ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠪᠠᠭ᠋ᠠᠷᠬᠠᠯᠳᠥ ᠰᠢᠭᠤᠶᠢᠳᠥ
ᠦᠢᠯᠡᠴᠢᠯᠡᠭᠡ
ᠭᠤᠣᠯ ᠪᠣᠯᠬᠤ ᠵᠢᠭᠦᠷᠲᠡᠨ ᠰᠢᠪᠠᠭᠤ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2022/12/21
     ᠳᠠᠷᠬᠠᠨ ᠮᠤᠤᠮᠢᠩᠭᠠᠨ ᠬᠤᠯᠪᠣᠭᠠᠲᠤ ᠬᠤᠰᠢᠭᠤᠨ ᠤ ᠨᠤᠲᠤᠭ ᠲᠡᠪᠢᠰᠭᠡᠷ ᠳᠡᠭᠡᠷ᠎ᠡ ᠨᠤᠲᠤᠭᠰᠢᠳᠠᠭ ᠪᠠ ᠬᠠᠪᠤᠷ ᠢᠷᠡᠵᠦ ᠨᠠᠮᠤᠷ ᠪᠤᠴᠠᠳᠠᠭ ᠵᠢᠭᠦᠷᠲᠡᠨ ᠭᠡᠪᠡᠯ ᠪᠦᠷᠭᠦᠳ᠂ ᠶᠣᠯᠤ᠂ ᠡᠯᠢᠶ᠎ᠡ᠂ ᠬᠡᠷᠢᠶ᠎ᠡ᠂ ᠱᠠᠭᠠᠵᠠᠭᠠᠢ᠂ ᠲᠤᠷᠯᠢᠶᠠᠬ᠎ᠠ᠂ ᠰᠢᠷ᠎ᠠ ᠰᠢᠪᠠᠭᠤ᠂ ᠣᠭᠤᠯᠢ᠂ ᠬᠦᠭᠦᠭᠡ᠂ ᠨᠣᠭᠳᠤᠷᠣᠣ᠂ ᠢᠲᠠᠭᠤ᠂ ᠲᠠᠰ᠂ ᠰᠠᠷ᠂ ᠪᠦᠳᠦᠭᠦᠨ ᠬᠠᠷ᠎ᠠ ᠰᠢᠪᠠᠭᠤ᠂ ᠴᠠᠭᠠᠨ ᠡᠯᠢᠭᠡ ᠲᠠᠢ ᠰᠢᠪᠠᠭᠤ᠂ ᠮᠠᠯᠠᠭᠠᠢ ᠲᠠᠢ ᠰᠢᠪᠠᠭᠤ᠂ ᠯᠠᠮᠠ ᠭᠠᠯᠠᠭᠤ᠂ ᠴᠠᠭᠠᠨ ᠭᠠᠯᠠᠭᠤ᠂ ᠠᠩᠭᠢᠷ᠂ ᠬᠠᠷᠴᠠᠭᠠᠢ ᠂ ᠲᠣᠭᠤᠳᠠᠭ᠂ ᠥᠪᠦᠭᠡᠯᠵᠢ᠂ ᠲᠠᠯᠠᠨ ᠬᠡᠯᠡᠲᠦ᠂ ᠣᠶᠢᠯᠠᠭᠠᠨ ᠰᠢᠪᠠᠭᠤ᠂ ᠪᠣᠯᠵᠤᠮᠤᠷ᠂ ᠭᠤᠷᠭᠤᠤᠯ᠂ ᠶᠠᠩᠵᠤ ᠪᠦᠷᠢ ᠶᠢᠨ ᠴᠡᠭᠴᠦᠭᠡᠢ ᠵᠡᠷᠭᠡ ᠨᠢᠭᠡᠨᠲᠡ ᠮᠡᠳᠡᠭᠰᠡᠨ 102 ᠵᠦᠢᠯ ᠤᠨ ᠰᠢᠪᠠᠭᠤ ᠪᠣᠢ᠃ ᠡᠭᠦᠨ ᠳᠤ ᠪᠦᠷᠢᠨ ᠪᠤᠰᠤ ᠪᠦᠷᠢᠳᠭᠡᠯ ᠢᠶᠠᠷ ᠤᠯᠤᠰ ᠤᠨ ᠨᠢᠭᠡᠳᠦᠭᠡᠷ ᠳᠡᠰ ᠤᠨ ᠬᠠᠮᠠᠭᠠᠯᠠᠯᠲᠠ ᠶᠢᠨ ᠵᠢᠭᠦᠷᠲᠡᠨ ᠭᠤᠷᠪᠠ᠂ ᠬᠤᠶᠠᠳᠤᠭᠠᠷ ᠳᠡᠰ ᠤᠨ ᠬᠠᠮᠠᠭᠠᠯᠠᠯᠲᠠ ᠶᠢᠨ ᠵᠢᠭᠦᠷᠲᠡᠨ ᠠᠷᠪᠠ ᠭᠠᠷᠤᠢ ᠪᠠᠶᠢᠳᠠᠭ᠃     ᠲᠣᠲᠤᠭ ᠲᠤᠭᠤᠷᠤᠤᠯᠢᠭ ᠰᠢᠪᠠᠭᠤᠨ ᠤ ᠪᠠᠭ᠂ ᠲᠣᠲᠤᠭ ᠤᠨ ᠢᠵᠠᠭᠤᠷ᠂ ᠲᠥᠷᠥᠯ᠃ ᠪᠡᠶ᠎ᠡ ᠶᠢᠨ ᠤᠷᠲᠤ  ᠨᠢ 103cm᠂ ᠳᠠᠯᠠᠪᠴᠢ ᠨᠢ 60cm᠂ ᠰᠡᠭᠦᠯ ᠨᠢ 24cm᠂ ᠬᠤᠰᠢᠭᠤ ᠨᠢ 4.7 cm᠂ ᠤᠯᠠ ᠪᠡᠷᠪᠡᠭᠡᠷ ᠨᠢ 14.1cm ᠬᠦᠷᠳᠡᠭ᠃ ᠬᠤᠰᠢᠭᠤ ᠨᠢ ᠣᠬᠤᠷ ᠪᠥᠭᠡᠳ ᠬᠠᠪᠲᠠᠭᠠᠶᠢᠪᠲᠤᠷ᠂ ᠬᠥᠬᠡ ᠥᠩᠭᠡ ᠲᠠᠢ᠂ ᠦᠵᠦᠭᠦᠷ ᠨᠢ ᠬᠠᠷᠠᠪᠲᠤᠷ᠃ ᠨᠢᠳᠦ ᠨᠢ ᠬᠠᠷ᠎ᠠ ᠬᠦᠷᠡᠩ᠂ ᠬᠥᠯ ᠨᠢ ᠤᠷᠲᠤ ᠪᠦᠳᠦᠭᠦᠨ᠂ ᠭᠤᠷᠪᠠᠨ ᠬᠤᠷᠤᠭᠤ ᠲᠠᠢ᠃ ᠲᠣᠯᠣᠭᠠᠢ᠂ ᠬᠦᠵᠦᠭᠦᠦ᠂ ᠴᠡᠭᠡᠵᠢ ᠨᠢ ᠬᠥᠬᠡ᠃ ᠨᠠᠬᠠᠢ᠂ ᠬᠤᠭᠤᠯᠠᠢ ᠨᠢ ᠴᠠᠭᠠᠨ᠂ ᠤᠷᠲᠤ ᠦᠰᠦᠯᠢᠭ ᠥᠳᠥ ᠰᠤᠨᠤᠨ ᠭᠠᠷᠳᠠᠭ᠃ ᠨᠢᠷᠤᠭᠤ ᠪᠡᠶ᠎ᠡ ᠨᠢ ᠬᠤᠩᠭᠤᠷ ᠬᠤᠸᠠ ᠳᠡᠭᠡᠷ᠎ᠡ ᠬᠥᠨᠳᠡᠯᠡᠨ ᠬᠠᠷ᠎ᠠ ᠵᠣᠷᠪᠣᠰ  ᠤᠳ ᠲᠠᠢ᠃ ᠰᠡᠭᠦᠯ ᠤᠨ ᠭᠤᠣᠯ ᠦᠳᠦ ᠨᠢ ᠨᠢᠷᠦᠭᠤᠨ ᠪᠡᠶ᠎ᠡ ᠶᠢᠨ ᠥᠩᠭᠡ ᠲᠠᠢ ᠪᠠᠨ ᠠᠳᠠᠯᠢ᠂ ᠦᠵᠦᠭᠦᠷ ᠨᠢ ᠴᠠᠭᠠᠨ᠂ ᠪᠤᠰᠤᠳ ᠦᠳᠦ ᠶᠢᠨ ᠴᠠᠭᠠᠨ ᠨᠢ ᠶᠡᠭᠡ ᠪᠣᠯᠪᠠᠴᠤ ᠦᠵᠦᠭᠦᠷ ᠬᠠᠪᠢ ᠪᠠᠷ ᠢᠶᠠᠨ ᠬᠥᠨᠳᠡᠯᠡᠨ ᠬᠠᠷ᠎ᠠ ᠵᠣᠷᠪᠣᠰ ᠲᠠᠢ᠃ ᠳᠠᠯᠠᠪᠴᠢᠨ ᠤ ᠪᠦᠷᠬᠦᠭᠦᠯ ᠥᠳᠥ ᠬᠥᠬᠡ᠂ ᠦᠵᠦᠭᠦᠷ ᠨᠢ ᠴᠠᠭᠠᠨ᠃ ᠲᠡᠷᠢᠭᠦᠨ ᠪᠠ ᠳᠡᠳ᠋ ᠨᠢᠰᠦᠯᠲᠡ ᠶᠢᠨ ᠥᠳᠥ ᠨᠢ ᠬᠠᠷ᠎ᠠ ᠪᠣᠷᠣ᠂ ᠤᠭ ᠨᠢ ᠴᠠᠭᠠᠨ᠃ ᠭᠤᠳᠠᠭᠠᠷ ᠨᠢᠰᠦᠯᠲᠠ ᠶᠢᠨ ᠥᠳᠥ ᠨᠢ ᠴᠠᠭᠠᠨ᠃ ᠴᠡᠭᠡᠵᠢᠨ ᠤ ᠬᠤᠶᠠᠷ ᠬᠠᠵᠠᠭᠤ ᠲᠠᠯ᠎ᠠ ᠨᠢ ᠨᠢᠷᠤᠭᠤ ᠪᠡᠶ᠎ᠡ ᠲᠠᠢ ᠪᠠᠨ ᠠᠳᠠᠯᠢ ᠥᠩᠭᠡ ᠲᠠᠢ ᠪᠠᠶᠢᠵᠤ᠂ ᠡᠯᠢᠭᠡᠨ ᠪᠡᠶ᠎ᠡ ᠨᠢ ᠴᠠᠭᠠᠨ ᠥᠩᠭᠡ ᠲᠠᠢ᠃     ᠰᠢᠯᠢ ᠵᠣ᠂ ᠬᠥᠳᠡᠭᠡ ᠲᠠᠯ᠎ᠠ ᠪᠠᠷ᠂ ᠡᠪᠡᠰᠦᠨ ᠤ ᠨᠢᠯᠬ᠎ᠠ ᠨᠠᠪᠴᠢ ᠨᠠᠬᠢᠶ᠎ᠠ᠂ ᠥᠷ᠎ᠡ ᠵᠢᠮᠢᠰ ᠪᠣᠯᠣᠨ ᠡᠯᠳᠡᠪ ᠵᠢᠵᠢᠭ ᠠᠮᠢᠲᠠᠳ ᠢᠶᠠᠷ ᠢᠳᠡᠰᠢ ᠪᠣᠯᠭᠠᠳᠠᠭ᠃ ᠭᠠᠵᠠᠷ ᠲᠤ ᠡᠭᠦᠷᠯᠡᠨ 2 — 3 ᠬᠦᠷᠡᠩ ᠪᠢᠳᠠᠷ ᠪᠦᠬᠦᠢ ᠬᠥᠬᠡᠪᠲᠥᠷ ᠥᠨᠳᠡᠭᠡ ᠭᠠᠷᠭᠠᠳᠠᠭ᠃ ᠮᠢᠬ᠎ᠠ ᠨᠢ ᠠᠮᠲᠠᠲᠠᠢ᠃ ᠥᠳᠥ ᠨᠢ ᠭᠤᠶᠣᠯᠭᠠᠨ ᠳᠤ ᠣᠷᠣᠳᠠᠭ᠃      ᠰᠢᠨᠵᠢᠶᠠᠩ᠂ ᠥᠪᠥᠷ ᠮᠣᠩᠭᠤᠯ᠂ ᠵᠡᠭᠦᠨ ᠬᠤᠶᠢᠲᠤ ᠶᠢᠨ ᠤᠮᠠᠷ᠎ᠠ ᠲᠠᠯ᠎ᠠ ᠪᠠᠷ ᠦᠷᠡᠵᠢᠵᠦ᠂ ᠡᠪᠦᠯ ᠭᠠᠨᠰᠤ᠂ ᠾᠧᠪᠧᠢ ᠪᠠᠷ ᠣᠴᠢᠵᠤ ᠡᠪᠥᠯᠵᠢᠳᠡᠭ᠃ ᠤᠯᠤᠰ ᠤᠨ ᠨᠢᠭᠡᠳᠦᠭᠡᠷ ᠳᠡᠰ ᠤᠨ ᠬᠠᠮᠠᠭᠠᠯᠠᠯᠲᠠ ᠳᠤ ᠪᠦᠷᠢᠳᠬᠡᠭᠦᠯᠦᠭᠰᠡᠨ ᠵᠢᠭᠦᠷᠲᠡᠨ ᠪᠣᠯᠣᠨ᠎ᠠ᠃      ᠬᠠᠷ᠎ᠠ ᠥᠷᠪᠢ ᠥᠷᠪᠢᠯᠢᠭ ᠰᠢᠪᠠᠭᠤᠨ ᠤ ᠪᠠᠭ᠂ ᠥᠷᠪᠢ ᠶᠢᠨ ᠢᠵᠠᠭᠤᠷ᠂ ᠲᠥᠷᠥᠯ᠃ ᠪᠡᠶ᠎ᠡ ᠶᠢᠨ ᠤᠷᠲᠤ  ᠨᠢ 100 cm᠂ ᠳᠠᠯᠠᠪᠴᠢ ᠨᠢ 51cm᠂ ᠰᠡᠭᠦᠯ ᠨᠢ 22cm᠂ ᠬᠤᠰᠢᠭᠤ ᠨᠢ 19 cm᠂ ᠤᠯᠠ ᠪᠡᠷᠪᠡᠭᠡᠷ ᠨᠢ 18.5cm ᠬᠦᠷᠳᠡᠭ᠃ ᠬᠤᠰᠢᠭᠤ ᠨᠢ ᠪᠠᠭ᠎ᠠ ᠬᠠᠪᠲᠠᠭᠠᠶᠢᠪᠲᠤᠷ ᠴᠢᠭᠡ ᠤᠷᠲᠤ᠂ ᠬᠠᠷ᠎ᠠ ᠤᠯᠠᠭᠠᠨ ᠥᠩᠭᠡ ᠲᠠᠢ᠃ ᠨᠢᠳᠦ ᠨᠢ ᠬᠦᠷᠡᠩ᠂ ᠬᠥᠯ ᠬᠦᠵᠦᠭᠦᠦ ᠨᠢ ᠤᠷᠲᠤ᠂ ᠬᠥᠯ ᠤᠨ ᠰᠢᠯᠪᠢᠨ ᠤ ᠬᠠᠭᠠᠰ ᠨᠢ ᠨᠢᠴᠦᠭᠦᠨ᠂ ᠤᠯᠠᠭᠠᠨ ᠥᠩᠭᠡ ᠲᠠᠢ᠃ ᠬᠤᠷᠤᠭᠤ ᠨᠢ ᠤᠷᠲᠤ ᠪᠣᠰᠣ᠂ ᠤᠭ ᠲᠠᠭᠠᠨ ᠲᠤᠲᠠᠭᠤ ᠰᠠᠷᠢᠰᠤ ᠲᠠᠢ᠃ ᠲᠣᠯᠣᠭᠠᠢ᠂ ᠬᠦᠵᠦᠭᠦᠦ᠂ ᠴᠡᠭᠡᠵᠢ᠂ ᠨᠢᠷᠤᠭᠤ᠂ ᠳᠠᠯᠠᠪᠴᠢ ᠪᠠ ᠰᠡᠭᠦᠯ ᠤᠨ ᠥᠳᠥ ᠨᠢ ᠪᠥᠷ ᠬᠦᠷᠡᠪᠲᠦᠷ ᠬᠠᠷ᠎ᠠ᠂ ᠬᠢᠯᠲᠠᠭᠠᠨᠠᠭᠰᠠᠨ ᠶᠠᠭᠠᠨ ᠨᠣᠭᠤᠭᠠᠨ ᠭᠢᠯᠪᠠᠭ᠎ᠠ ᠲᠠᠢ᠃ ᠪᠤᠰᠤᠳ ᠪᠡᠶ᠎ᠡ ᠨᠢ ᠪᠥᠷ ᠴᠠᠭᠠᠨ᠃ ᠠᠭᠤᠯᠠᠨ ᠤ ᠭᠤᠣᠯ ᠭᠤᠷᠣᠬᠠᠨ ᠠᠴᠠ ᠵᠢᠭᠠᠰᠤ᠂ ᠮᠡᠯᠡᠬᠡᠢ ᠪᠣᠯᠣᠨ ᠰᠢᠪᠠᠵᠢ᠂ ᠮᠣᠭᠠᠢ ᠵᠡᠷᠭᠡ ᠶᠢ ᠪᠠᠷᠢᠵᠤ ᠢᠳᠡᠳᠡᠭ᠃ ᠶᠡᠷᠦᠳᠡᠭᠡᠨ ᠳᠠᠩ ᠭᠠᠭᠴᠠᠭᠠᠷ ᠶᠠᠪᠤᠵᠤ ᠮᠣᠲᠣᠨ ᠳᠡᠭᠡᠷ᠎ᠡ ᠬᠤᠨᠣᠭᠯᠠᠳᠠᠭ᠃ ᠬᠠᠪᠴᠠᠭᠠᠢ ᠴᠢᠯᠠᠭᠤᠨ ᠳᠡᠭᠡᠷ᠎ᠡ ᠡᠭᠦᠷᠯᠡᠨ 4 ᠶᠠᠭᠠᠨ ᠥᠨᠳᠡᠭᠡ ᠭᠠᠷᠭᠠᠳᠠᠭ ᠠᠩᠭᠠᠬᠠᠶᠢᠲᠤ ᠰᠢᠪᠠᠭᠤ ᠪᠣᠯᠣᠨ᠎ᠠ᠃      ᠪᠥᠬᠦ ᠣᠷᠣᠨ ᠳᠤ ᠪᠥᠷ ᠲᠠᠭᠠᠷᠠᠯᠳᠤᠬᠤ ᠤᠯᠤᠰ ᠤᠨ ᠨᠢᠭᠡᠳᠦᠭᠡᠷ ᠳᠡᠰ ᠤᠨ ᠬᠠᠮᠠᠭᠠᠯᠠᠯᠲᠠ ᠳᠤ ᠪᠦᠷᠢᠳᠬᠡᠭᠦᠯᠦᠭᠰᠡᠨ ᠵᠢᠭᠦᠷᠲᠡᠨ ᠪᠣᠯᠣᠨ᠎ᠠ᠃      ᠬᠦᠷᠡᠩ ᠪᠦᠷᠭᠦᠳ ᠬᠠᠷᠴᠠᠭᠠᠶᠢᠯᠢᠭ ᠰᠢᠪᠠᠭᠤᠨ ᠤ ᠪᠠᠭ᠂ ᠬᠠᠷᠴᠠᠭᠠᠢ ᠶᠢᠨ ᠢᠵᠠᠭᠤᠷ᠂ ᠪᠦᠷᠭᠦᠳ ᠤᠨ ᠲᠥᠷᠥᠯ᠃ ᠪᠡᠶ᠎ᠡ ᠶᠢᠨ ᠤᠷᠲᠤ ᠨᠢ 30.9cm᠂ ᠳᠠᠯᠠᠪᠴᠢ ᠨᠢ 66cm᠂ ᠰᠡᠭᠦᠯ ᠨᠢ 37cm᠂ ᠬᠤᠰᠢᠭᠤ ᠨᠢ 6 cm᠂ ᠤᠯᠠ ᠪᠡᠷᠪᠡᠬᠡᠢ ᠨᠢ 12cm ᠬᠦᠷᠳᠡᠭ᠃ ᠬᠤᠰᠢᠭᠤ ᠨᠢ ᠬᠠᠷᠠᠪᠲᠤᠷ ᠬᠦᠷᠡᠩ᠂ ᠦᠵᠦᠭᠦᠷ ᠨᠢ ᠮᠠᠬᠢᠷ᠂ ᠤᠭ ᠲᠠᠬᠢ ᠰᠢᠷ᠎ᠠ ᠯᠠᠯᠢᠭ ᠪᠦᠷᠬᠦᠭᠦᠯ ᠨᠢ ᠬᠤᠰᠢᠭᠤᠨ ᠤ ᠪᠠᠨ ᠬᠠᠭᠠᠰ ᠲᠤ ᠬᠦᠷᠳᠡᠭ᠃ ᠬᠠᠮᠠᠷ ᠤᠨ ᠨᠥᠬᠡ ᠨᠢ ᠲᠥᠭᠦᠷᠢᠭ ᠬᠡᠯᠪᠡᠷᠢᠲᠡᠢ᠃ ᠨᠢᠳᠦ ᠨᠢ ᠤᠯᠠᠪᠤᠷ ᠬᠦᠷᠡᠩ᠃ ᠬᠥᠯ ᠨᠢ ᠰᠢᠷ᠎ᠠ᠂ ᠬᠢᠮᠤᠰᠤ  ᠨᠢ ᠬᠠᠷ᠎ᠠ᠂ ᠤᠯᠠ ᠪᠡᠷᠪᠡᠬᠡᠢ ᠨᠢ ᠣᠬᠤᠷ᠂ ᠥᠳᠥ ᠪᠠᠷ ᠪᠦᠷᠬᠦᠭᠳᠡᠳᠡᠭ᠃ ᠬᠤᠶᠢᠲᠤ ᠬᠤᠷᠤᠭᠤᠨ ᠬᠢᠮᠤᠰᠤ ᠨᠢ ᠤᠷᠲᠤ᠃ ᠲᠣᠯᠣᠭᠠᠢ ᠶᠢᠨ ᠣᠷᠣᠢ ᠨᠢ ᠬᠠᠷ᠎ᠠ ᠬᠦᠷᠡᠩ᠂ ᠳᠤᠬᠤ ᠪᠠ ᠬᠦᠵᠦᠭᠦᠨ ᠠᠷᠤ ᠬᠥᠪᠡᠭᠡ ᠨᠢ ᠴᠠᠶᠢᠪᠤᠷ᠂ ᠤᠯᠠᠪᠤᠷ ᠬᠦᠷᠡᠩ ᠬᠠᠷᠪᠤᠭᠤᠯ ᠬᠡᠯᠪᠡᠷᠢ ᠶᠢᠨ ᠥᠳᠥ ᠲᠠᠢ᠃ ᠠᠷᠤ ᠪᠡᠶ᠎ᠡ ᠨᠢ ᠤᠯᠠᠪᠤᠷ ᠬᠦᠷᠡᠩ ᠪᠠᠶᠢᠵᠤ᠂ ᠭᠠᠭᠴᠠ ᠮᠥᠷᠥᠨ ᠤ ᠥᠳᠥ ᠨᠢ ᠴᠠᠶᠢᠪᠤᠷ᠂ ᠨᠢᠷᠤᠭᠤᠨ ᠤ ᠥᠳᠥᠨ ᠤ ᠤᠭ ᠨᠢ ᠴᠠᠭᠠᠨ ᠪᠠᠶᠢᠳᠠᠭ᠃ ᠡᠯᠢᠭᠡᠨ ᠪᠡᠶ᠎ᠡ ᠨᠢ ᠬᠠᠷᠠᠪᠲᠤᠷ ᠬᠦᠷᠡᠩ ᠪᠠᠶᠢᠵᠤ᠂ ᠴᠡᠭᠡᠵᠢᠨ ᠤ ᠥᠳᠥᠨ ᠤ ᠭᠤᠣᠯ ᠨᠢ ᠴᠠᠶᠢᠪᠤᠷ᠂ ᠰᠡᠭᠦᠯ ᠤᠨ ᠳᠣᠲᠤᠷ᠎ᠠ ᠪᠦᠷᠬᠦᠭᠦᠯ ᠥᠳᠥ ᠨᠢ ᠬᠤᠸᠠ ᠪᠤᠶᠤ ᠬᠥᠬᠡᠪᠲᠦᠷ ᠪᠣᠷᠣ᠃ ᠬᠠᠮᠤᠭ ᠭᠠᠳᠠᠨᠠᠬᠢ 3 ᠨᠢᠰᠦᠯᠲᠡ ᠶᠢᠨ ᠥᠳᠥᠨ ᠠᠴᠠ ᠪᠤᠰᠤᠳ ᠨᠢᠰᠦᠯᠲᠡ ᠶᠢᠨ ᠥᠳᠥᠨ ᠤ ᠤᠭ ᠨᠢ ᠪᠦᠷ ᠴᠠᠭᠠᠨ᠂ ᠰᠡᠭᠦᠯ ᠨᠢ ᠬᠦᠷᠡᠪᠲᠦᠷ ᠪᠣᠷᠣ᠂ ᠦᠵᠦᠭᠦᠷ ᠨᠢ ᠬᠠᠷ᠎ᠠ ᠪᠠᠶᠢᠳᠠᠭ᠃      ᠥᠨᠳᠥᠷ ᠠᠭᠤᠯᠠᠷᠬᠠᠭ ᠭᠠᠵᠠᠷ᠂ ᠰᠢᠯᠮᠤᠤᠰᠤᠲᠤ ᠣᠢ ᠪᠠᠷ ᠪᠠᠶᠢᠷᠢᠯᠠᠨ ᠨᠤᠭᠤᠰᠤ᠂ ᠭᠠᠯᠠᠭᠤ᠂ ᠲᠠᠷᠪᠠᠭ᠎ᠠ᠂ ᠲᠠᠤᠯᠠᠢ ᠵᠡᠷᠭᠡ ᠲᠣᠮᠣᠪᠲᠤᠷ ᠠᠮᠢᠲᠠᠳ ᠢ ᠪᠠᠷᠢᠵᠤ ᠢᠳᠡᠳᠡᠭ᠃ ᠥᠨᠳᠥᠷ ᠮᠣᠳᠣᠨ ᠳᠡᠭᠡᠷ᠎ᠡ ᠪᠤᠶᠤ ᠠᠭᠤᠯᠠ ᠬᠠᠳᠠᠨ ᠤ ᠬᠠᠪᠴᠠᠭᠠᠢ ᠳᠤ ᠡᠭᠦᠷᠯᠡᠨ 1 - 2 ᠬᠥᠬᠡᠪᠲᠦᠷ ᠴᠠᠭᠠᠨ ᠥᠨᠳᠡᠭᠡ ᠭᠠᠷᠭᠠᠳᠠᠭ ᠠᠩᠭᠠᠷᠬᠠᠶᠢᠲᠤ ᠰᠢᠪᠠᠭᠤ ᠪᠣᠯᠣᠨ᠎ᠠ᠃ ᠲᠡᠵᠢᠭᠡᠨ ᠳᠠᠰᠬᠠᠵᠤ ᠠᠩ ᠳᠤ ᠬᠡᠷᠡᠭᠯᠡᠵᠦ ᠪᠣᠯᠳᠠᠭ ᠠᠩᠴᠢᠨ ᠰᠢᠪᠠᠭᠤ᠃      ᠵᠡᠭᠦᠨ ᠬᠤᠶᠢᠲᠤ ᠣᠷᠣᠨ᠂ ᠥᠪᠥᠷ ᠮᠣᠩᠭᠤᠯ᠂ ᠭᠠᠨᠰᠤ᠂ ᠰᠢᠨᠵᠢᠶᠠᠩ ᠵᠡᠷᠭᠡ ᠨᠤᠲᠤᠭ ᠢᠶᠠᠷ ᠦᠷᠭᠦᠯᠵᠢ ᠬᠠᠷᠠᠭᠳᠠᠳᠠᠭ ᠤᠯᠤᠰ ᠤᠨ ᠨᠢᠭᠡᠳᠦᠭᠡᠷ ᠳᠡᠰ ᠤᠨ ᠬᠠᠮᠠᠭᠠᠯᠠᠯᠲᠠ ᠳᠤ ᠣᠷᠣᠭᠰᠠᠨ ᠵᠢᠭᠦᠷᠲᠡᠨ ᠪᠣᠯᠣᠨ᠎ᠠ᠃      ᠴᠤᠷᠳᠤᠩ ᠶᠠᠪᠤᠯᠠᠭ ᠤᠭᠤᠯᠢᠯᠢᠭ ᠰᠢᠪᠠᠭᠤᠨ ᠤ ᠪᠠᠭ᠂ ᠤᠭᠤᠯᠢ ᠶᠢᠨ ᠢᠵᠠᠭᠤᠷ᠂ ᠶᠠᠪᠤᠯᠠᠭ ᠤᠨ ᠲᠥᠷᠥᠯ᠃ ᠪᠡᠶ᠎ᠡ ᠶᠢᠨ ᠤᠷᠲᠤ ᠨᠢ 36 cm᠂ ᠳᠠᠯᠠᠪᠴᠢ ᠨᠢ 28.6 cm᠂ ᠰᠡᠭᠦᠯ ᠨᠢ 15.2cm᠂ ᠬᠤᠰᠢᠭᠤ ᠨᠢ 2.8 cm᠂ ᠤᠯᠠ ᠪᠡᠷᠪᠡᠭᠡᠷ ᠨᠢ 3.8cm ᠬᠦᠷᠳᠡᠭ᠃ ᠲᠣᠯᠣᠭᠠᠢ ᠨᠢ ᠥᠷᠭᠡᠨ ᠲᠤᠮᠤ᠂ ᠬᠦᠵᠦᠭᠦᠦ ᠨᠢ ᠣᠬᠤᠷ᠂ ᠨᠢᠭᠤᠷ ᠤᠨ ᠡᠷᠭᠢᠭᠦᠯᠭᠡ ᠨᠢ ᠲᠣᠳᠣ᠃ ᠬᠤᠰᠢᠭᠤ ᠨᠢ ᠣᠬᠤᠷ ᠮᠠᠬᠢᠷ ᠪᠥᠭᠡᠳ ᠬᠥᠬᠡ᠂ ᠤᠭ ᠲᠤ ᠪᠠᠨ ᠯᠠᠯᠢᠭ ᠪᠦᠷᠬᠦᠭᠦᠯ ᠲᠠᠢ᠃ ᠨᠢᠳᠦ ᠨᠢ ᠲᠣᠮᠣ ᠪᠥᠭᠡᠳ ᠤᠯᠠᠪᠤᠷ ᠰᠢᠷ᠎ᠠ᠂ ᠲᠣᠯᠣᠭᠠᠢ ᠶᠢᠨ ᠡᠮᠦᠨ᠎ᠡ ᠲᠠᠯ᠎ᠠ ᠳᠤ  ᠪᠠᠨ ᠪᠠᠶᠢᠳᠠᠭ ᠃ ᠬᠥᠯ ᠨᠢ ᠣᠬᠤᠷ ᠬᠦᠴᠦᠷᠭᠡᠭ᠂ ᠭᠠᠳᠠᠷ ᠲᠠᠯ᠎ᠠ ᠶᠢᠨ ᠬᠤᠷᠤᠭᠤ ᠨᠢ ᠬᠤᠶᠢᠰᠢ ᠡᠷᠭᠢᠨ ᠴᠢᠳᠠᠳᠠᠭ᠂ ᠬᠤᠷᠤᠭᠤ ᠨᠤᠭᠤᠳ ᠨᠢ ᠪᠥᠷ ᠥᠳᠦ ᠪᠠᠷ ᠪᠦᠷᠬᠦᠭᠳᠡᠳᠡᠭ᠃ ᠬᠢᠮᠤᠰᠤ ᠨᠢ ᠮᠠᠬᠢᠷ ᠬᠤᠷᠴᠠ᠂ ᠬᠥᠬᠡᠪᠲᠦᠷ ᠥᠩᠭᠡ ᠲᠠᠢ᠂ ᠦᠵᠦᠭᠦᠷ ᠨᠢ ᠬᠠᠷ᠎ᠠ᠃ ᠨᠢᠷᠤᠭᠤ ᠪᠡᠶ᠎ᠡ ᠪᠠ ᠳᠠᠯᠠᠪᠴᠢᠨ ᠤ ᠶᠡᠬᠡᠩᠬᠡᠢ ᠬᠡᠰᠡᠭ ᠨᠢ ᠪᠣᠷᠤ ᠰᠢᠷᠭᠠᠯ ᠥᠩᠭᠡ ᠲᠠᠢ᠂ ᠥᠳᠥᠨ ᠤ ᠭᠤᠣᠯ ᠨᠢ ᠬᠠᠷᠠᠪᠲᠤᠷ ᠵᠤᠷᠪᠤᠰ ᠤᠳ ᠲᠠᠢ᠃ ᠮᠥᠷᠥ ᠬᠢᠭᠡᠳ ᠲᠣᠮᠣ ᠪᠦᠷᠬᠦᠭᠦᠯ ᠥᠳᠥᠨ ᠤ ᠦᠵᠦᠭᠦᠷ ᠨᠢ ᠴᠠᠭᠠᠨ ᠰᠢᠷᠭᠠᠯ ᠲᠣᠯᠪᠤ ᠲᠠᠢ᠂ ᠪᠤᠰᠤᠳ ᠨᠢᠰᠦᠯᠲᠡ ᠶᠢᠨ ᠥᠳᠥ ᠨᠢ ᠬᠥᠨᠳᠡᠯᠡᠨ ᠵᠣᠷᠪᠣᠰ ᠨᠤᠭᠤᠳ ᠲᠠᠢ ᠪᠠᠶᠢᠳᠠᠭ᠃ ᠰᠡᠭᠦᠯ ᠶᠢᠨ ᠤᠭ ᠨᠢ ᠰᠢᠷᠭᠠᠯ᠂ ᠰᠡᠭᠦᠯ ᠨᠢ ᠴᠠᠶᠢᠪᠤᠷ ᠬᠦᠷᠡᠩ ᠪᠤᠶᠤ ᠬᠠᠷᠠᠪᠲᠤᠷ ᠬᠥᠨᠳᠡᠯᠡᠨ ᠵᠣᠷᠪᠣᠰ ᠨᠤᠭᠤᠳ ᠲᠠᠢ᠃ ᠲᠣᠯᠣᠭᠠᠢ ᠳᠡᠭᠡᠷ᠎ᠡ ᠪᠠᠨ ᠬᠤᠶᠠᠷ ᠴᠢᠬᠢᠨ ᠥᠳᠥ ᠲᠠᠢ᠃ ᠮᠠᠩᠨᠠᠢ᠂ ᠨᠢᠳᠦᠨ ᠤ ᠬᠤᠭᠤᠷᠤᠨᠳᠤᠬᠢ ᠭᠡᠰᠡᠭ ᠪᠠ ᠨᠠᠬᠠᠢ ᠨᠢ ᠴᠠᠭᠠᠨ᠃ ᠡᠯᠢᠭᠡᠨ ᠲᠠᠯ᠎ᠠ ᠨᠢ ᠰᠢᠷ᠎ᠠ ᠰᠢᠷᠭᠠᠯ᠂ ᠥᠳᠥᠨ ᠤ ᠭᠤᠣᠯ ᠨᠢ ᠬᠠᠷ᠎ᠠ ᠵᠣᠷᠪᠣᠰ ᠲᠠᠢ᠂ ᠡᠳᠡᠭᠡᠷ ᠵᠣᠷᠪᠣᠰ ᠠᠴᠠ ᠬᠥᠨᠳᠡᠯᠡᠨ ᠨᠠᠷᠢᠨ ᠰᠤᠳᠠᠯ ᠤᠳ ᠭᠠᠷᠳᠠᠭ᠃ ᠭᠡᠪᠡᠯᠢ ᠥᠩᠭᠡᠷᠡᠭᠡᠳ ᠠᠭᠠᠵᠢᠮ ᠢᠶᠠᠷ ᠵᠣᠷᠪᠣᠰ ᠨᠢ ᠪᠠᠯᠠᠷᠠᠳᠠᠭ᠃ ᠰᠢᠭᠤᠢ ᠳᠤ ᠨᠢᠭᠤᠭᠳᠠᠨ ᠰᠥᠨᠢ ᠪᠦᠷᠦᠢ ᠪᠠᠷ ᠬᠥᠳᠡᠯᠵᠦ᠂ ᠮᠡᠷᠡᠭᠴᠢᠳ ᠪᠣᠯᠣᠨ ᠰᠢᠪᠠᠵᠢ᠂ ᠭᠠᠯᠢ᠂ ᠵᠢᠵᠢᠭ ᠰᠢᠪᠠᠭᠤ ᠪᠠᠷ ᠢᠳᠡᠰᠢ ᠪᠣᠯᠭᠠᠳᠠᠭ᠃       ᠶᠡᠷᠦᠳᠡᠭᠡᠨ ᠬᠠᠭᠤᠴᠢᠨ ᠡᠭᠦᠷ ᠪᠣᠶᠣ ᠬᠤᠩᠬᠤᠷᠬᠠᠢ ᠭᠠᠵᠠᠷ ᠡᠭᠦᠷᠯᠡᠨ 4 — 5 ᠴᠠᠭᠠᠨ ᠥᠨᠳᠡᠭᠡ ᠭᠠᠷᠭᠠᠳᠠᠭ᠃       ᠰᠢᠨᠵᠢᠶᠠᠩ ᠤᠨ ᠪᠠᠷᠠᠭᠤᠨ ᠭᠡᠰᠡᠭ ᠠᠴᠠ ᠭᠠᠨᠰᠤ᠂ ᠥᠪᠥᠷ ᠮᠣᠩᠭᠤᠯ᠂ ᠵᠡᠭᠦᠨ ᠬᠤᠶᠢᠲᠤ ᠣᠷᠣᠨ ᠢᠶᠠᠷ ᠦᠷᠡᠵᠢᠵᠦ᠂ ᠨᠠᠮᠤᠷ ᠲᠠᠭᠠᠨ ᠡᠮᠦᠨᠡᠲᠦ ᠣᠷᠣᠨ ᠳᠤ ᠨᠡᠭᠦᠳᠡᠯᠡᠳᠡᠭ᠃ ᠤᠯᠤᠰ ᠤᠨ ᠬᠤᠶᠠᠳᠤᠭᠠᠷ ᠳᠡᠰ ᠤᠨ ᠬᠠᠮᠠᠭᠠᠯᠠᠯᠲᠠ ᠳᠤ ᠪᠦᠷᠢᠳᠬᠡᠭᠦᠯᠦᠭᠰᠡᠨ ᠵᠢᠭᠦᠷᠲᠡᠨ ᠪᠣᠯᠣᠨ᠎ᠠ᠃      ᠠᠩᠭᠢᠷ ᠭᠠᠯᠠᠭᠤᠯᠢᠭ ᠰᠢᠪᠠᠭᠤᠨ ᠤ ᠪᠠᠭ᠂ ᠨᠤᠭᠤᠰᠤᠨ ᠤ ᠢᠵᠠᠭᠤᠷ᠂ ᠠᠩᠭᠢᠷ ᠤᠨ ᠲᠥᠷᠥᠯ᠃ ᠪᠡᠶ᠎ᠡ ᠶᠢᠨ ᠤᠷᠲᠤ ᠨᠢ 60 cm᠂ ᠳᠠᠯᠠᠪᠴᠢ ᠨᠢ 36.5- 38.7cm᠂ ᠰᠡᠭᠦᠯ ᠨᠢ 14.2-14.6 cm᠂ ᠬᠤᠰᠢᠭᠤ ᠨᠢ 4.3- 4.8cm᠂ ᠤᠯᠠ ᠪᠡᠷᠪᠡᠬᠡᠢ ᠨᠢ 6- 6.6 cm ᠬᠦᠷᠳᠡᠭ᠃ ᠬᠤᠰᠢᠭᠤ ᠨᠢ ᠬᠠᠷ᠎ᠠ᠂ ᠣᠬᠤᠷ ᠬᠠᠪᠲᠠᠭᠠᠢ᠃ ᠬᠢᠮᠤᠰᠤ ᠬᠢᠭᠡᠳ ᠰᠢᠳᠦᠯᠢᠭ ᠲᠠᠷ ᠲᠠᠢ᠃ ᠨᠢᠳᠦ ᠨᠢ ᠵᠢᠵᠢᠭ᠂ ᠤᠯᠠᠪᠤᠷ ᠬᠦᠷᠡᠩ᠃ ᠬᠥᠯ ᠨᠢ ᠬᠠᠷ᠎ᠠ᠂ ᠬᠤᠶᠢᠲᠤ ᠬᠤᠷᠤᠭᠤ ᠨᠢ ᠳᠡᠭᠡᠭᠦᠷ ᠪᠠᠶᠢᠷᠢᠯᠠᠳᠠᠭ᠃ ᠢᠪᠴᠤᠤ ᠳᠡᠯᠪᠢ ᠲᠠᠢ᠂ ᠡᠮᠦᠨᠡᠬᠢ ᠭᠤᠷᠪᠠᠨ ᠬᠤᠷᠤᠭᠤᠨ ᠳᠤ ᠪᠠᠨ ᠰᠠᠷᠢᠰᠤ ᠲᠠᠢ᠃ ᠪᠥᠬᠦ ᠪᠡᠶ᠎ᠡ ᠨᠢ ᠤᠯᠠᠪᠤᠷ ᠰᠢᠷ᠎ᠠ ᠲᠤᠯᠠ ᠵᠠᠷᠢᠮ ᠭᠠᠵᠠᠷ ᠯᠠᠮ᠎ᠠ ᠭᠠᠯᠠᠭᠤ ᠭᠡᠳᠡᠭ᠃ ᠲᠣᠯᠣᠭᠠᠢ ᠬᠦᠵᠦᠭᠦᠦ ᠨᠢ ᠵᠢᠭᠠᠬᠠᠨ ᠴᠠᠶᠢᠪᠤᠷ᠂ ᠨᠢᠷᠤᠭᠤ ᠨᠢ ᠪᠣᠷᠣᠪᠲᠣᠷ ᠥᠩᠭᠡ ᠲᠠᠢ᠂ ᠨᠢᠰᠦᠯᠲᠡ ᠶᠢᠨ ᠥᠳᠥ ᠪᠠ ᠰᠡᠭᠦᠯ ᠤᠨ ᠥᠳᠥ ᠨᠢ ᠬᠠᠷ᠎ᠠ᠂ ᠳᠠᠯᠠᠪᠴᠢᠨ ᠤ ᠪᠦᠷᠬᠦᠭᠦᠯ ᠥᠳᠥ ᠨᠢ ᠴᠠᠭᠠᠨ ᠪᠠᠶᠢᠳᠠᠭ᠃ ᠦᠷᠡᠵᠢᠯ ᠤᠨ ᠦᠶᠡᠰ ᠲᠡᠭᠡᠨ ᠨᠠᠭᠤᠷ ᠨᠠᠮᠤᠭ ᠤᠨ ᠵᠠᠬ᠎ᠠ ᠪᠠᠷ ᠤᠴᠢᠳᠠᠭ᠃ ᠭᠤᠣᠯᠴᠢᠯᠠᠨ ᠤᠷᠭᠤᠮᠠᠯ ᠢᠶᠠᠷ ᠢᠳᠡᠰᠢ ᠪᠣᠯᠭᠠᠳᠠᠭ ᠪᠣᠯᠪᠠᠴᠤ ᠰᠢᠪᠠᠵᠢ᠂ ᠵᠥᠭᠡᠯᠡᠨ ᠪᠡᠶᠡᠲᠡᠨ᠂ ᠬᠠᠪᠴᠢ᠂ ᠵᠢᠭᠠᠰᠤ ᠳᠤ ᠴᠤ ᠢᠳᠡᠳᠡᠭ᠃ ᠠᠭᠤᠯᠠ ᠪᠤᠶᠤ ᠲᠣᠪᠴᠠᠭ ᠭᠠᠵᠠᠷ ᠪᠤᠰᠤᠳ ᠤᠨ ᠮᠠᠯᠲᠠᠭᠰᠠᠨ ᠨᠥᠬᠡ᠂ ᠬᠤᠩᠬᠢᠯ ᠳᠤ 6-10 ᠥᠨᠳᠡᠭᠡ ᠭᠠᠷᠭᠠᠳᠠᠭ᠃     ᠪᠠᠷᠠᠭᠤᠨ ᠬᠤᠶᠢᠲᠤ ᠣᠷᠣᠨ᠂ ᠵᠡᠭᠦᠨ ᠬᠤᠶᠢᠲᠤ ᠣᠷᠣᠨ᠂ ᠥᠪᠥᠷ ᠮᠣᠩᠭᠤᠯ ᠣᠷᠣᠨ ᠢᠶᠠᠷ ᠦᠷᠡᠵᠢᠵᠦ᠂ ᠪᠠᠷᠠᠭᠤᠨ ᠡᠮᠦᠨᠡᠲᠦ ᠪᠠ ᠡᠮᠦᠨᠡᠲᠦ ᠣᠷᠣᠨ ᠢᠶᠠᠷ ᠣᠴᠢᠵᠤ ᠡᠪᠦᠯᠵᠢᠳᠡᠭ᠃ ᠤᠯᠤᠰ ᠤᠨ ᠬᠤᠶᠠᠳᠤᠭᠠᠷ ᠳᠡᠰ ᠤᠨ ᠬᠠᠮᠠᠭᠠᠯᠠᠯᠲᠠ ᠳᠤ ᠣᠷᠣᠭᠰᠠᠨ ᠵᠢᠭᠦᠷᠲᠡᠨ ᠪᠣᠯᠣᠨ᠎ᠠ᠃      ᠤᠯᠠᠭᠠᠨ ᠬᠥᠯᠲᠦ ᠭᠦᠢᠭᠦᠨᠡᠭ ᠬᠠᠷᠴᠠᠭᠠᠶᠢᠯᠢᠭ ᠰᠢᠪᠠᠭᠤᠨ ᠤ ᠪᠠᠭ᠂ ᠨᠠᠴᠢᠨ ᠤ ᠢᠵᠠᠭᠤᠷ᠂ ᠲᠥᠷᠥᠯ᠃ ᠪᠡᠶ᠎ᠡ ᠶᠢᠨ ᠤᠷᠲᠤ ᠨᠢ 29 cm᠂ ᠳᠠᠯᠠᠪᠴᠢ ᠨᠢ 23 cm᠂ ᠰᠡᠭᠦᠯ ᠨᠢ 14cm᠂ ᠬᠤᠰᠢᠭᠤ ᠨᠢ 1. 7cm᠂ ᠤᠯᠠ ᠪᠡᠷᠪᠡᠭᠡᠷ ᠨᠢ 2.8cm ᠬᠦᠷᠳᠡᠭ᠃ ᠬᠤᠰᠢᠭᠤ ᠨᠢ ᠣᠬᠤᠷ ᠰᠢᠷ᠎ᠠ᠂ ᠦᠵᠦᠭᠦᠷ ᠨᠢ ᠬᠥᠬᠦᠪᠲᠥᠷ ᠮᠠᠬᠢᠷ᠂ ᠰᠢᠳᠦᠯᠢᠭ ᠳᠠᠷ ᠲᠠᠢ᠂ ᠤᠭ ᠲᠤ ᠪᠠᠨ ᠤᠯᠠᠪᠤᠷ ᠰᠢᠷ᠎ᠠ ᠪᠦᠷᠬᠦᠭᠦᠯ ᠲᠠᠢ᠂ ᠬᠠᠮᠠᠷ ᠤᠨ ᠨᠥᠬᠡ ᠨᠢ ᠲᠥᠭᠦᠷᠢᠭ᠂ ᠳᠤᠮᠳᠠ ᠪᠠᠨ ᠲᠣᠪᠣᠴᠠᠭ ᠲᠠᠢ᠃ ᠨᠢᠳᠦ ᠨᠢ ᠬᠦᠷᠡᠩ᠂ ᠵᠣᠪᠬᠢ ᠨᠢ ᠤᠯᠠᠪᠤᠷ ᠰᠢᠷ᠎ᠠ᠃ ᠬᠥᠯ ᠨᠢ ᠬᠦᠷᠡᠪᠲᠦᠷ ᠤᠯᠠᠭᠠᠨ᠂ ᠬᠢᠮᠤᠰᠤ ᠨᠢ ᠴᠠᠶᠢᠪᠤᠷ ᠬᠥᠬᠡ᠃ ᠲᠣᠯᠣᠭᠠᠢ ᠠᠴᠠ ᠪᠠᠨ ᠡᠬᠢᠯᠡᠨ ᠨᠢᠷᠤᠭᠤ ᠪᠡᠶ᠎ᠡ  ᠨᠢ ᠰᠡᠭᠦᠯ ᠬᠦᠷᠲᠡᠯ᠎ᠡ ᠪᠠᠨ ᠬᠠᠷᠠᠪᠲᠤᠷ ᠴᠢᠯᠠᠭᠤᠨ ᠬᠥᠬᠡ ᠥᠩᠭᠡ ᠲᠠᠢ᠂ ᠡᠯᠢᠭᠡᠨ ᠲᠠᠯ᠎ᠠ ᠨᠢ ᠨᠠᠬᠠᠢ ᠠᠴᠠ ᠪᠠᠨ ᠡᠬᠢᠯᠡᠨ ᠬᠥᠯ ᠬᠦᠷᠲᠡᠯ᠎ᠡ ᠪᠠᠨ ᠴᠠᠶᠢᠪᠤᠷ ᠴᠢᠯᠠᠭᠤᠨ ᠬᠥᠬᠡ ᠥᠩᠭᠡ ᠲᠠᠢ᠃ ᠬᠤᠶᠠᠷ ᠬᠥᠯ ᠪᠣᠯᠣᠨ ᠰᠡᠭᠦᠯ ᠤᠨ ᠲᠣᠳᠣᠷ᠎ᠠ ᠪᠦᠷᠬᠦᠭᠦᠯ ᠥᠳᠥ ᠨᠢ ᠭᠦᠨ ᠬᠦᠷᠡᠩ ᠤᠯᠠᠭᠠᠨ᠂ ᠳᠠᠯᠠᠪᠴᠢ ᠪᠠ ᠰᠡᠭᠦᠯ ᠤᠨ ᠥᠳᠥ ᠨᠢ ᠬᠦᠷᠡᠪᠲᠦᠷ᠂ ᠳᠠᠯᠠᠪᠴᠢᠨ ᠤ ᠲᠣᠳᠣᠷ᠎ᠠ ᠪᠦᠷᠬᠦᠭᠦᠯ ᠥᠳᠥ ᠨᠢ ᠪᠥᠷ ᠴᠠᠭᠠᠨ ᠪᠠᠶᠢᠳᠠᠭ᠃       ᠠᠭᠤᠯᠠ ᠲᠠᠯ᠎ᠠ ᠪᠠᠷ ᠨᠤᠲᠤᠭᠰᠢᠵᠤ᠂ ᠴᠠᠷᠴᠠᠬᠠᠢ᠂ ᠬᠦᠷᠡᠯᠵᠢ ᠵᠡᠷᠭᠡ ᠪᠠᠷ ᠢᠳᠡᠰᠢ ᠪᠣᠯᠭᠠᠳᠠᠭ᠃ ᠶᠡᠷᠦᠳᠡᠭᠡᠨ ᠱᠠᠭᠠᠵᠠᠭᠠᠢ ᠶᠢᠨ ᠡᠭᠦᠷ ᠢ ᠪᠤᠯᠢᠶᠠᠳᠠᠭ ᠪᠠ ᠵᠠᠷᠢᠮ ᠳᠤ ᠪᠠᠨ ᠥᠪᠡᠷᠲᠡᠭᠡᠨ ᠡᠭᠦᠷ ᠪᠠᠷᠢᠳᠠᠭ᠃ 3 — 5 ᠬᠦᠷᠡᠩ ᠪᠢᠳᠠᠷ ᠪᠦᠬᠦᠢ ᠴᠠᠭᠠᠨ ᠰᠢᠷᠠᠪᠲᠤᠷ ᠥᠨᠳᠡᠭᠡ ᠭᠠᠷᠭᠠᠳᠠᠭ᠃ ᠰᠢᠪᠠᠵᠢ ᠶᠢ ᠶᠡᠭᠡ ᠬᠡᠮᠵᠢᠶ᠎ᠡ ᠪᠠᠷ ᠤᠰᠠᠳᠬᠠᠳᠠᠭ᠃       ᠤᠮᠠᠷᠠᠲᠤ ᠣᠷᠣᠨ ᠢᠶᠠᠷ ᠦᠷᠡᠵᠢᠵᠦ᠂ ᠡᠨᠡᠳᠬᠡ ᠪᠠ ᠠᠹᠷᠢᠺᠡ ᠶᠢᠨ ᠵᠡᠭᠦᠨ ᠭᠡᠰᠡᠭ ᠲᠤ ᠬᠦᠷᠴᠦ ᠡᠪᠦᠯᠵᠢᠳᠡᠭ᠃ ᠤᠯᠤᠰ ᠤᠨ ᠬᠤᠶᠠᠳᠤᠭᠠᠷ ᠳᠡᠰ ᠤᠨ ᠬᠠᠮᠠᠭᠠᠯᠠᠯᠲᠠ ᠳᠤ ᠪᠦᠷᠢᠳᠬᠡᠭᠦᠯᠦᠭᠰᠡᠨ ᠵᠢᠭᠦᠷᠲᠡᠨ ᠪᠣᠯᠣᠨ᠎ᠠ᠃       ᠱᠣᠩᠬᠤᠷ ᠬᠠᠷᠴᠠᠭᠠᠶᠢᠯᠢᠭ ᠰᠢᠪᠠᠭᠤᠨ ᠤ ᠪᠠᠭ᠂ ᠨᠠᠴᠢᠨ ᠤ ᠢᠵᠠᠭᠤᠷ᠂ ᠲᠥᠷᠥᠯ᠃ ᠪᠡᠶ᠎ᠡ ᠶᠢᠨ ᠤᠷᠲᠤ  ᠨᠢ 35 cm᠂ ᠳᠠᠯᠠᠪᠴᠢ ᠨᠢ 23.5 cm᠂ ᠰᠡᠭᠦᠯ ᠨᠢ 16.9 cm᠂ ᠬᠤᠰᠢᠭᠤ ᠨᠢ 1.8cm᠂ ᠤᠯᠠ ᠪᠡᠷᠪᠡᠭᠡᠷ ᠨᠢ 3.9cm ᠬᠦᠷᠳᠡᠭ᠃ ᠬᠤᠰᠢᠭᠤ ᠨᠢ ᠣᠬᠤᠷ ᠬᠥᠬᠡᠪᠲᠥᠷ᠂ ᠦᠵᠦᠭᠦᠷ ᠨᠢ ᠮᠠᠬᠢᠷ ᠬᠠᠷ᠎ᠠ᠂ ᠤᠭ ᠲᠤ ᠪᠠᠨ ᠰᠢᠷ᠎ᠠ ᠯᠠᠯᠢᠭ ᠪᠦᠷᠬᠦᠭᠦᠯ ᠲᠠᠢ᠂ ᠬᠠᠮᠠᠷ ᠤᠨ ᠨᠥᠬᠡ ᠨᠢ ᠲᠥᠭᠦᠷᠢᠭ᠂ ᠲᠤᠮᠳᠠ ᠪᠠᠨ ᠭᠦᠳᠦᠭᠡᠷ ᠲᠠᠢ᠃ ᠨᠢᠳᠦ ᠨᠢ ᠬᠦᠷᠡᠩ᠂ ᠵᠣᠪᠬᠢ ᠨᠢ ᠰᠢᠷ᠎ᠠ᠂ ᠬᠥᠯ ᠨᠢ ᠰᠢᠷ᠎ᠠ᠂ ᠬᠢᠮᠤᠰᠤ ᠨᠢ ᠬᠠᠷ᠎ᠠ᠃ ᠲᠣᠯᠣᠭᠠᠢ ᠶᠢᠨ ᠣᠷᠣᠢ᠂ ᠲᠤᠬᠤ ᠪᠣᠯᠣᠨ ᠬᠦᠵᠦᠭᠦᠨ ᠤ ᠠᠷᠤ ᠨᠢ ᠬᠥᠬᠡᠪᠲᠥᠷ ᠪᠣᠷᠤ᠂ ᠨᠠᠷᠢᠨ ᠬᠠᠷ᠎ᠠ ᠵᠤᠷᠪᠤᠰ ᠤᠳ ᠲᠠᠢ᠂ ᠵᠠᠪᠠᠵᠢ ᠶᠢᠨ ᠳᠡᠭᠡᠲᠦ ᠰᠠᠬᠠᠯᠯᠢᠭ ᠵᠣᠷᠪᠣᠰ ᠨᠢ ᠬᠥᠬᠡᠪᠲᠥᠷ ᠬᠠᠷ᠎ᠠ᠂ ᠠᠷᠤ ᠮᠥᠷᠥ ᠪᠠ ᠳᠠᠯᠠᠪᠴᠢᠨ ᠤ ᠭᠠᠳᠠᠷ ᠪᠦᠷᠬᠦᠬᠦᠯ ᠥᠳᠥ ᠨᠢ ᠬᠦᠷᠡᠪᠲᠦᠷ ᠤᠯᠠᠭᠠᠨ᠂ ᠥᠳᠥ ᠪᠦᠷᠢ ᠳᠡᠭᠡᠨ ᠭᠤᠷᠪᠠᠯᠵᠢᠨ ᠬᠠᠷ᠎ᠠ ᠲᠣᠯᠪᠤ ᠲᠠᠢ᠂ ᠨᠢᠷᠤᠭᠤ ᠪᠣᠯᠣᠨ ᠰᠡᠭᠦᠯ ᠤᠨ ᠭᠠᠳᠠᠷ ᠪᠦᠷᠬᠦᠭᠦᠯ ᠥᠳᠥ ᠨᠢ ᠬᠥᠬᠡᠪᠲᠥᠷ ᠪᠣᠷᠤ᠂ ᠳᠠᠯᠠᠪᠴᠢᠨ ᠤ ᠨᠢᠰᠦᠯᠲᠡ ᠶᠢᠨ ᠥᠳᠥ ᠨᠢ ᠬᠥᠬᠡᠪᠲᠥᠷ ᠬᠠᠷ᠎ᠠ᠂ ᠰᠡᠭᠦᠯ ᠤᠨ ᠥᠳᠥ ᠨᠢ ᠬᠥᠬᠡᠪᠲᠥᠷ ᠬᠦᠷᠡᠩ᠂ ᠦᠵᠦᠭᠦᠷ ᠨᠢ ᠴᠠᠭᠠᠨ᠂ ᠬᠤᠶᠢᠭᠤᠷ ᠢᠶᠠᠨ ᠨᠢᠭᠡ ᠬᠠᠷ᠎ᠠ ᠥᠷᠭᠡᠨ ᠵᠣᠷᠪᠣᠰ ᠲᠠᠢ᠃ ᠡᠯᠢᠭᠡᠨ ᠪᠡᠶ᠎ᠡ ᠨᠢ ᠬᠤᠸᠠ ᠰᠢᠷ᠎ᠠ᠂ ᠬᠠᠷ᠎ᠠ ᠬᠦᠷᠡᠩ ᠲᠣᠯᠪᠤ ᠲᠠᠢ᠃ ᠬᠥᠯ  ᠠᠴᠠ ᠪᠠᠨ ᠬᠤᠶᠢᠰᠢ ᠴᠠᠭᠠᠨ ᠪᠣᠯᠳᠠᠭ᠃       ᠠᠶᠢᠯ ᠲᠤᠰᠬᠤᠨ ᠤ ᠣᠶᠢᠷᠠᠯᠴᠠᠭ᠎ᠠ᠂ ᠰᠡᠶᠢᠷᠡᠭ ᠣᠢ ᠶᠢᠨ ᠬᠥᠪᠡᠭᠡ ᠵᠡᠷᠭᠡ ᠭᠠᠵᠠᠷ ᠢᠶᠠᠷ ᠰᠢᠪᠠᠵᠢ᠂ ᠵᠢᠵᠢᠭ ᠰᠢᠪᠠᠭᠤ᠂ ᠬᠤᠯᠤᠭᠠᠨ᠎ᠠ ᠵᠡᠷᠭᠡ ᠶᠢ ᠪᠠᠷᠢᠵᠤ ᠢᠳᠡᠳᠡᠭ᠃ ᠬᠡᠷᠢᠶ᠎ᠡ᠂ ᠱᠠᠭᠠᠵᠠᠭᠠᠢ ᠶᠢᠨ ᠡᠭᠦᠷ ᠲᠤ ᠪᠤᠶᠤ ᠬᠠᠳᠠ ᠴᠢᠯᠠᠭᠤᠨ ᠤ ᠠᠩ ᠵᠠᠪᠰᠠᠷ ᠡᠭᠦᠷᠯᠡᠵᠦ᠂ 4 — 6 ᠬᠥᠷᠡᠪᠲᠦᠷ ᠪᠢᠲᠡᠷ ᠪᠦᠬᠦᠢ ᠴᠠᠭᠠᠨ ᠥᠨᠳᠡᠭᠡ ᠭᠠᠷᠭᠠᠳᠠᠭ᠃     ᠥᠪᠥᠷ ᠮᠣᠩᠭᠤᠯ ᠣᠷᠣᠨ ᠳᠤ ᠨᠡᠶᠢᠳᠡᠮ ᠬᠠᠷᠠᠭᠳᠠᠳᠠᠭ ᠤᠯᠤᠰ ᠤᠨ ᠬᠤᠶᠠᠳᠤᠭᠠᠷ ᠳᠡᠰ ᠤᠨ ᠬᠠᠮᠠᠭᠠᠯᠠᠯᠲᠠ ᠳᠤ ᠪᠦᠷᠢᠳᠬᠡᠭᠦᠯᠦᠭᠰᠡᠨ ᠵᠢᠭᠦᠷᠲᠡᠨ ᠪᠣᠯᠣᠨ᠎ᠠ᠃      ᠡᠯᠢᠶ᠎ᠡ ᠬᠠᠷᠴᠠᠭᠠᠶᠢᠯᠢᠭ ᠰᠢᠪᠠᠭᠤᠨ ᠤ ᠪᠠᠭ᠂ ᠬᠠᠷᠴᠠᠭᠠᠢ ᠶᠢᠨ ᠢᠵᠠᠭᠤᠷ᠂ ᠡᠯᠢᠶ᠎ᠡ ᠶᠢᠨ ᠲᠥᠷᠥᠯ᠃ ᠪᠡᠶ᠎ᠡ ᠶᠢᠨ ᠤᠷᠲᠤ ᠨᠢ 61.7 cm᠂ ᠳᠠᠯᠠᠪᠴᠢ ᠨᠢ 47.4 cm᠂ ᠰᠡᠭᠦᠯ ᠨᠢ 30.5 cm᠂ ᠬᠤᠰᠢᠭᠤ  ᠨᠢ 4 cm᠂ ᠤᠯᠠ ᠪᠡᠷᠪᠡᠭᠡᠷ ᠨᠢ 6 cm ᠬᠦᠷᠳᠡᠭ᠃ ᠬᠤᠰᠢᠭᠤ ᠨᠢ ᠬᠥᠬᠡᠪᠲᠥᠷ ᠮᠠᠬᠢᠷ᠂ ᠤᠭ ᠲᠤ ᠪᠠᠨ ᠰᠢᠷᠠᠪᠲᠤᠷ ᠨᠣᠭᠤᠭᠠᠨ ᠯᠠᠯᠢᠭ ᠪᠦᠷᠬᠦᠭᠦᠯ ᠲᠠᠢ᠂ ᠬᠠᠮᠠᠷ ᠤᠨ ᠨᠥᠬᠡ ᠨᠢ ᠵᠣᠣᠪᠠᠩ ᠲᠥᠭᠦᠷᠢᠭ ᠬᠡᠯᠪᠡᠷᠢ ᠲᠠᠢ᠃ ᠨᠢᠳᠦ ᠨᠢ ᠬᠦᠷᠡᠪᠲᠦᠷ ᠬᠠᠷ᠎ᠠ᠂ ᠬᠥᠯ ᠨᠢ ᠪᠣᠷᠣᠪᠲᠤᠷ ᠰᠢᠷ᠎ᠠ᠂ ᠬᠢᠮᠤᠰᠤ ᠨᠢ ᠬᠠᠷ᠎ᠠ᠂ ᠣᠯᠠ ᠪᠡᠷᠪᠡᠭᠡᠷ ᠨᠢ ᠣᠬᠤᠷ ᠪᠠᠶᠢᠳᠠᠭ᠃ ᠲᠣᠯᠣᠭᠠᠢ ᠪᠠ ᠮᠥᠷᠥᠨ ᠤ ᠬᠡᠰᠡᠭ ᠨᠢ ᠰᠢᠷᠠᠪᠲᠤᠷ ᠬᠦᠷᠡᠩ᠂ ᠥᠳᠥᠨ ᠤ ᠭᠤᠣᠯ ᠨᠢ ᠬᠠᠷᠠᠪᠲᠤᠷ ᠬᠦᠷᠡᠩ᠃ ᠪᠥᠬᠦ ᠨᠢᠷᠤᠭᠤᠨ ᠪᠡᠶ᠎ᠡ ᠨᠢ ᠬᠠᠷ᠎ᠠ ᠬᠦᠷᠡᠩ᠂ ᠥᠳᠥᠨ ᠤ ᠭᠤᠤᠯ ᠨᠢ ᠬᠠᠷᠠᠪᠲᠤᠷ᠃ ᠬᠤᠭᠤᠯᠢ ᠨᠢ ᠴᠠᠭᠠᠨ᠂ ᠥᠳᠥᠨ ᠤ ᠦᠵᠦᠭᠦᠷ ᠨᠢ ᠬᠦᠷᠡᠪᠲᠦᠷ᠃ ᠡᠯᠢᠭᠡᠨ ᠪᠡᠶ᠎ᠡ ᠪᠠ ᠰᠡᠭᠦᠯ ᠤᠨ ᠲᠣᠳᠣᠷ᠎ᠠ ᠪᠦᠷᠬᠦᠭᠦᠯ ᠥᠳᠥ  ᠨᠢ ᠤᠯᠠᠪᠤᠷ ᠬᠦᠷᠡᠩ᠂ ᠥᠳᠥᠨ ᠤ ᠭᠤᠣᠯ ᠨᠢ ᠬᠠᠷ᠎ᠠ ᠬᠦᠷᠡᠩ᠃ ᠳᠠᠯᠠᠪᠴᠢ ᠪᠠ ᠰᠡᠭᠦᠯ ᠨᠢ ᠬᠠᠷᠠᠪᠲᠤᠷ ᠪᠣᠷᠣ᠂ ᠪᠠᠷᠠᠭᠠᠪᠲᠤᠷ ᠬᠥᠨᠳᠡᠯᠡᠨ ᠵᠥᠷᠪᠣᠰ ᠲᠠᠢ᠃ ᠳᠠᠯᠠᠪᠴᠢᠨ ᠤ ᠳᠣᠣᠷ᠎ᠠ ᠪᠠᠨ ᠴᠠᠭᠠᠨ ᠲᠥᠯᠥᠪᠲᠥᠷ ᠲᠣᠯᠪᠤ ᠲᠠᠢ᠃ ᠰᠡᠭᠦᠯ ᠨᠢ ᠤᠨᠤᠭᠤ ᠲᠠᠢ ᠪᠠᠶᠢᠳᠠᠭ ᠢᠶᠠᠷ ᠢᠶᠠᠨ ᠪᠤᠰᠤᠳ ᠠᠴᠠ ᠣᠨᠴᠠ ᠢᠯᠭᠠᠭᠳᠠᠳᠠᠭ᠃     ᠦᠷᠭᠦᠯᠵᠢ ᠠᠶᠢᠯ ᠲᠤᠰᠬᠤᠨ ᠤ ᠣᠶᠢᠷᠠᠯᠴᠠᠭ᠎ᠠ ᠡᠯᠢᠨ ᠬᠠᠯᠢᠨ ᠨᠢᠰᠴᠦ ᠭᠤᠣᠯᠳᠠᠭᠤ ᠵᠢᠵᠢᠭ ᠰᠢᠪᠠᠭᠤ᠂ ᠬᠤᠯᠤᠭᠠᠨ᠎ᠠ᠂ ᠮᠡᠯᠡᠬᠡᠢ᠂ ᠮᠣᠭᠠᠢ ᠵᠡᠷᠭᠡ ᠪᠠ ᠦᠬᠦᠲᠡᠯ ᠰᠡᠭ ᠢᠶᠠᠷ ᠢᠳᠡᠰᠢ ᠪᠣᠯᠭᠠᠳᠠᠭ᠃ ᠬᠠᠳᠠ ᠴᠢᠯᠠᠭᠤᠨ ᠤ ᠣᠷᠣᠢ ᠪᠤᠶᠤ ᠮᠣᠳᠣᠨ ᠲᠡᠭᠡᠷ᠎ᠡ ᠡᠭᠦᠷᠯᠡᠵᠦ᠂ 2 — 3 ᠴᠠᠶᠢᠪᠤᠷ ᠨᠣᠭᠤᠭᠠᠨ ᠥᠨᠳᠡᠭᠡ ᠭᠠᠷᠭᠠᠳᠠᠭ ᠠᠩᠭᠠᠬᠠᠶᠢᠲᠤ ᠰᠢᠪᠠᠭᠤ ᠪᠣᠯᠣᠨ᠎ᠠ᠃      ᠥᠪᠥᠷ ᠮᠣᠩᠭᠤᠯ ᠣᠷᠣᠨ ᠳᠤ ᠨᠡᠶᠢᠳᠡᠮ ᠬᠠᠷᠠᠭᠳᠠᠳᠠᠭ ᠤᠯᠤᠰ ᠤᠨ ᠬᠤᠶᠠᠳᠤᠭᠠᠷ ᠳᠡᠰ ᠤᠨ ᠬᠠᠮᠠᠭᠠᠯᠠᠯᠲᠠ ᠳᠤ ᠪᠦᠷᠢᠳᠬᠡᠭᠦᠯᠦᠭᠰᠡᠨ ᠵᠢᠭᠦᠷᠲᠡᠨ᠃      ᠬᠠᠷᠴᠠᠭᠠᠢ ᠬᠠᠷᠴᠠᠭᠠᠶᠢᠯᠢᠭ ᠰᠢᠪᠠᠭᠤᠨ ᠤ ᠪᠠᠭ᠂ ᠬᠠᠷᠴᠠᠭᠠᠢ ᠶᠢᠨ ᠢᠵᠠᠭᠤᠷ᠂ ᠲᠥᠷᠥᠯ᠃ ᠪᠡᠶ᠎ᠡ ᠶᠢᠨ ᠤᠷᠲᠤ ᠨᠢ 51cm᠂ ᠳᠠᠯᠠᠪᠴᠢ ᠨᠢ 29.3cm᠂ ᠰᠡᠭᠦᠯ ᠨᠢ 23.2cm᠂ ᠬᠤᠰᠢᠭᠤ ᠨᠢ 2.7cm᠂ ᠤᠯᠠ ᠪᠡᠷᠪᠡᠬᠡᠢ ᠨᠢ 6.8cm ᠬᠦᠷᠳᠡᠭ᠃ ᠬᠤᠰᠢᠭᠤ ᠨᠢ ᠬᠥᠬᠡᠪᠲᠦᠷ ᠮᠠᠬᠢᠷ᠂ ᠤᠭ ᠲᠠᠭᠠᠨ ᠰᠢᠷᠠᠪᠲᠤᠷ ᠨᠣᠭᠤᠭᠠᠨ ᠯᠠᠯᠢᠭ ᠪᠦᠷᠬᠦᠭᠦᠯ ᠲᠠᠢ᠂ ᠬᠠᠮᠠᠷ ᠤᠨ ᠨᠥᠬᠡ ᠨᠢ ᠵᠣᠣᠪᠠᠩ ᠲᠥᠭᠦᠷᠢᠭ ᠬᠡᠯᠪᠡᠷᠢᠲᠡᠢ᠃ ᠨᠢᠳᠦ ᠨᠢ ᠠᠯᠲᠠᠨ ᠰᠢᠷ᠎ᠠ᠃ ᠬᠥᠯ ᠨᠢ ᠰᠢᠷ᠎ᠠ᠂ ᠤᠯᠠ ᠪᠡᠷᠪᠡᠬᠡᠢ ᠨᠢ ᠤᠷᠲᠤᠪᠲᠤᠷ ᠪᠠᠶᠢᠳᠠᠭ᠃ ᠠᠷᠤ ᠪᠡᠶ᠎ᠡ ᠨᠢ ᠬᠥᠬᠡᠪᠲᠦᠷ ᠪᠣᠷᠣ ᠪᠠᠶᠢᠵᠤ᠂ ᠰᠡᠭᠦᠯ ᠳᠡᠭᠡᠷ᠎ᠡ ᠪᠠᠨ 4 ᠬᠥᠨᠳᠡᠯᠡᠨ ᠪᠠᠷᠠᠭᠠᠨ ᠵᠣᠷᠪᠣᠰ ᠲᠠᠢ᠂ ᠰᠡᠭᠦᠯ ᠤᠨ ᠦᠵᠦᠭᠦᠷ  ᠨᠢ ᠴᠠᠭᠠᠨ᠃ ᠬᠥᠮᠦ᠋ᠢᠰᠦᠭᠡᠢ ᠶᠢᠨ ᠬᠡᠰᠡᠭ ᠨᠢ ᠴᠠᠶᠢᠪᠤᠷ᠂ ᠨᠢᠳᠦᠨ ᠠᠴᠠ ᠬᠤᠶᠢᠰᠢ ᠪᠠᠨ ᠪᠠᠷᠠᠭᠠᠨ᠂ ᠮᠥᠷᠥ ᠪᠣᠯᠣᠨ ᠰᠡᠭᠦᠯ ᠤᠨ ᠳᠡᠭᠡᠲᠦ ᠥᠳᠥ ᠨᠢ ᠴᠠᠶᠢᠪᠤᠷ ᠬᠥᠪᠡᠭᠡ ᠲᠠᠢ ᠪᠠᠶᠢᠳᠠᠭ᠃ ᠡᠯᠢᠭᠡᠨ ᠪᠡᠶ᠎ᠡ ᠨᠢ ᠴᠠᠶᠢᠪᠤᠷ᠂ ᠬᠤᠭᠤᠯᠠᠢ ᠳᠤ ᠪᠠᠨ ᠬᠠᠷᠠᠪᠲᠤᠷ ᠵᠣᠷᠪᠣᠰ ᠤᠳ ᠲᠣᠷᠴᠠᠢ᠂ ᠬᠡᠪᠡᠯᠢ ᠶᠢᠨ ᠬᠡᠰᠡᠭ ᠲᠤ ᠪᠠᠨ ᠬᠥᠨᠳᠡᠯᠡᠨ ᠬᠠᠷ᠎ᠠ ᠵᠣᠷᠪᠣᠰ ᠤᠳ ᠲᠠᠢ᠃ ᠳᠠᠯᠠᠪᠴᠢ ᠨᠢ ᠬᠠᠷ᠎ᠠ ᠬᠥᠬᠡᠪᠲᠦᠷ ᠭᠦᠷᠡᠩ᠂ ᠮᠥᠨ ᠬᠥᠨᠳᠡᠯᠡᠨ ᠪᠠᠷᠠᠭᠠᠨ ᠰᠤᠳᠠᠯ ᠤᠳ  ᠲᠠᠢ᠃      ᠣᠶᠢᠲᠤ ᠠᠭᠤᠯᠠᠷᠬᠠᠭ ᠭᠠᠵᠠᠷ ᠢᠶᠠᠷ ᠪᠠᠶᠢᠷᠢᠯᠠᠨ ᠵᠢᠵᠢᠭ ᠰᠢᠪᠠᠭᠤ᠂ ᠬᠤᠯᠤᠭᠠᠨ᠎ᠠ᠂ ᠲᠠᠤᠯᠠᠢ ᠵᠡᠷᠭᠡ ᠶᠢ ᠪᠠᠷᠢᠵᠤ ᠢᠳᠡᠳᠡᠭ᠃ ᠶᠡᠷᠦᠳᠡᠭᠡᠨ ᠥᠨᠳᠥᠷ ᠮᠣᠳᠣᠨ ᠳᠡᠭᠡᠷ᠎ᠡ ᠡᠭᠦᠷᠯᠡᠨ 2 - 4 ᠬᠥᠬᠡᠪᠲᠦᠷ ᠥᠨᠳᠡᠭᠡ ᠭᠠᠷᠭᠠᠳᠠᠭ ᠠᠩᠭᠠᠷᠬᠠᠶᠢᠲᠤ ᠰᠢᠪᠠᠭᠤ ᠪᠣᠯᠣᠨ᠎ᠠ᠃ ᠲᠡᠵᠢᠭᠡᠨ ᠳᠠᠰᠬᠠᠵᠤ ᠠᠩ ᠳᠤ ᠬᠡᠷᠡᠭᠯᠡᠳᠡᠭ ᠠᠩᠴᠢᠨ ᠰᠢᠪᠠᠭᠤ᠃     ᠲᠤᠰ ᠬᠤᠰᠢᠭᠤᠨ ᠳᠤ ᠦᠷᠭᠦᠯᠵᠢ ᠨᠤᠲᠤᠭᠰᠢᠳᠠᠭ ᠤᠯᠤᠰ ᠤᠨ ᠬᠤᠶᠠᠳᠤᠭᠠᠷ ᠳᠡᠰ ᠤᠨ ᠬᠠᠮᠠᠭᠠᠯᠠᠯᠲᠠ ᠳᠤ ᠣᠷᠣᠭᠰᠠᠨ ᠵᠢᠭᠦᠷᠲᠡᠨ ᠪᠣᠯᠣᠨ᠎ᠠ᠃      ᠶᠣᠯᠣ ᠬᠠᠷᠴᠠᠭᠠᠶᠢᠯᠢᠭ ᠰᠢᠪᠠᠭᠤᠨ ᠤ ᠪᠠᠭ᠂ ᠬᠠᠷᠴᠠᠭᠠᠢ ᠶᠢᠨ ᠢᠵᠠᠭᠤᠷ᠂ ᠶᠣᠯᠣ ᠶᠢᠨ ᠲᠥᠷᠥᠯ᠃ ᠪᠡᠶ᠎ᠡ ᠶᠢᠨ ᠤᠷᠲᠤ ᠨᠢ 118cm᠂ ᠳᠠᠯᠠᠪᠴᠢ ᠨᠢ 76.5cm᠂ ᠰᠡᠭᠦᠯ ᠨᠢ 41cm᠂ ᠬᠤᠰᠢᠭᠤ ᠨᠢ 7. 1cm᠂ ᠤᠯᠠ ᠪᠡᠷᠪᠡᠬᠡᠢ ᠨᠢ 13.6cm ᠬᠦᠷᠳᠡᠭ᠃ ᠬᠤᠰᠢᠭᠤ ᠨᠢ ᠬᠥᠬᠡᠪᠲᠦᠷ ᠬᠠᠷ᠎ᠠ᠂ ᠤᠷᠲᠤᠪᠲᠤᠷ ᠪᠥᠭᠡᠳ ᠮᠠᠬᠢᠷ᠂ ᠤᠭ ᠲᠠᠭᠠᠨ ᠬᠥᠬᠡᠪᠲᠦᠷ ᠯᠠᠯᠢᠭ ᠪᠦᠷᠬᠦᠭᠦᠯ ᠲᠠᠢ᠂ ᠬᠠᠮᠠᠷ ᠤᠨ ᠨᠥᠬᠡ ᠨᠢ ᠲᠥᠭᠦᠷᠢᠭ ᠬᠡᠯᠪᠡᠷᠢᠲᠡᠢ᠃ ᠨᠢᠳᠦ ᠨᠢ ᠬᠦᠷᠡᠩ᠃ ᠬᠥᠯ ᠨᠢ ᠴᠠᠶᠢᠪᠤᠷ ᠬᠥᠬᠡ᠂ ᠬᠢᠮᠤᠰᠤ ᠨᠢ ᠬᠠᠷ᠎ᠠ᠂ ᠤᠯᠠ ᠪᠡᠷᠪᠡᠬᠡᠢ ᠨᠢ ᠣᠬᠤᠷ ᠪᠠᠶᠢᠳᠠᠭ᠃ ᠲᠣᠯᠣᠭᠠᠢ ᠨᠢ ᠴᠠᠶᠢᠪᠤᠷ ᠪᠣᠷᠣ ᠨᠣᠯᠤᠤᠷ ᠥᠳᠥ ᠪᠠᠷ ᠪᠦᠷᠬᠦᠭᠳᠡᠵᠦ᠂ ᠬᠦᠵᠦᠭᠦᠨ ᠤ ᠬᠡᠰᠡᠭ  ᠨᠢ ᠨᠢᠴᠦᠭᠦᠨ᠂ ᠬᠥᠬᠡᠪᠲᠦᠷ ᠥᠩᠭᠡ ᠲᠠᠢ᠂ ᠬᠦᠵᠦᠭᠦᠦ ᠨᠢ ᠰᠠᠭᠰᠠᠭᠠᠷ ᠤᠷᠲᠤᠪᠲᠤᠷ ᠬᠦᠷᠡᠩ ᠨᠣᠯᠤᠤᠷ ᠥᠳᠥ  ᠲᠠᠢ᠃ ᠳᠠᠯᠠᠪᠴᠢ᠂ ᠰᠡᠭᠦᠯ ᠤᠨ ᠥᠳᠥ ᠨᠢ ᠬᠠᠷᠠᠪᠲᠤᠷ ᠪᠠᠷᠠᠭᠠᠨ ᠪᠠᠶᠢᠳᠠᠭ ᠠᠴᠠ ᠭᠠᠳᠠᠨ᠎ᠠ ᠪᠥᠬᠦ ᠪᠡᠶ᠎ᠡ ᠨᠢ ᠪᠦᠷ ᠬᠠᠨᠷᠠᠪᠲᠤᠷ ᠬᠦᠷᠡᠩ ᠥᠩᠭᠡ ᠲᠠᠢ᠃ ᠠᠭᠤᠯᠠ ᠲᠠᠯ᠎ᠠ ᠪᠠᠷ ᠬᠠᠯᠢᠨ ᠰᠢᠪᠠᠭᠤ ᠪᠠᠷᠢᠬᠤ ᠪᠤᠶᠤ ᠠᠷᠢᠶᠠᠲᠠᠨ ᠤ ᠦᠬᠦᠳᠡᠯ ᠢᠶᠠᠷ ᠢᠳᠡᠰᠢ ᠪᠣᠯᠭᠠᠳᠠᠭ᠃ ᠥᠨᠳᠥᠷ ᠠᠭᠤᠯᠠ ᠬᠠᠳᠠ᠂ ᠮᠣᠳᠣᠨ ᠳᠤ ᠡᠭᠦᠷᠯᠡᠨ᠂ ᠨᠢᠭᠡ ᠪᠤᠶᠤ ᠬᠤᠶᠠᠷ ᠴᠠᠭᠠᠨ ᠥᠨᠳᠡᠭᠡ ᠭᠠᠷᠭᠠᠳᠠᠭ ᠠᠩᠭᠠᠷᠬᠠᠶᠢᠲᠤ ᠰᠢᠪᠠᠭᠤ ᠪᠣᠯᠣᠨ᠎ᠠ᠃ ᠲᠤᠰ ᠬᠤᠰᠢᠭᠤᠨ ᠳᠤ ᠵᠢᠮᠢᠰᠲᠠᠢ ᠶᠢᠨ ᠠᠭᠤᠯᠠ᠂ ᠮᠢᠩᠭᠠᠨ ᠤ ᠠᠭᠤᠯᠠᠨ ᠳᠤ ᠡᠭᠦᠷᠯᠡᠭᠰᠡᠨ ᠪᠠᠶᠢᠳᠠᠭ᠃ ᠤᠯᠤᠰ ᠤᠨ ᠬᠤᠶᠠᠳᠤᠭᠠᠷ ᠳᠡᠰ ᠤᠨ ᠬᠠᠮᠠᠭᠠᠯᠠᠯᠲᠠ ᠳᠤ ᠣᠷᠣᠭᠰᠠᠨ ᠵᠢᠭᠦᠷᠲᠡᠨ ᠪᠣᠯᠣᠨ᠎ᠠ᠃
  
ᠢᠷᠡᠯᠲᠡ᠄ ᠰᠢᠭᠤᠶᠢᠲᠤ ᠲᠣᠭᠤᠷᠢᠭ ᠤᠨ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠣᠷᠳᠣᠨ ᠤ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠬᠠᠪᠣᠲᠣ ᠬᠠᠰᠠᠷ ᠤᠨ ᠳᠠᠬᠢᠯᠭ᠎ᠠ ᠶᠢᠨ ᠣᠷᠳᠣᠨ
ᠠᠵᠢᠯ ᠲᠥᠷᠥᠯ ᠤᠨ ᠳᠣᠲᠣᠷᠠᠬᠢ 20 ᠭᠠᠷᠤᠶ ᠲᠣᠮᠣ ᠭᠠᠽᠢ ᠰᠢᠭᠤᠶᠢᠲᠤ ᠲᠤᠭᠤᠷᠢᠭ ᠳᠤ ᠴᠤᠭᠯᠠᠷᠠᠵᠤ᠂ ᠵᠣᠣ ᠁
ᠪᠠᠳᠺᠡᠷ ᠵᠣᠣ
ᠰᠢᠭᠤᠶᠢᠲᠤ ᠣᠷᠣᠨ ᠳᠤ ᠪᠠᠰᠠ ᠬᠡᠷᠡᠮ ᠳᠡᠭᠡᠷ᠎ᠡ ᠵᠢᠷᠤᠭ ᠵᠢᠷᠤᠪᠠ᠂ ᠴᠢ ᠪᠡᠯᠡᠳᠬᠡᠵᠦ ᠪᠠᠷᠠᠭᠰᠠᠨ ᠤᠤ︖
ᠪᠤᠭᠤᠲᠤ ᠶᠢᠨ ᠡᠷᠲᠡᠨ ᠤ ᠬᠤᠲᠠ ᠶᠢᠨ ᠠᠪᠤᠷᠭᠤ ᠭᠦᠷᠪᠡᠯ ᠤᠨ ᠬᠦᠷᠢᠶᠡᠯᠡᠩ ᠴᠢᠨᠦ ᠪᠣᠯᠵᠣᠬᠤ ᠶᠢ ᠬᠦᠯᠢᠶᠡᠵᠦ ᠪᠠᠶᠢᠨ᠎ᠠ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号