ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠪᠠᠭ᠋ᠠᠷᠬᠠᠯᠳᠥ ᠰᠢᠭᠤᠶᠢᠳᠥ
ᠦᠢᠯᠡᠴᠢᠯᠡᠭᠡ
ᠶᠡᠭᠡ ᠳᠡᠭᠡᠳᠦᠰ ᠲᠤ ᠦᠴᠢᠮᠦ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2023/10/19
                            ᠨᠠ᠊ · ᠵᠢᠷᠭᠠᠯ ᠨᠠᠢᠮᠠᠨ ᠵᠠᠭᠤᠨ ᠵᠢᠯ ᠤᠨ ᠲᠡᠷᠲᠡᠭᠡᠬᠢᠨᠠᠷᠠᠨ ᠤ ᠭᠡᠷᠡᠯ ᠢ ᠳᠠᠭᠠᠳᠬᠠᠵᠤ       ᠨᠠᠷᠮᠠᠢ ᠶᠡᠭᠡ ᠦᠢᠯᠡᠰ ᠤᠨ ᠢᠶᠠᠨ       ᠨᠠᠰᠤᠨ ᠬᠤᠳᠤᠭ ᠢ ᠠᠶᠢᠯᠠᠳᠬᠠᠮᠤ       ᠪᠤᠷᠬᠠᠨ ᠬᠠᠯᠳᠤᠨ ᠠᠭᠤᠯᠠ ᠶᠢᠨ       ᠪᠤᠶᠠᠨᠲᠦ ᠰᠦᠷ ᠢ ᠪᠠᠷᠠᠯᠠᠨ       ᠪᠤᠭᠳᠠ ᠡᠵᠡᠨ ᠬᠠᠭᠠᠨ ᠤ ᠪᠠᠨ       ᠪᠦᠷᠢᠯᠸ᠎ᠠ ᠰᠦᠨᠡᠰᠦᠨ ᠳᠤ ᠠᠶᠢᠯᠠᠳᠬᠠᠮᠤ       ᠬᠦᠳᠡᠭᠡ ᠠᠷᠠᠯ ᠨᠤᠲᠤᠭ ᠤᠨ       ᠬᠦᠴᠦᠷᠬᠡᠭ ᠰᠢᠲᠦᠭᠡᠨ ᠳᠤ ᠨᠠᠮᠠᠨᠴᠢᠯᠠᠨ       ᠬᠦᠭᠵᠢᠯ ᠮᠠᠨᠳᠤᠯ ᠤᠨ ᠬᠤᠷᠤᠢ ᠶᠢ       ᠬᠦᠰᠡᠨ ᠬᠦᠰᠡᠨ ᠠᠶᠢᠯᠠᠳᠬᠠᠮᠤ︕       ᠲᠡᠭᠷᠢ ᠶᠢᠨ ᠶᠡᠭᠡ ᠬᠦᠪᠡᠭᠦᠨ       ᠳᠡᠭᠡᠳᠦᠰ ᠪᠤᠭᠳᠠ ᠶᠢᠨ ᠰᠦᠨᠡᠰᠦᠨ ᠳᠤ       ᠳᠡᠯᠭᠡᠷ ᠬᠤᠷᠸ᠎ᠠ ᠶᠢᠨ ᠰᠠᠶᠢᠬᠠᠨ ᠢ       ᠳᠡᠭᠡᠳᠦᠯᠡᠨ ᠳᠡᠭᠡᠳᠦᠯᠡᠨ ᠡᠷᠭᠦᠮᠦ       ᠠᠷᠢᠭᠤᠨ ᠮᠤᠩᠭᠤᠯ ᠤᠨ ᠶᠤᠰᠤ ᠪᠠᠷ       ᠠᠯᠢᠪᠠ ᠰᠠᠶᠢᠬᠠᠨ ᠢ ᠳᠠᠭᠠᠳᠬᠠᠨ       ᠠᠭᠤᠤ ᠶᠡᠭᠡ ᠳᠡᠭᠡᠳᠦᠰ ᠲᠤ       