠣᠢ ᠳᠡᠭᠡᠷᠡᠬᠢ ᠬᠠᠭᠠᠨ ᠣᠪᠣᠭ᠎ᠠ ᠨᠢ ᠬᠤᠷᠢᠨ ᠲᠤᠯᠤᠭᠠᠨ ᠣᠪᠣᠭ᠎ᠠ ᠪᠣᠯᠣᠨ᠎ᠠ᠃ ᠭᠤᠣᠯ ᠣᠪᠣᠭᠠᠨ ᠤ ᠬᠤᠶᠠᠷ ᠲᠠᠯ᠎ᠠ ᠪᠠᠷ ᠠᠷᠪᠠᠨ ᠭᠤᠷᠪᠠᠨ ᠱᠠᠪᠢ ᠣᠪᠣᠭ᠎ᠠ ᠶᠢ ᠨᠢᠭᠡ ᠮᠥᠷ ᠢᠶᠠᠷ ᠵᠢᠭᠰᠠᠭᠠᠵᠠᠢ᠃ ᠡᠨᠡ ᠨᠢ ᠴᠢᠩᠭᠢᠰ ᠬᠠᠭᠠᠨ ᠤ ᠬᠤᠷᠢᠨ ᠲᠤᠯᠤᠭᠠᠨ ᠨᠠᠰᠤᠨ ᠳᠡᠭᠡᠷ᠎ᠡ ᠬᠠᠭᠠᠨ ᠰᠠᠭᠤᠬᠤ ᠳᠤ ᠪᠣᠰᠬᠠᠭᠰᠠᠨ ᠣᠪᠣᠭ᠎ᠠ ᠪᠠᠶᠢᠵᠠᠢ᠃             ᠭᠤᠴᠢᠨ ᠭᠤᠷᠪᠠᠨ ᠣᠪᠣᠭ᠎ᠠ            ᠭᠤᠴᠢᠨ ᠭᠤᠷᠪᠠᠨ ᠲᠡᠭᠷᠢ ︵ᠡᠲᠦᠭᠡᠨ ᠡᠬᠡ︶ ᠶᠢ ᠰᠢᠲᠦᠵᠦ ᠪᠣᠰᠬᠠᠭᠰᠠᠨ᠂ ᠭᠤᠣᠯ ᠣᠪᠣᠭᠠᠨ ᠤ ᠲᠦᠷᠪᠠᠨ ᠲᠠᠯ᠎ᠠ ᠳᠤ ᠨᠠᠢᠮᠠ ᠨᠠᠢᠮᠠᠨ ᠱᠠᠪᠢ ᠣᠪᠣᠭ᠎ᠠ ᠲᠠᠢ ᠭᠤᠴᠢᠨ ᠭᠤᠷᠪᠠᠨ ᠣᠪᠣᠭ᠎ᠠ ᠪᠠᠶᠢᠳᠠᠭ ᠶᠤᠮ᠃ ᠡᠶᠢᠮᠦ ᠣᠪᠣᠭ᠎ᠠ ᠰᠢᠨᠵᠢᠶᠠᠩ ᠳᠠᠬᠢ ᠣᠶᠢᠷᠠᠳ ᠤᠨ ᠵᠠᠯᠮᠠᠨ ᠬᠠᠨ ᠤ ᠣᠷᠣᠢ ᠳᠤ᠂ ᠬᠠᠯᠬ᠎ᠠ ᠳᠠᠬᠢ ᠠᠯᠲᠠᠢ ᠶᠢᠨ ᠥᠭᠡᠯᠡᠳ ᠤᠨ ᠴᠠᠭᠠᠨ ᠬᠠᠶᠢᠷᠬᠠᠨ ᠳᠡᠭᠡᠷ᠎ᠡ ᠪᠠᠶᠢᠳᠠᠭ ᠶᠤᠮ᠃             ᠤᠯᠠᠨ ᠣᠪᠣᠭ᠎ᠠ            ᠵᠠᠬ᠎ᠠ ᠬᠢᠯᠢ ᠶᠢᠨ ᠲᠡᠮᠳᠡᠭ ᠣᠪᠣᠭ᠎ᠠ᠂ ᠭᠠᠴᠠᠭ᠎ᠠ ᠣᠪᠣᠭ᠎ᠠ᠂ ᠴᠡᠷᠢᠭ ᠲᠠᠶᠢᠨ ᠤ ᠲᠤᠬᠢᠶᠠᠨ ᠤ ᠭᠠᠯ ᠲᠠᠯᠪᠢᠳᠠᠭ ᠣᠪᠣᠭ᠎ᠠ ᠬᠢᠭᠡᠳ ᠶᠠᠮᠠᠷ ᠨᠢᠭᠡᠨ ᠵᠦᠢᠯ ᠳᠤ ᠳᠠᠷᠤᠯᠭ᠎ᠠ ᠳᠠᠷᠤᠭᠰᠠᠨ ᠣᠪᠣᠭ᠎ᠠ ᠵᠡᠷᠭᠡ  ᠨᠢ ᠭᠠᠵᠠᠷ ᠤᠨ ᠵᠠᠢ ᠪᠠᠶᠢᠴᠠ ᠶᠢᠨ ᠬᠡᠮᠵᠢᠶ᠎ᠡ ᠪᠠᠷ ᠪᠣᠰᠬᠠᠭᠳᠠᠭᠰᠠᠨ ᠪᠥᠭᠡᠳ ᠲᠤᠭ᠎ᠠ ᠨᠢ ᠲᠣᠭᠲᠠᠭᠠᠯ ᠦᠭᠡᠢ ᠤᠯᠠᠨ ᠣᠪᠣᠭ᠎ᠠ ᠪᠠᠶᠢᠳᠠᠭ ᠶᠤᠮ᠃ ᠲᠡᠭᠦᠨ ᠳᠤ ᠭᠤᠣᠯ ᠣᠪᠣᠭ᠎ᠠ᠂ ᠱᠠᠪᠢ ᠣᠪᠣᠭ᠎ᠠ ᠭᠡᠵᠦ ᠢᠯᠭᠠᠭᠳᠠᠬᠤ ᠶᠠᠭᠤᠮ᠎ᠠ ᠦᠭᠡᠢ᠃ ᠲᠠᠷᠬᠠᠨ ᠮᠤᠤᠮᠢᠩᠭᠠᠨ ᠤ ᠤᠯᠠᠨ ᠰᠦᠮ᠎ᠡ ᠶᠢᠨ ᠪᠠᠭᠤᠷᠢ ᠠᠴᠠ ᠡᠮᠦᠨᠡᠰᠢ ᠨᠠᠢᠮᠠᠨ ᠭᠠᠵᠠᠷ ᠤᠨ ᠵᠠᠶᠢᠲᠠᠢ ᠠᠭᠤᠯᠠ ᠶᠢᠨ ᠣᠷᠣᠢ ᠳᠡᠭᠡᠷ᠎ᠡ ᠭᠤᠴᠢᠨ ᠲᠠᠪᠤᠨ ᠬᠠᠷ᠎ᠠ ᠴᠢᠯᠠᠭᠤᠨ ᠣᠪᠣᠭ᠎ᠠ ᠪᠠᠶᠢᠳᠠᠭ ᠢ ᠶᠠᠭᠤᠨ ᠤ ᠣᠪᠣᠭ᠎ᠠ᠂ ᠶᠠᠭᠤᠨ ᠳᠤ ᠪᠣᠰᠬᠠᠭᠰᠠᠨ ᠢ ᠬᠡᠨ ᠴᠦ ᠮᠡᠳᠡᠳᠡᠭ ᠦᠭᠡᠢ᠂ ᠠᠷᠠᠳ ᠤᠳ ᠤᠯᠠᠨ ᠬᠠᠷ᠎ᠠ ᠣᠪᠣᠭ᠎ᠠ ᠯᠡ ᠬᠡᠲᠡᠭ ᠶᠤᠮ᠃             ᠣᠪᠣᠭ᠎ᠠ ᠪᠣᠰᠬᠠᠬᠤ ᠶᠣᠰᠣᠨ              ᠣᠪᠣᠭ᠎ᠠ ᠪᠣᠰᠬᠠᠬᠤ ᠳᠤ ᠣᠪᠣᠭᠠᠨ ᠤ ᠭᠠᠵᠠᠷ ᠢ ᠰᠣᠩᠭᠤᠬᠤ᠂ ᠣᠪᠣᠭᠠᠨ ᠤ ᠰᠠᠩ ᠳᠠᠷᠤᠬᠤ᠂ ᠣᠪᠣᠭ᠎ᠠ ᠪᠠᠷᠢᠵᠤ ᠪᠣᠰᠬᠠᠬᠤ ᠵᠡᠷᠭᠡ ᠶᠠᠪᠤᠴᠠ ᠶᠢ ᠥᠩᠭᠡᠷᠡᠭᠡᠨ᠎ᠡ᠃             ᠣᠪᠣᠭᠠᠨ ᠤ ᠭᠠᠵᠠᠷ ᠢ ᠰᠣᠩᠭᠤᠬᠤ              ᠣᠪᠣᠭ᠎ᠠ ᠪᠣᠰᠬᠠᠬᠤ ᠭᠠᠵᠠᠷ ᠢ ᠰᠢᠨᠵᠢᠨ ᠰᠣᠩᠭᠤᠬᠤ ᠪᠣᠯ ᠣᠪᠣᠭ᠎ᠠ ᠪᠣᠰᠬᠠᠬᠤ ᠶᠢᠨ ᠬᠠᠮᠤᠭ ᠤᠨ ᠠᠩᠬᠠᠨ ᠤ ᠭᠦᠢᠴᠡᠳᠬᠡᠬᠦ ᠦᠢᠯᠡ ᠶᠠᠪᠤᠳᠠᠯ ᠪᠣᠯᠣᠨ᠎ᠠ᠃             ᠠᠶᠢᠯ ᠤᠰᠤᠨ ᠤ ᠡᠩ ᠤᠨ ᠣᠪᠣᠭ᠎ᠠ ᠪᠣᠰᠬᠠᠬᠤ ᠳᠤ᠂ ᠬᠤᠲᠡ ᠤᠰᠤ ᠪᠠᠷ ᠢᠶᠠᠨ ᠬᠠᠮᠤᠭ ᠤᠨ ᠬᠦᠨᠳᠦᠲᠡᠢ ᠨᠠᠰᠤᠲᠠᠢ ᠲᠣᠮᠣᠭᠠᠲᠠᠢ ᠬᠥᠮᠥᠨ ᠢᠶᠠᠷ ᠢᠶᠠᠨ ᠪᠠᠶᠢᠭᠠᠯᠢ ᠶᠢᠨ ᠦᠵᠡᠮᠵᠢ ᠰᠠᠶᠢᠬᠠᠨ᠂ ᠭᠠᠵᠠᠷ ᠤᠰᠤᠨ ᠤ ᠰᠢᠨᠵᠢ ᠪᠡᠯᠭᠡ ᠲᠡᠭᠦᠰ ᠲᠤᠪᠤ ᠲᠣᠯᠣᠭᠠᠢ᠂ ᠠᠭᠤᠯᠠ ᠶᠢᠨ ᠣᠷᠣᠢ᠂ ᠪᠤᠯᠠᠭ ᠱᠠᠩᠳᠠ᠂ ᠨᠠᠭᠤᠷ ᠭᠤᠣᠯ ᠤᠨ ᠬᠦᠪᠡᠭᠡ᠂ ᠤᠢ ᠮᠣᠳᠣ᠂ ᠡᠯᠡᠰᠦ ᠮᠠᠩᠬ᠎ᠠ ᠶᠢᠨ ᠰᠠᠶᠢᠬᠠᠨ ᠭᠠᠵᠠᠷ ᠢ ᠦᠵᠡᠭᠦᠯᠵᠦ ᠰᠣᠩᠭᠤᠭᠰᠠᠨ ᠤ ᠲᠠᠷᠠᠭ᠎ᠠ ᠣᠪᠣᠭ᠎ᠠ ᠪᠠᠨ ᠪᠣᠰᠬᠠᠳᠠᠭ ᠶᠤᠮ᠃             ᠣᠪᠣᠭ ᠠᠶᠢᠮᠠᠭ ᠤᠨ ᠣᠪᠣᠭ᠎ᠠ ᠪᠣᠰᠬᠠᠬᠤ ᠳᠤ᠂ ᠡᠷᠲᠡ ᠦᠶ᠎ᠡ ᠳᠤ ᠪᠠᠨ ᠪᠦᠭᠡ ᠨᠠᠷ ᠤᠨ ᠮᠡᠷᠭᠡᠯᠡᠭᠰᠡᠨ ᠲᠡᠭᠷᠢ ᠨᠠᠷ ᠤᠨ ᠪᠠᠭᠤᠳᠠᠭ ᠪᠤᠶᠤ ᠭᠠᠵᠠᠷ ᠤᠰᠤᠨ ᠤ ᠤᠩᠭᠤ ᠨᠠᠪᠳᠠᠭ ᠰᠠᠪᠳᠠᠭ ᠪᠠᠭᠤᠳᠠᠭ ᠡᠰᠡᠬᠦᠯ᠎ᠡ ᠣᠷᠣᠩᠨᠠᠭᠰᠠᠨ ᠭᠠᠵᠠᠷ ᠬᠡᠮᠡᠭᠰᠡᠨ ᠠᠭᠤᠯᠠ ᠬᠠᠶᠢᠷᠬᠠᠨ ᠢ ᠰᠣᠩᠭᠤᠵᠤ᠂ ᠪᠦᠭᠡ ᠶᠢᠨ ᠢᠯᠳᠦ ᠪᠠ ᠲᠠᠶᠠᠭ ᠢᠶᠠᠷ ᠢᠶᠠᠨ ᠵᠢᠭᠠᠵᠤ ᠵᠢᠷᠤᠭᠰᠠᠨ ᠭᠠᠵᠠᠷ ᠲᠤ ᠨᠢ ᠣᠪᠣᠭ᠎ᠠ ᠪᠠᠨ ᠪᠣᠰᠬᠠᠨ᠎ᠠ᠃             ᠬᠤᠶᠠᠷ ᠬᠦᠷᠦᠨ ᠤ ᠬᠤᠭᠤᠷᠤᠨᠳᠤᠬᠢ ᠵᠠᠬ᠎ᠠ ᠬᠢᠯᠢ ᠶᠢᠨ ᠲᠡᠮᠳᠡᠭ ᠣᠪᠣᠭ᠎ᠠ ᠶᠢ ᠪᠣᠰᠬᠠᠬᠤ ᠳᠤ ᠤᠷᠢᠳ ᠢᠶᠠᠷ ᠬᠤᠶᠠᠷ ᠲᠠᠯ᠎ᠠ ᠶᠢᠨ ᠬᠢᠯᠢ ᠬᠢᠵᠠᠭᠠᠷ ᠢ ᠬᠠᠮᠢᠶᠠᠷᠬᠤ ᠭᠠᠵᠠᠷ ᠤᠨ ᠠᠯᠪᠠᠨ ᠲᠤᠰᠢᠶᠠᠯᠲᠠᠨ ᠰᠠᠶᠢᠲᠤᠷ ᠬᠡᠯᠡᠯᠴᠡᠨ ᠲᠣᠭᠲᠠᠵᠤ᠂ ᠠᠳᠠᠯᠢ ᠲᠣᠭᠠᠨ ᠤ ᠲᠦᠰᠢᠮᠡᠳ᠂ ᠬᠤᠶᠠᠭ ᠭᠠᠷᠭᠠᠵᠤ ᠬᠠᠮᠲᠤ ᠪᠠᠷ ᠬᠡᠮᠵᠢᠨ ᠪᠠᠶᠢᠴᠠᠭᠠᠵᠤ᠂ ᠣᠪᠣᠭ᠎ᠠ ᠪᠣᠰᠬᠠᠬᠤ ᠭᠠᠵᠠᠷ ᠤᠨ ᠢᠶᠠᠨ ᠬᠡᠮᠵᠢᠶ᠎ᠡ᠂ ᠣᠪᠣᠭᠠᠨ ᠤ ᠪᠠᠨ ᠲᠤᠭ᠎ᠠ᠂ ᠬᠠᠷᠠᠭᠤᠯ ᠥᠷᠲᠡᠭᠡᠨ ᠤ ᠪᠠᠨ ᠨᠡᠷᠡᠰ ᠵᠡᠷᠭᠡ ᠶᠠᠪᠤᠳᠠᠯ ᠢᠶᠠᠨ ᠬᠡᠯᠡᠯᠴᠡᠨ ᠲᠣᠭᠲᠠᠭᠰᠠᠨ ᠤ ᠲᠠᠷᠠᠭ᠎ᠠ ᠲᠣᠭᠲᠠᠭᠠᠭᠰᠠᠨ ᠡᠳᠦᠷ ᠰᠠᠷ᠎ᠠ ᠳᠤ ᠪᠠᠨ ᠵᠡᠷᠭᠡ ᠪᠠᠷ ᠣᠪᠣᠭ᠎ᠠ  ᠪᠠᠨ ᠪᠣᠰᠬᠠᠨ᠎ᠠ᠃             ᠬᠤᠰᠢᠭᠤ᠂ ᠴᠢᠭᠤᠯᠭᠠᠨ ᠤ ᠵᠠᠬ᠎ᠠ ᠬᠢᠯᠢ ᠶᠢᠨ ᠲᠡᠮᠳᠡᠭ ᠣᠪᠣᠭ᠎ᠠ ᠶᠢ ᠬᠤᠯᠪᠣᠭᠳᠠᠯ ᠪᠦᠬᠦᠢ ᠬᠤᠰᠢᠭᠤ ᠴᠢᠭᠤᠯᠭᠠᠨ ᠤ ᠨᠣᠶᠠᠳ ᠲᠦᠰᠢᠮᠡᠳ ᠬᠡᠯᠡᠯᠴᠡᠨ ᠲᠣᠭᠲᠠᠵᠤ᠂ ᠠᠳᠠᠯᠢ ᠲᠣᠭᠠᠨ ᠤ ᠲᠤᠰᠬᠠᠢ ᠠᠵᠢᠯ ᠤᠨ ᠮᠡᠷᠭᠡᠵᠢᠯ  ᠲᠠᠢ ᠬᠥᠮᠥᠰ ᠢ ᠲᠣᠮᠢᠯᠠᠨ ᠲᠣᠭᠲᠠᠭᠰᠠᠨ ᠭᠠᠵᠠᠷ ᠲᠤ ᠪᠠᠨ ᠣᠪᠣᠭ᠎ᠠ ᠪᠣᠰᠬᠠᠨ᠎ᠠ᠃              ᠵᠠᠬ᠎ᠠ ᠬᠢᠯᠢ ᠶᠢᠨ ᠲᠡᠮᠳᠡᠭ ᠣᠪᠣᠭ᠎ᠠ ᠨᠢ᠂ ᠲᠤᠰ ᠲᠤᠰ ᠤᠨ ᠭᠠᠵᠠᠷ ᠨᠤᠲᠤᠭ ᠤᠨ ᠲᠡᠮᠳᠡᠭ ᠪᠤᠯᠳᠠᠭ ᠲᠤᠯᠠ᠂ ᠠᠭᠤᠯᠠ ᠤᠰᠤᠨ ᠤ ᠪᠡᠯᠭᠡ ᠰᠢᠨᠵᠢ ᠶᠢ ᠳᠡᠮᠡᠢ ᠤᠪᠠᠶᠢᠯᠠᠬᠤ ᠦᠭᠡᠢ ᠪᠠᠷ ᠨᠤᠲᠤᠭ ᠤᠰᠤᠨ ᠤ ᠪᠠᠨ ᠵᠠᠬ᠎ᠠ ᠬᠦᠪᠡᠭᠡ  ᠶᠢ ᠳᠠᠭᠠᠭᠤᠯᠵᠤ ᠪᠣᠰᠬᠠᠳᠠᠭ ᠶᠤᠮ᠃             ᠳᠤᠷᠠᠰᠬᠠᠯ ᠤᠨ ᠣᠪᠣᠭᠠᠨ ᠤ ᠨᠡᠯᠢᠶᠡᠳ ᠨᠢ᠂ ᠲᠥᠯᠭᠡᠴᠢ ᠪᠠ ᠯᠠᠮᠠ ᠬᠤᠸᠠᠷᠠᠭ ᠤᠨ ᠰᠢᠨᠵᠢᠭᠰᠡᠨ ᠭᠠᠵᠠᠷ ᠴᠦ ᠪᠢᠰᠢ᠂ ᠨᠤᠲᠤᠭ ᠤᠨ ᠪᠤᠭᠤᠷᠤᠯᠴᠤᠳ ᠤᠨ ᠰᠣᠩᠭᠤᠭᠰᠠᠨ ᠣᠷᠣᠨ ᠴᠦ ᠪᠢᠰᠢ᠂ ᠲᠤᠬᠠᠢ ᠶᠢᠨ ᠭᠠᠵᠠᠷ ᠲᠤ ᠨᠢ ᠲᠡᠦᠬᠡᠨ ᠳᠤ ᠴᠢᠬᠤᠯᠠ ᠨᠢᠭᠡ ᠦᠢᠯᠡ ᠶᠠᠪᠤᠳᠠᠯ ᠦᠨᠡᠨ ᠬᠦ ᠪᠤᠢ ᠪᠣᠯᠵᠤ ᠥᠩᠭᠡᠷᠡᠭᠰᠡᠨ ᠯᠡ ᠶᠤᠮ ᠪᠣᠯ ᠲᠡᠷᠡ ᠭᠠᠵᠠᠷ  ᠲᠤ ᠨᠢ ᠳᠤᠷᠠᠰᠬᠠᠯ ᠤᠨ ᠣᠪᠣᠭ᠎ᠠ ᠪᠣᠰᠬᠠᠳᠠᠭ ᠶᠤᠮ᠃             ᠬᠠᠷᠢᠶᠠᠯ ᠤᠨ ᠣᠪᠣᠭ᠎ᠠ ᠪᠣᠯ ᠵᠦᠬᠡᠵᠦ ᠵᠠᠨᠤᠭᠰᠠᠨ ᠡᠲᠡᠭᠡᠳ ᠲᠤ ᠪᠠᠨ ᠠᠯᠢ ᠮᠠᠭᠤ ᠰᠢᠨᠵᠢ ᠲᠠᠢ ᠭᠠᠵᠠᠷ ᠢ ᠰᠣᠩᠭᠤᠵᠤ ᠪᠣᠰᠬᠠᠨ᠎ᠠ᠃             ᠰᠢᠯᠢ ᠶᠢᠨ ᠰᠠᠶᠢᠨ ᠡᠷᠡᠰ ᠤᠨ ᠣᠪᠣᠭ᠎ᠠ ᠨᠢ ᠴᠦ ᠪᠤᠷᠤᠭᠤ᠂ ᠬᠠᠵᠠᠭᠤ᠂ ᠲᠡᠯᠲᠡ ᠭᠠᠵᠠᠷ ᠢ ᠰᠣᠩᠭᠤᠵᠤ ᠪᠣᠰᠬᠠᠳᠠᠭ ᠶᠤᠮ᠃             ᠵᠢᠷᠤᠬᠠᠶᠢᠴᠢ ᠶᠢᠨ ᠵᠠᠷᠢᠮ ᠣᠪᠣᠭ᠎ᠠ ᠨᠢ ᠵᠢᠷᠤᠬᠠᠶᠢᠴᠢ ᠥᠪᠡᠷ ᠢᠶᠠᠨ ᠨᠠᠷᠡ᠂ ᠰᠠᠯᠬᠢᠨ᠂ ᠪᠣᠷᠣᠭᠠᠨ᠂ ᠤᠳᠤᠨ ᠭᠠᠷᠠᠭ ᠢ ᠰᠢᠨᠵᠢᠬᠦ ᠳᠤ ᠪᠣᠯᠤᠮᠠᠷ ᠬᠡᠮᠡᠭᠰᠡᠨ ᠭᠠᠵᠠᠷ ᠲᠤ ᠪᠠᠨ ᠣᠪᠣᠭ᠎ᠠ ᠪᠣᠰᠬᠠᠨ ᠰᠢᠨᠵᠢᠵᠦ ᠪᠠᠶᠢᠵᠠᠢ᠃             ᠲᠠᠩᠭᠠᠷᠢᠭ ᠣᠪᠣᠭ᠎ᠠ ᠨᠢ ᠬᠠᠮᠢᠭ᠎ᠠ ᠶᠠᠮᠠᠷ ᠨᠢᠭᠡᠨ ᠤᠴᠢᠷ ᠢᠶᠠᠷ ᠠᠨᠳᠠᠭᠠᠶᠢᠯᠠᠵᠤ ᠲᠠᠩᠭᠠᠷᠢᠭᠯᠠᠭᠰᠠᠨ ᠶᠤᠮ ᠪᠣᠯ ᠮᠥᠨ ᠯᠡ ᠲᠡᠷᠡ ᠭᠠᠵᠠᠷ ᠲᠤ ᠪᠠᠨ ᠣᠪᠣᠭ᠎ᠠ ᠪᠣᠰᠬᠠᠨ᠎ᠠ᠃             ᠣᠪᠣᠭᠠᠨ ᠰᠠᠩ ᠳᠠᠷᠤᠬᠤ              ᠣᠪᠣᠭ᠎ᠠ ᠪᠣᠰᠬᠠᠬᠤ ᠶᠢᠨ ᠤᠷᠢᠳ ᠰᠠᠩ ᠳᠠᠷᠤᠬᠤ ᠶᠠᠪᠤᠳᠠᠯ ᠢ ᠭᠦᠢᠴᠡᠳᠬᠡᠨ᠎ᠡ᠃ ᠰᠠᠩ ᠳᠠᠷᠤᠬᠤ ᠶᠢ ︽ᠱᠦᠩᠰᠢᠭ ᠳᠠᠷᠤᠬᠤ᠂ ᠷᠠᠮᠠᠨᠠᠶᠢᠯᠠᠬᠤ᠂ ᠪᠣᠮᠪᠤ ᠳᠠᠷᠤᠬᠤ︾ ᠭᠡᠬᠦ ᠮᠡᠲᠦ ᠪᠠᠷ ᠭᠠᠵᠠᠷ ᠭᠠᠵᠠᠷ ᠠᠳᠠᠯᠢ ᠦᠭᠡᠢ ᠨᠡᠷᠡᠯᠡᠳᠡᠭ᠃ ᠣᠪᠣᠭᠠᠨ ᠰᠠᠩ ᠳᠠᠷᠤᠬᠤ ᠳᠤ ᠭᠠᠵᠠᠷ ᠤᠨ ᠳᠡᠭᠡᠷ᠎ᠡ ᠰᠠᠩ ᠳᠠᠷᠤᠬᠤ᠂ ᠭᠠᠵᠠᠷ ᠤᠨ ᠳᠣᠣᠷ᠎ᠠ ᠰᠠᠩ ᠳᠠᠷᠤᠬᠤ ᠭᠡᠵᠦ ᠬᠤᠶᠠᠷ ᠵᠦᠢᠯ ᠪᠠᠶᠢᠳᠠᠭ ᠶᠤᠮ᠃ ᠭᠠᠵᠠᠷ ᠳᠡᠭᠡᠷ᠎ᠡ ᠰᠠᠩ ᠳᠠᠷᠤᠬᠤ ᠳᠤ ᠪᠠᠨ ᠠᠶᠢᠯ ᠤᠰᠤᠨ ᠤ ᠪᠠᠭ᠎ᠠ ᠰᠢᠭ᠋ ᠣᠪᠣᠭ᠎ᠠ ᠪᠤᠶᠤ ᠵᠠᠷᠢᠮ ᠰᠤᠮᠤᠨ ᠤ ᠣᠪᠣᠭ᠎ᠠ ᠪᠠᠨ ᠯᠠᠮᠠ ᠪᠠᠷ ᠲᠠᠷᠨᠢᠳᠠᠭᠤᠯᠤᠭᠰᠠᠨ ᠲᠠᠪᠤᠨ ᠲᠠᠷᠢᠶᠠᠨ ᠦᠷ᠎ᠡ᠂ ᠮᠠᠯ ᠤᠨ ᠬᠡᠰᠢᠭ᠂ ᠮᠠᠨᠢ ᠶᠢᠨ ᠦᠰᠦᠭ ᠲᠠᠢ ᠳᠠᠷᠴᠤᠭ ᠵᠡᠷᠭᠡ ᠶᠢ ᠴᠢᠯᠠᠭᠤᠨ ᠳᠤᠮᠳᠠ ᠪᠠᠨ ᠲᠠᠯᠪᠢᠴᠢᠬᠠᠭᠠᠳ ᠣᠪᠣᠭ᠎ᠠ ᠪᠠᠨ ᠪᠣᠰᠬᠠᠳᠠᠭ ᠪᠠᠶᠢᠵᠠᠢ᠃ ᠭᠠᠵᠠᠷ ᠳᠣᠣᠷ᠎ᠠ ᠰᠠᠩ ᠳᠠᠷᠤᠬᠤ ᠬᠡᠲᠡᠭ ᠨᠢ ᠣᠪᠣᠭ᠎ᠠ ᠪᠣᠰᠬᠠᠬᠤ ᠭᠠᠵᠠᠷ ᠤᠨ ᠢᠶᠠᠨ ᠶᠠᠭ ᠭᠤᠣᠯ ᠳᠤᠮᠳᠠ  ᠳᠤ ᠨᠢ ᠪᠠᠭ᠎ᠠ ᠨᠦᠬᠡ ᠮᠠᠯᠲᠠᠵᠤ ᠱᠠᠭᠠᠵᠠᠩ ᠯᠣᠩᠬᠤᠨ ᠳᠣᠲᠣᠷ᠎ᠠ ᠠᠯᠳᠠ᠂ ᠮᠥᠩᠭᠦ᠂ ᠱᠢᠷᠦ᠂ ᠰᠤᠪᠤᠳ᠂ ᠣᠭ᠍ᠶᠤ᠂ ᠬᠠᠰ᠂ ᠲᠠᠪᠤᠨ ᠲᠠᠷᠢᠶᠠᠨ ᠤ ᠦᠷ᠎ᠡ᠂ ᠲᠠᠪᠤᠨ ᠬᠤᠰᠢᠭᠤ ᠮᠠᠯ ᠤᠨ ᠲᠡᠯ᠂ ᠰᠡᠭᠦᠯ ᠤᠨ ᠬᠡᠰᠡᠭ ᠬᠢᠵᠦ ᠰᠠᠪᠠᠯᠠᠭᠠᠳ ᠠᠮᠠᠰᠠᠷ ᠢ   ᠨᠢ ᠲᠣᠷᠭᠠᠨ ᠬᠠᠳᠠᠭ ᠢᠶᠠᠷ ᠪᠢᠲᠡᠭᠦᠮᠵᠢᠯᠡᠨ ᠪᠣᠭᠤᠵᠤ᠂ ᠳᠡᠭᠡᠷ᠎ᠡ ᠨᠢ ᠮᠠᠨᠢ ᠶᠢᠨ ᠵᠢᠷᠭᠤᠭᠠᠨ ᠦᠰᠦᠭ ᠲᠠᠢ ᠴᠠᠭᠠᠰᠤ ᠪᠤᠶᠤ ᠲᠣᠷᠭ᠎ᠠ ᠲᠠᠯᠪᠢᠨ ᠳᠠᠷᠤᠵᠤ᠂ ᠳᠡᠭᠡᠷ᠎ᠡ ᠨᠢ ᠣᠪᠣᠭ᠎ᠠ ᠪᠠᠨ ᠪᠣᠰᠬᠠᠨ᠎ᠠ᠃             ᠣᠪᠣᠭ᠎ᠠ ᠪᠠᠷᠢᠵᠤ ᠪᠣᠰᠬᠠᠬᠤ              ᠪᠢ ᠠᠲᠡ ᠭᠠᠭᠴᠠ ᠬᠦ ᠴᠢᠯᠠᠭᠤᠨ ᠣᠪᠣᠭ᠎ᠠ ᠪᠣᠰᠬᠠᠬᠤ ᠪᠠᠷ ᠵᠢᠱᠢᠶᠡᠯᠡᠵᠦ ᠶᠠᠷᠢᠶ᠎ᠠ᠃ ᠣᠪᠣᠭᠠᠨ ᠰᠠᠩ ᠳᠠᠷᠤᠬᠤ ᠵᠠᠩ ᠦᠢᠯᠡ ᠪᠠᠨ ᠭᠦᠢᠴᠡᠳᠬᠡᠪᠡᠯ ᠣᠪᠣᠭ᠎ᠠ ᠪᠣᠰᠬᠠᠬᠤ ᠠᠵᠢᠯ ᠵᠠᠯᠭᠠᠨ᠎ᠠ᠃ ᠰᠠᠩ ᠪᠦᠲᠦᠭᠡᠭᠰᠡᠨ ᠭᠠᠵᠠᠷ  ᠢᠶᠠᠨ ᠰᠠᠶᠢᠬᠠᠨ ᠲᠡᠭᠰᠢᠯᠡᠵᠦ ᠴᠢᠯᠠᠭᠤ ᠪᠠᠷ ᠵᠢᠷᠭᠤᠭ᠎ᠠ ᠪᠤᠶᠤ ᠨᠠᠢᠮᠠᠨ ᠬᠠᠨ᠎ᠠ ᠲᠠᠢ ᠮᠣᠩᠭᠤᠯ ᠭᠡᠷ ᠤᠨ ᠪᠠᠭᠤᠨ ᠤ ᠬᠢᠷᠢ ᠲᠥᠭᠦᠷᠢᠭ ᠢᠶᠠᠷ ᠣᠪᠣᠭᠠᠨ ᠰᠠᠭᠤᠷᠢ ᠶᠢᠨ ᠴᠢᠯᠠᠭᠤ ᠪᠠᠨ ᠲᠠᠯᠪᠢᠭᠠᠳ ᠲᠡᠭ ᠭᠤᠣᠯ ᠳᠤ ᠨᠢ ᠲᠤᠭ ᠤᠨ ᠮᠣᠳᠣ ︵ᠭᠤᠣᠯ ᠮᠣᠳᠣ᠂ ᠭᠠᠨᠵᠢᠷ᠎ᠠ ᠶᠢᠨ ᠡᠰᠢ᠂ ᠰᠦᠯᠳᠡ ᠶᠢᠨ ᠰᠢᠯᠪᠢ᠂ ᠣᠪᠣᠭᠠᠨ ᠮᠣᠳᠣ︶ ᠪᠠᠨ ᠴᠢᠯᠠᠭᠤ ᠰᠢᠷᠣᠢ ᠪᠠᠷ ᠲᠣᠭᠲᠠᠭᠠᠵᠤ᠂ ᠰᠠᠭᠤᠷᠢ ᠶᠢᠨ ᠴᠢᠯᠠᠭᠤ ᠪᠠᠨ ᠵᠡᠷᠭᠡᠯᠡᠨ᠎ᠡ᠃ ᠪᠠᠶᠢᠳᠠᠯ ᠢ ᠦᠵᠡᠨ ᠶᠡᠭᠡ ᠪᠠᠭ᠎ᠠ ᠶᠢ ᠨᠢ ᠲᠣᠬᠢᠷᠠᠭᠤᠯᠤᠨ ᠭᠤᠷᠪᠠᠨ ᠳᠡᠭᠲᠡᠷ ᠴᠢᠯᠠᠭᠤ ᠣᠪᠣᠭᠠᠯᠠᠵᠤ᠂ ᠳᠡᠭᠡᠷ᠎ᠡ ᠨᠢ ᠠᠷᠴᠠ ᠮᠣᠳᠣ ᠪᠠᠷ ᠲᠤᠭ ᠤᠨ ᠣᠷᠣᠢ ᠶᠢ ᠨᠢ ᠢᠯᠡ ᠭᠠᠷᠭᠠᠨ ᠰᠢᠪᠡᠭᠡᠯᠡᠨ᠎ᠡ᠃ ᠣᠪᠣᠭᠠᠨ ᠤ ᠨᠡᠶᠢᠲᠡ ᠥᠨᠳᠥᠷ ᠨᠢ ᠶᠢᠰᠦᠨ ᠲᠣᠬᠤᠢ ᠪᠤᠶᠤ ᠠᠷᠪᠠᠨ ᠭᠤᠷᠪᠠᠨ ᠲᠣᠬᠤᠢ ᠪᠣᠯ ᠪᠣᠯᠴᠢᠬᠠᠨ᠎ᠠ᠃ ᠭᠡᠬᠦ ᠳᠤ ᠪᠠᠨ ᠣᠳᠣᠬᠠᠨ ᠤ ᠣᠪᠣᠭ᠎ᠠ ᠶᠢᠨ ᠬᠡᠳᠦᠢ ᠶᠡᠭᠡ᠂ ᠬᠡᠳᠦᠢ ᠥᠨᠳᠥᠷ ᠪᠣᠰᠬᠠᠬᠤ ᠨᠢ ᠲᠣᠭᠲᠠᠭᠰᠠᠨ ᠳᠦᠷᠢᠮ ᠳᠤ ᠪᠠᠷᠢᠭᠳᠠᠬᠤ ᠪᠠᠨ ᠪᠣᠯᠢᠵᠠᠢ᠃             ᠣᠪᠣᠭ᠎ᠠ ᠲᠠᠬᠢᠬᠤ ᠶᠣᠰᠣᠨ              ᠮᠣᠩᠭᠤᠯᠴᠤᠳ ᠤᠨ ᠡᠪᠦᠭᠡ ᠳᠡᠭᠡᠳᠦᠰ ᠡᠷᠲᠡ ᠢᠵᠠᠭᠤᠷ ᠠᠴᠠ ᠣᠪᠣᠭ᠎ᠠ ᠲᠠᠬᠢᠵᠦ ᠪᠠᠶᠢᠭᠰᠠᠨ ᠶᠤᠮ᠃ ᠡᠶᠢᠮᠦ ᠠᠴᠠ ᠮᠣᠩᠭᠤᠯᠴᠤᠳ ᠤᠨ ᠣᠪᠣᠭᠠᠨ ᠳᠠᠬᠢᠯᠭᠠᠨ ᠳᠤ᠂ ᠪᠦᠭᠡ ᠮᠥᠷᠭᠦᠯ ᠤᠨ ᠪᠠ ᠯᠠᠮᠠ ᠶᠢᠨ ᠱᠠᠰᠢᠨ ᠤ ᠵᠠᠩ ᠦᠢᠯᠡ ᠪᠣᠯᠣᠨ ᠠᠷᠠᠳ ᠤᠳ ᠤᠨ ᠥᠪᠡᠷ ᠤᠨ ᠬᠢᠨᠢ ᠳᠦᠷᠢᠮ ᠶᠣᠰᠣ ᠠᠯᠢᠨ ᠴᠦ ᠪᠠᠶᠢᠳᠠᠭ ᠶᠤᠮ᠃ ᠪᠢ ᠠᠲᠡ ᠤᠯᠠᠨ ᠵᠦᠢᠯ ᠤᠨ ᠣᠪᠣᠭᠠᠨ ᠲᠠᠬᠢᠯᠭ᠎ᠠ ᠠᠴᠠ ᠬᠤᠰᠢᠭᠤ ᠲᠠᠬᠢᠬᠤ ᠶᠣᠰᠣᠨ ᠢᠶᠠᠷ ᠵᠢᠱᠢᠶ᠎ᠡ ᠪᠤᠯᠭᠠᠵᠦ ᠶᠠᠷᠢᠶ᠎ᠠ᠃             ᠣᠯᠠᠩᠬᠢ ᠬᠤᠰᠢᠭᠤ ᠨᠤᠲᠤᠭ ᠤᠨ ᠬᠢᠨ ᠪᠢᠯᠢᠭ ᠤᠨ ᠤᠯᠠᠷᠢᠯ ᠤᠨ ᠲᠠᠪᠤᠨ ᠰᠠᠷ᠎ᠠ ᠶᠢᠨ ᠠᠷᠪᠠᠨ ᠭᠤᠷᠪᠠᠨ ᠢ ᠣᠪᠣᠭ᠎ᠠ ᠲᠠᠬᠢᠬᠤ ᠡᠳᠦᠷ ᠪᠤᠯᠭᠠᠭᠰᠡᠨ ᠨᠢ ᠵᠢᠷᠤᠬᠠᠢ ᠳᠤ ᠡᠨᠡ ᠡᠳᠦᠷ ᠣᠪᠣᠭ᠎ᠠ ᠲᠠᠬᠢᠪᠡᠯ ᠭᠠᠵᠠᠷ ᠯᠤᠤᠰ ᠪᠠᠶᠠᠰᠴᠤ ᠬᠡᠰᠢᠭ ᠪᠤᠶᠠᠨ ᠦᠯᠡᠮᠵᠢ ᠬᠡᠮᠡᠭᠰᠡᠨ ᠭᠡᠨ᠎ᠡ᠃ ᠣᠪᠣᠭ᠎ᠠ ᠲᠠᠬᠢᠬᠤ ᠶᠢᠨ ᠡᠮᠦᠨ᠎ᠡ ᠣᠪᠣᠭ᠎ᠠ ᠪᠠᠨ ᠰᠢᠨᠡᠳᠬᠡᠨ ᠰᠡᠷᠭᠦᠭᠡᠵᠦ᠂ ᠠᠷᠴᠠ ᠮᠣᠳᠣ ᠠᠪᠴᠢᠷᠠᠨ ᠰᠢᠨ᠎ᠡ ᠪᠠᠷ ᠰᠢᠪᠡᠭᠡᠯᠡᠨ ᠬᠡᠢ ᠮᠣᠷᠢ ᠳᠠᠷᠴᠤᠭ ᠢᠶᠠᠨ ᠰᠣᠯᠢᠵᠤ ᠰᠢᠨ᠎ᠡ ᠶᠢ ᠬᠡᠶᠢᠰᠬᠡᠨ᠎ᠡ᠃             ᠣᠪᠣᠭ᠎ᠠ ᠲᠠᠬᠢᠬᠤ ᠡᠳᠦᠷ ᠤᠨ ᠥᠷᠯᠥᠭᠡ᠂ ᠣᠪᠣᠭ᠎ᠠ ᠲᠠᠬᠢᠯᠭ᠎ᠠ ᠶᠢᠨ ᠡᠵᠡᠳ ᠪᠣᠯᠣᠨ ᠰᠠᠩ ᠤᠨ ᠯᠠᠮᠠ ᠨᠠᠷ ᠤᠷᠭᠤᠬᠤ ᠨᠠᠷᠡᠨ ᠠᠴᠠ ᠡᠮᠦᠨ᠎ᠡ ᠣᠪᠣᠭᠠᠨ ᠤ ᠪᠠᠷᠠᠭᠤᠨ ᠲᠠᠯ᠎ᠠ ᠪᠤᠶᠤ ᠠᠷᠤ ᠲᠠᠯ᠎ᠠ ᠠᠴᠠ ᠭᠠᠷᠴᠤ ᠵᠠᠯᠪᠠᠷᠢᠨ ᠨᠠᠷᠡᠨ ᠵᠥᠪ ᠢᠶᠠᠷ ᠨᠢᠭᠡ ᠡᠷᠭᠢᠳᠡᠭ ᠶᠤᠮ᠃ ᠢᠩᠭᠢᠭᠡᠳ ᠣᠪᠣᠭᠠᠨ ᠤ ᠳᠡᠭᠡᠵᠢ ᠡᠷᠭᠦᠳᠡᠭ ᠲᠠᠯᠪᠢᠭᠤᠷ ᠴᠢᠯᠠᠭᠤ ᠪᠤᠶᠤ ᠡᠰᠡᠬᠦᠯ᠎ᠡ ᠲᠤᠰᠬᠠᠢ ᠠᠪᠴᠢᠷᠠᠵᠤ ᠲᠠᠯᠪᠢᠭᠰᠠᠨ ᠰᠢᠷᠡᠭᠡᠨ ᠳᠡᠭᠡᠷ᠎ᠡ᠂ ᠬᠤᠰᠢᠭᠤᠨ ᠤ ᠵᠠᠰᠠᠭ ᠤᠨ ᠭᠠᠵᠠᠷ ᠠᠴᠠ ᠪᠡᠯᠡᠳᠬᠡᠭᠰᠡᠨ ᠬᠤᠶᠠᠷ ᠠᠴᠠ ᠨᠠᠢᠮᠠᠨ ᠥᠳᠬᠡ ᠪᠠᠨ ᠲᠠᠯᠪᠢᠵᠤ᠂ ᠡᠭᠦᠨ ᠤ ᠬᠤᠶᠠᠷ ᠲᠠᠯ᠎ᠠ ᠪᠠᠷ ᠠᠷᠠᠳ ᠤᠯᠠᠨ ᠤ ᠡᠷᠭᠦᠭᠰᠡᠨ ᠴᠠᠭᠠᠨ ᠢᠲᠡᠭᠡ᠂ ᠪᠣᠣᠪᠤ ᠪᠤᠭᠤᠷᠰᠤᠭ᠂ ᠲᠣᠰᠣ ᠬᠤᠷᠤᠳ᠂ ᠠᠷᠢᠬᠢ ᠲᠡᠷᠡᠰᠦ᠂ ᠴᠢᠪᠠᠭ᠎ᠠ᠂ ᠦᠵᠦᠮ᠂ ᠰᠢᠬᠢᠷ ᠪᠤᠷᠠᠮ᠂ ᠴᠠᠢ ᠵᠡᠷᠭᠡ ᠤᠯᠠᠭᠠᠨ᠂ ᠴᠠᠭᠠᠨ ᠢᠲᠡᠭᠡᠨ ᠢ ᠦᠷᠦᠵᠦ ᠲᠠᠯᠪᠢᠭᠰᠠᠨ ᠤ ᠲᠠᠷᠠᠭ᠎ᠠ᠂ ᠯᠠᠮᠠ ᠨᠠᠷ ᠠᠷᠴᠠ ᠬᠦᠵᠢᠰ ᠰᠢᠲᠠᠭᠠᠵᠤ ᠠᠷᠢᠭᠤᠳᠬᠠᠯ ᠤᠨ ᠰᠠᠩ ᠤᠩᠰᠢᠵᠤ᠂ ᠡᠷᠭᠦᠭᠰᠡᠨ ᠠᠯᠢᠪᠠ ᠳᠡᠭᠡᠵᠢ ᠪᠠᠨ ᠠᠷᠢᠭᠤᠳᠬᠠᠵᠤ᠂ ᠭᠠᠵᠠᠷ ᠭᠠᠵᠠᠷ  ᠤᠨ ᠪᠠᠶᠢᠳᠠᠯ᠂ ᠬᠤᠰᠢᠭᠤ ᠬᠤᠰᠢᠭᠤᠨ ᠤ ᠪᠠᠨ ᠰᠢᠲᠦᠭᠰᠡᠨ ᠣᠪᠣᠭᠠᠨ ᠤ ᠰᠠᠬᠢᠭᠤᠯᠰᠤᠨ ᠤ ᠰᠠᠩ ᠢᠶᠠᠨ ᠤᠩᠰᠢᠳᠠᠭ ᠶᠤᠮ᠃ ᠯᠠᠮᠠ ᠨᠠᠷ ᠨᠣᠮ ᠢᠶᠠᠨ ᠤᠩᠰᠢᠵᠤ ᠪᠠᠶᠢᠭᠠᠳ ᠲᠤᠩ ᠲᠠᠲᠠᠬᠤ᠂ ᠬᠤᠩᠬᠤ ᠳᠠᠮᠠᠷᠤ ᠳᠤᠤᠭᠠᠷᠭᠠᠬᠤ᠂ ᠭᠡᠩᠬᠡᠷᠡᠭᠡ ᠴᠠᠩ ᠳᠡᠯᠡᠳᠴᠦ᠂ ᠪᠦᠷᠢᠶ᠎ᠡ ᠪᠢᠰᠬᠢᠭᠦᠷ ᠦᠯᠢᠶᠡᠬᠦ ᠳᠤ ᠵᠡᠷᠭᠡ ᠬᠡᠷᠬᠡᠮ ᠤᠨ ᠢᠯᠭᠠᠯ ᠦᠭᠡᠢ ᠬᠠᠷ᠎ᠠ ᠰᠢᠷ᠎ᠠ ᠤᠯᠠᠨ ᠳᠠᠶᠠᠭᠠᠷ ᠣᠪᠣᠭᠠᠨ ᠵᠦᠭ ᠬᠠᠨᠳᠤᠵᠤ ᠬᠤᠷᠮᠣᠢ ᠪᠠᠨ ᠳᠡᠪᠢᠰᠴᠦ ᠨᠠᠮᠠᠨᠴᠢᠯᠠᠨ ᠭᠤᠷᠪᠠ ᠭᠤᠷᠪᠠ ᠶᠢᠰᠦᠨᠲᠡ ᠮᠥᠷᠭᠦᠵᠡᠭᠡᠨ᠎ᠡ᠃ ᠡᠭᠦᠨ ᠤ ᠲᠠᠷᠠᠭ᠎ᠠ᠂ ᠯᠠᠮᠠ ᠨᠠᠷ ᠣᠪᠣᠭᠠᠨ ᠰᠠᠴᠤᠯᠢ ᠶᠢᠨ ᠰᠠᠩ ᠤᠩᠰᠢᠬᠤ ᠳᠤ᠂ ᠲᠤᠰ ᠤᠳᠠᠭ᠎ᠠ  ᠶᠢᠨ ᠣᠪᠣᠭᠠᠨ ᠲᠠᠯᠠᠯᠭᠠᠨ ᠰᠤᠮᠤ ᠶᠢ ᠪᠠᠷᠢᠵᠤ ᠬᠤᠷᠤᠶᠢᠯᠠᠬᠤ ᠬᠥᠮᠥᠨ ᠮᠠᠩᠯᠠᠶᠢᠯᠠᠨ᠂ ᠤᠯᠠᠨ ᠢᠶᠠᠷ ᠢᠶᠠᠨ ᠲᠠᠭᠠᠵᠦ ᠣᠪᠣᠭ᠎ᠠ ᠪᠠᠨ ᠭᠤᠷᠪᠠ ᠡᠷᠭᠢᠵᠦ ᠰᠠᠴᠤᠯᠢ ᠡᠷᠭᠦᠵᠦ ᠲᠡᠭᠦᠰᠬᠦ ᠦᠶ᠎ᠡ ᠳᠤ᠂ ᠬᠤᠪᠢ ᠬᠤᠪᠢ ᠪᠠᠷ ᠢᠶᠠᠨ ᠡᠷᠭᠦᠬᠦ ᠬᠠᠳᠠᠭ ᠨᠢᠨᠳᠠᠷ ᠢᠶᠠᠨ ᠣᠪᠣᠭᠠᠨ ᠤ ᠲᠤᠭ ᠮᠣᠳᠣ᠂ ᠵᠠᠬ᠎ᠠ ᠬᠡᠢ ᠮᠣᠷᠢ᠂ ᠪᠤᠷᠭᠠᠰᠤ ᠵᠡᠷᠭᠡ ᠠᠴᠠ ᠵᠡᠭᠦᠵᠦ᠂ ᠲᠤᠰ ᠲᠤᠰ  ᠢᠶᠠᠷ ᠢᠶᠠᠨ ᠵᠠᠯᠪᠠᠷᠢᠨ ᠥᠪᠡᠷ ᠥᠪᠡᠷ ᠤᠨ ᠬᠦᠰᠡᠯ ᠢᠶᠠᠨ ᠳᠠᠭᠠᠳᠬᠠᠨ᠎ᠠ᠃ ᠡᠭᠦᠨ ᠤ ᠵᠡᠷᠭᠡᠴᠡᠭᠡ ᠪᠠᠷ ᠣᠪᠣᠭᠠᠨ ᠳᠤ ᠰᠡᠲᠡᠷᠯᠡᠬᠦ ᠮᠣᠷᠢᠳ ᠢᠶᠠᠨ ᠰᠡᠲᠡᠷᠯᠡᠨ᠎ᠡ᠃ ᠶᠡᠷᠦ ᠳᠤ ᠪᠠᠨ ᠰᠠᠭᠠᠷᠠᠯ ᠮᠣᠷᠢ᠂ ᠰᠠᠭᠠᠷᠠᠯ ᠠᠵᠢᠷᠭ᠎ᠠ ᠰᠡᠲᠡᠷᠯᠡᠳᠡᠭ ᠶᠤᠮ᠃              ᠮᠣᠷᠢᠳ ᠢᠶᠠᠨ ᠰᠡᠲᠡᠷᠯᠡᠭᠰᠡᠨ ᠤ ᠲᠠᠷᠠᠭ᠎ᠠ᠂ ᠣᠪᠣᠭ᠎ᠠ ᠶᠢ ᠭᠤᠣᠯᠯᠠᠨ ᠲᠠᠬᠢᠬᠴᠢ ᠪᠠᠷᠠᠭᠤᠨ ᠭᠠᠷ ᠲᠤ ᠪᠠᠨ ᠲᠠᠪᠤᠨ ᠥᠩᠭᠡ ᠶᠢᠨ ᠭᠬᠢᠪ ᠢᠶᠠᠷ ᠣᠷᠢᠶᠠᠭᠰᠠᠨ ᠲᠠᠯᠠᠯᠭᠠᠨ ᠰᠤᠮᠤ ᠪᠠᠷᠢᠵᠤ᠂ ᠣᠪᠣᠭᠠᠨ ᠡᠮᠦᠨ᠎ᠡ ᠠᠴᠠ ᠡᠬᠢᠯᠡᠨ ᠰᠤᠮᠤ  ᠪᠠᠷ ᠢᠶᠠᠨ ᠬᠤᠷᠤᠶᠢᠯᠠᠵᠤ ᠳᠠᠶᠠᠭᠠᠷ ᠢ ᠳᠠᠭᠠᠭᠤᠯᠵᠤ᠂ ᠣᠪᠣᠭ᠎ᠠ ᠪᠠᠨ ᠭᠤᠷᠪᠠ ᠡᠷᠭᠢᠵᠦ ᠳᠠᠯᠠᠯᠳᠠᠭ ᠶᠤᠮ᠃             ᠲᠠᠯᠠᠯᠭ᠎ᠠ ᠲᠡᠭᠦᠰᠪᠡᠯ ᠣᠪᠣᠭ᠎ᠠ ᠲᠠᠬᠢᠬᠤ ᠶᠣᠰᠣ ᠲᠡᠭᠦᠰᠴᠢᠬᠡᠬᠦ ᠪᠣᠯᠣᠨ᠎ᠠ᠃ ᠲᠠᠯᠠᠯᠭ᠎ᠠ ᠲᠡᠭᠦᠰᠦᠭᠰᠡᠨ ᠤ ᠲᠠᠷᠠᠭ᠎ᠠ ᠣᠪᠣᠭᠠᠨ ᠤ ᠳᠡᠭᠡᠵᠢ ᠪᠠᠨ ᠲᠡᠭᠡᠭᠰᠢᠯᠡᠭᠦᠯᠵᠦ᠂ ᠣᠪᠣᠭᠠᠨ ᠳᠤ ᠪᠠᠨ ᠬᠤᠨᠢᠨ ᠲᠣᠯᠣᠭᠠᠢ᠂ ᠤᠭᠤᠷᠠᠭ ᠰᠡᠭᠦᠯ᠂ ᠬᠠ ᠮᠥᠴᠢ᠂ ᠰᠠᠷᠬᠤᠳ ᠴᠠᠭᠠᠨ ᠢᠲᠡᠭᠡᠨ ᠤ ᠳᠡᠭᠡᠵᠢ᠂ ᠪᠤᠭᠤᠷᠰᠤᠭ ᠵᠢᠮᠢᠰ ᠠᠴᠠ ᠦᠯᠡᠳᠡᠭᠡᠵᠦ ᠲᠠᠯᠪᠢᠭᠠᠳ᠂ ᠨᠠᠶᠢᠷ  ᠤᠨ ᠲᠠᠯᠠᠪᠠᠢ ᠶᠢᠨ ᠠᠵᠢᠯ ᠡᠬᠢᠯᠡᠵᠦ᠂ ᠡᠷ᠎ᠡ ᠶᠢᠨ ᠭᠤᠷᠪᠠᠨ ᠨᠠᠭᠠᠳᠤᠮ ᠤᠨ ᠤᠷᠤᠯᠳᠤᠭᠠᠨ ᠶᠠᠪᠤᠭᠳᠠᠭᠤᠯᠤᠨ᠎ᠠ᠃             ᠣᠪᠣᠭᠠᠨ ᠤ ᠴᠡᠭᠡᠷ              ᠬᠠᠷᠢᠶᠠᠯ ᠤᠨ ᠣᠪᠣᠭ᠎ᠠ᠂ ᠲᠠᠩᠭᠠᠷᠢᠭ ᠣᠪᠣᠭ᠎ᠠ᠂ ᠪᠡᠯᠪᠡᠰᠦᠷᠡᠯ ᠤᠨ ᠣᠪᠣᠭᠠᠨ ᠳᠤ ᠴᠢᠯᠠᠭᠤ ᠨᠡᠮᠡᠳᠡᠭ ᠦᠭᠡᠢ᠃ ᠬᠦᠷᠦᠨ ᠤᠯᠤᠰ ᠤᠨ ᠬᠤᠭᠤᠷᠣᠨᠳᠤ ᠬᠢᠯᠢ ᠶᠢᠨ ᠣᠪᠣᠭᠠᠨ ᠳᠤ ᠰᠤᠯᠠ ᠢᠷᠭᠡᠳ ᠴᠢᠯᠠᠭᠤ ᠨᠡᠮᠡᠬᠦ ᠪᠠᠶᠢᠲᠤᠭᠠᠢ ᠣᠶᠢᠷᠠᠳᠬᠤ ᠶᠢ ᠬᠤᠷᠢᠭᠯᠠᠭᠰᠠᠨ ᠶᠣᠰᠣ ᠪᠠᠶᠢᠵᠠᠢ᠃ ᠠᠭᠤᠯᠠ ᠲᠤᠪᠤ᠂ ᠬᠡᠭᠡᠷ᠎ᠡ ᠲᠠᠯ᠎ᠠ ᠪᠠᠷ ᠪᠠᠶᠢᠬᠤ ᠡᠵᠡᠨ ᠦᠭᠡᠢ ᠰᠤᠯᠠ ᠣᠪᠣᠭᠠᠨ ᠳᠤ ᠬᠡᠨ ᠴᠦ ᠴᠢᠯᠠᠭᠤ ᠨᠡᠮᠡᠳᠡᠭ ᠦᠭᠡᠢ᠃             ᠲᠠᠬᠢᠯᠭᠠᠲᠤ ᠣᠪᠣᠭᠠᠨ ᠤ ᠡᠮᠦᠨᠡᠭᠦᠷ ᠤᠨᠤᠭ᠎ᠠ ᠲᠠᠢ ᠬᠥᠮᠥᠨ ᠥᠩᠭᠡᠷᠡᠵᠦ ᠪᠤᠯᠬᠤ ᠦᠭᠡᠢ᠂ ᠤᠨᠤᠭ᠎ᠠ ᠠᠴᠠ  ᠪᠠᠨ ᠪᠠᠭᠤᠳᠠᠭ᠃ ᠣᠪᠣᠭᠠᠨ ᠤ ᠣᠷᠴᠢᠮ ᠤᠨ ᠨᠠᠭᠤᠷ ᠤᠰᠤᠨ ᠳᠠᠬᠢ ᠵᠢᠭᠠᠰᠤ ᠵᠢᠷᠠᠭᠠᠬᠠᠢ᠂ ᠵᠢᠭᠦᠷᠲᠡᠨ᠂ ᠡᠯᠳᠡᠪ ᠭᠥᠷᠥᠭᠡᠰᠦ ᠶᠢ ᠦᠷᠭᠦᠭᠡᠵᠦ ᠰᠣᠴᠢᠭᠠᠵᠤ᠂ ᠠᠩᠨᠠᠵᠤ ᠪᠤᠯᠬᠤ ᠦᠭᠡᠢ᠃ ᠤᠢ ᠮᠣᠳᠣ᠂ ᠡᠪᠡᠰᠦ ᠤᠷᠭᠤᠮᠠᠯ ᠢ ᠣᠭᠲᠣᠯᠵᠤ ᠬᠠᠳᠤᠵᠤ ᠲᠠᠯᠬᠢᠬᠤ ᠶᠢ ᠴᠢᠩᠭ᠎ᠠ ᠬᠤᠷᠢᠭᠯᠠᠳᠠᠭ᠃ ᠣᠪᠣᠭᠠᠨ ᠬᠤᠷᠢᠮᠠᠯ ᠲᠠᠬᠢ ᠨᠠᠭᠤᠷ᠂ ᠪᠤᠯᠠᠭ ᠱᠠᠩᠳᠠ᠂ ᠭᠤᠣᠯ ᠭᠤᠷᠤᠬ᠎ᠠ ᠳᠤ ᠪᠡᠶ᠎ᠡ ᠪᠠᠨ ᠤᠬᠢᠶᠠᠵᠤ᠂ ᠨᠠᠭᠠᠳᠴᠤ ᠲᠣᠭᠯᠠᠬᠤ᠂ ᠪᠡᠶ᠎ᠡ ᠵᠠᠰᠠᠬᠤ᠂ ᠡᠯᠳᠡᠪ ᠪᠤᠵᠠᠷ ᠪᠤᠷᠲᠠᠭ ᠶᠠᠭᠤᠮ᠎ᠠ ᠬᠠᠶᠠᠵᠤ ᠬᠡᠬᠡᠬᠦ ᠶᠢ ᠴᠢᠩᠭ᠎ᠠ ᠴᠠᠭᠠᠵᠠᠯᠠᠨ ᠴᠡᠭᠡᠷᠯᠡᠳᠡᠭ᠃ ᠣᠪᠣᠭᠠᠨ ᠬᠠᠶᠢᠷᠬᠠᠨ ᠢᠶᠠᠨ ᠬᠦᠨᠳᠦᠳᠭᠡᠵᠦ ᠳᠡᠷᠭᠡᠳᠡ ᠨᠢ ᠨᠡᠷ᠎ᠡ ᠶᠢ ᠨᠢ ᠬᠡᠯᠡᠬᠦ ᠠᠴᠠ ᠴᠡᠭᠡᠷᠯᠡᠳᠡᠭ᠃ ᠭᠡᠷ ᠲᠤ ᠨᠢ ᠬᠥᠮᠥᠨ ᠥᠩᠭᠡᠷᠡᠭᠡᠳ ᠳᠥᠴᠢ ᠶᠢᠰᠦ ᠬᠤᠨᠣᠭᠠᠳᠤᠢ ᠪᠣᠯ ᠣᠪᠣᠭᠠᠨ ᠳᠤ ᠭᠠᠷᠭᠠᠳᠠᠭ ᠦᠭᠡᠢ᠃ ᠨᠡᠩ ᠴᠦ ᠣᠪᠣᠭᠠᠨ ᠳᠠᠬᠢᠯᠭᠠᠨ ᠳᠤ ᠣᠷᠣᠭᠤᠯᠳᠠᠭ ᠦᠭᠡᠢ᠃             ᠬᠠᠯᠠᠭᠤᠨ ᠬᠠᠨᠢᠶᠠᠳᠤ ︵ᠬᠥᠯᠥᠰᠦ ᠲᠠᠢ ᠲᠣᠮᠣᠭᠤ︶ ᠵᠡᠷᠭᠡ ᠶᠢᠨ ᠬᠠᠯᠳᠠᠪᠦᠷᠢᠲᠦ ᠬᠢᠵᠢᠭ ᠡᠪᠡᠳᠴᠢᠨ ᠳᠡᠯᠭᠡᠷᠡᠵᠦ ᠬᠥᠯ ᠬᠤᠷᠢᠭ᠍ᠰᠡᠨ ᠭᠠᠵᠠᠷ ᠤᠨ ᠲᠤᠮᠠᠭ ︵ᠲᠡᠮᠳᠡᠭ︶ ᠤᠨ ᠳᠣᠲᠣᠷ᠎ᠠ ᠮᠥᠷ ᠭᠠᠷᠭᠠᠭᠰᠠᠨ ᠬᠥᠮᠥᠨ ᠢ ᠲᠠᠬᠢᠯᠭ᠎ᠠ ᠳᠤ ᠣᠷᠣᠬᠤ ᠶᠢ ᠴᠢᠩᠭ᠎ᠠ ᠴᠡᠭᠡᠷᠯᠡᠳᠡᠭ᠃             ᠬᠤᠯᠠᠭᠠᠢ ᠬᠢᠭᠰᠡᠨ᠂ ᠬᠤᠳᠠᠯ ᠬᠡᠯᠡᠵᠦ᠂ ᠵᠠᠷᠭᠤ ᠵᠠᠭᠠᠯᠢᠬᠠᠢ ᠳᠤ ᠴᠢᠷᠦᠭᠳᠡᠭᠰᠡᠨ᠂ ᠶᠠᠮᠠᠷ ᠨᠢᠭᠡᠨ ᠶᠠᠯ᠎ᠠ ᠬᠢᠵᠦ ᠶᠠᠮᠤᠨ ᠲᠠᠮᠠᠭ᠎ᠠ ᠶᠢᠨ ᠭᠠᠵᠠᠷ ᠲᠤ ᠡᠷᠡᠭᠦᠦ ᠶᠢᠨ ᠰᠢᠢᠳᠬᠡᠯ ᠬᠦᠷᠲᠡᠭᠰᠡᠳ ᠨᠢᠭᠡ ᠵᠢᠯ ᠤᠨ ᠳᠣᠲᠣᠷ᠎ᠠ ᠣᠪᠣᠭᠠᠨ ᠳᠠᠬᠢᠯᠭᠠᠨ ᠳᠤ ᠣᠷᠣᠵᠤ ᠪᠤᠯᠬᠤ ᠦᠭᠡᠢ᠃ ᠣᠪᠣᠭᠠᠨ ᠤ ᠣᠶᠢᠷᠠᠬᠠᠨ ᠮᠠᠶᠢᠮᠠᠢ ᠱᠣᠣᠮᠠᠢ ᠬᠢᠵᠦ᠂ ᠬᠡᠷᠡᠭᠦᠯ ᠱᠤᠤᠭᠢᠶᠠᠨ ᠳᠡᠭᠳᠡᠭᠡᠵᠦ᠂ ᠨᠣᠪᠰᠢ ᠲᠡᠳᠠᠨ ᠪᠤᠵᠠᠷ ᠪᠤᠷᠲᠠᠭ ᠪᠤᠯᠭᠠᠬᠤ ᠶᠢ ᠴᠡᠭᠡᠷᠯᠡᠳᠡᠭ ᠶᠤᠮ᠃ 
  
ᠢᠷᠡᠯᠲᠡ᠄ ᠲᠠᠷᠬᠠᠨ ᠮᠤᠤᠮᠢᠩᠭᠠᠨ ᠤ ᠵᠠᠰᠠᠭ ᠤᠨ ᠣᠷᠳᠣᠨ ᠤ ᠮᠣᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号