ᠠᠶᠤᠰᠢ ᠬᠠᠳᠠᠭ ᠢ ᠡᠷᠭᠦᠮᠦ       ᠬᠠᠨ ᠬᠤᠷᠮᠤᠰᠲᠠ ᠶᠢᠨ ᠡᠵᠡᠨ       ᠬᠠᠮᠤᠭ ᠲᠦᠮᠡᠨ ᠤ ᠰᠢᠲᠦᠭᠡᠨ       ᠬᠠᠭᠠᠨ ᠡᠵᠡᠨ ᠲᠠᠨ ᠳᠤ ᠪᠠᠨ       ᠬᠠᠯᠠᠭᠤᠨ ᠮᠠᠩᠨᠠᠢ ᠪᠠᠷ ᠮᠦᠷᠭᠦᠮᠦ       ᠡᠵᠡᠨ ᠪᠤᠭᠳᠠ ᠬᠠᠭᠠᠨ ᠮᠢᠨᠢ       ᠡᠨᠡᠷᠢᠲᠦᠭᠡᠢ᠂ ᠦᠷᠦᠰᠢᠶᠡᠲᠦᠭᠡᠢ︕               ᠨᠢᠭᠡ               ᠡᠩ ᠦᠷᠭᠡᠨ ᠳᠡᠯᠡᠬᠡᠢ ᠮᠢᠨᠢ       ᠡᠯᠡᠷ ᠪᠠᠯᠠᠷ ᠪᠠᠶᠢᠬᠤ ᠳᠤ       ᠡᠵᠡᠭᠦᠢ ᠬᠡᠭᠡᠷ᠎ᠡ ᠨᠤᠲᠤᠭ       ᠡᠵᠡᠨ ᠦᠭᠡᠢ ᠦᠶ᠎ᠡ ᠳᠤ       ᠡᠵᠡᠷᠬᠡᠭ ᠳᠠᠶᠢᠰᠤᠨ ᠤ ᠬᠦᠯ       ᠡᠷᠬᠡᠰᠢᠶᠡᠵᠦ ᠲᠦᠢᠳᠦᠭᠰᠡᠨ ᠴᠠᠭ ᠲᠤ       ᠡᠭᠡᠯ ᠵᠢᠷ ᠤᠨ ᠠᠷᠠᠳ ᠢᠷᠭᠡᠳ       ᠡᠷᠬᠡ ᠴᠢᠯᠦᠭᠡ ᠦᠭᠡᠢ ᠲᠦᠷᠦ ᠳᠤ       ᠡᠷᠲᠡᠨ ᠠᠴᠠ ᠨᠠᠭᠠᠰᠢ ᠨᠡᠶᠢᠭᠡᠮ       ᠡᠬᠢ ᠲᠢᠭ᠋ ᠦᠭᠡᠢ ᠪᠠᠶᠢᠪᠠ       ᠰᠠᠷᠨᠢᠵᠤ ᠪᠤᠲᠠᠷᠠᠭᠰᠠᠨ ᠤᠭᠰᠠᠭ᠎ᠠ       ᠰᠠᠯᠬᠢᠨ ᠤ ᠡᠪᠡᠰᠦ ᠮᠡᠲᠦ ᠬᠡᠶᠢᠰᠴᠦ       ᠰᠠᠮᠠᠭᠤᠨ ᠨᠢᠭᠦᠯ ᠤᠨ ᠳᠠᠶᠢᠨ       ᠰᠠᠪᠠ ᠶᠢᠷᠲᠢᠨᠴᠦ ᠶᠢ ᠰᠢᠮᠡᠵᠦ        ᠳᠦᠷᠢᠮᠡᠬᠡᠢ ᠶᠤᠰᠤᠨ ᠤ ᠳᠡᠪᠵᠢᠶᠡᠨ       ᠳᠦᠷᠪᠡᠨ ᠴᠠᠭ ᠢᠶᠠᠷ ᠦᠷᠭᠦᠯᠵᠢᠯᠡᠵᠦ       ᠲᠦᠢᠳᠬᠡᠷ ᠴᠦᠪ ᠤᠨ ᠠᠯᠠᠯᠳᠤᠭᠠᠨ       ᠲᠦᠷᠦᠯ ᠰᠠᠳᠤᠨ ᠢ ᠬᠢᠲᠤᠵᠤ       ᠨᠠᠷᠠ ᠲᠠᠢ ᠡᠳᠦᠷ ᠪᠦᠷᠬᠦᠭᠰᠢᠨ       ᠨᠠᠰᠤ ᠪᠠᠨ ᠪᠠᠷᠠᠭᠰᠠᠳ ᠤᠯᠠᠰᠢᠷᠠᠵᠤ       ᠨᠠᠭᠤᠷ ᠤᠰᠤ ᠪᠤᠯᠠᠩᠬᠢᠷᠳᠤᠨ       ᠨᠠᠮᠤᠷ ᠤᠨ ᠴᠠᠭ ᠢᠶᠠᠷ ᠬᠠᠷᠠᠰᠤ ᠪᠠᠶᠢᠪᠠ       ᠳᠡᠷᠪᠡᠵᠦ ᠲᠦᠪᠡᠭᠳᠡᠭᠰᠡᠨ ᠬᠦᠮᠦᠰ       ᠲᠡᠨᠦᠭᠦᠯ ᠵᠤᠪᠠᠯ ᠢ ᠠᠮᠰᠠᠵᠤ       ᠲᠡᠨᠢᠭᠡᠷ ᠠᠭᠤᠳᠠᠮ ᠨᠤᠲᠤᠭ       ᠳᠠᠶᠢᠨ ᠤ ᠬᠦᠯ ᠳᠤ ᠬᠦᠨᠦᠭᠡᠭᠳᠡᠵᠦ       ᠤᠷᠭᠤᠵᠤ ᠳᠤᠲᠠᠭᠠᠨ ᠶᠠᠪᠤᠭᠰᠠᠳ       ᠣᠤᠭᠠᠯ ᠨᠤᠲᠤᠭ ᠢᠶᠠᠨ ᠲᠠᠶᠠᠭᠳᠠᠵᠤ       ᠤᠯᠠᠭᠠᠨ ᠴᠢᠰᠤᠨ ᠤ ᠬᠢᠲᠤᠯᠭ᠎ᠠ        ᠤᠷᠤᠭ ᠲᠦᠷᠦᠯ ᠢ ᠵᠠᠯᠭᠢᠵᠤ       ᠲᠦᠮᠡᠨ ᠭᠠᠵᠠᠷ ᠤᠨ ᠨᠤᠲᠤᠭ       ᠲᠦᠢᠳᠤᠯ ᠮᠦᠭᠦᠯ ᠳᠤ ᠲᠤᠯᠭᠠᠷᠠᠨ       ᠲᠡᠤᠬᠡ ᠶᠢᠨ ᠶᠡᠭᠡ ᠲᠠᠪᠢᠯᠠᠩ       ᠲᠡᠭᠷᠢ ᠶᠢᠨ ᠴᠠᠭ ᠢ ᠬᠦᠯᠢᠶᠡᠨ᠎ᠡ᠃               ᠬᠤᠶᠠᠷ               ᠪᠤᠷᠬᠠᠨ ᠬᠠᠯᠳᠤᠨ ᠤᠨ ᠡᠩᠬᠡᠷ       ᠪᠤᠭᠲᠠ ᠡᠵᠡᠨ ᠮᠢᠨᠢ ᠮᠡᠨᠳᠦᠯᠡᠪᠡ       ᠪᠦᠷᠬᠦᠭ ᠲᠡᠭᠷᠢ ᠶᠢᠨ ᠤᠭᠲᠠᠷᠭᠤᠢ ᠳᠤ       ᠪᠤᠶᠠᠨᠲᠦ ᠤᠳᠤᠨ ᠭᠡᠷᠡᠯᠲᠦᠨ ᠰᠠᠴᠤᠷᠠᠪᠠ       ᠡᠷᠡᠯᠬᠡᠭ ᠬᠦᠪᠡᠭᠦᠨ ᠲᠡᠮᠦᠵᠢᠨ       ᠡᠨᠡ ᠶᠢᠷᠲᠢᠨᠴᠦ ᠳᠤ ᠮᠡᠨᠳᠦᠯᠡᠪᠡ       ᠡᠨᠡᠯᠦᠯ ᠰᠢᠨᠠᠯᠤᠯ ᠲᠠᠢ ᠠᠷᠠᠳ ᠲᠤ       ᠡᠨᠡᠷᠢᠯ ᠤᠨ ᠨᠠᠷᠠ ᠲᠦᠭᠦᠪᠡ       ᠨᠦᠵᠢ ᠠᠳᠬᠤᠭᠰᠠᠨ ᠬᠦᠪᠡᠭᠦᠨ        ᠨᠢᠷᠤᠭᠤᠨ ᠮᠤᠩᠭᠤᠯ ᠳᠤ ᠮᠤᠷᠢᠯᠠᠪᠠ       ᠨᠠᠢᠮᠠᠨ ᠵᠦᠭ ᠢ ᠡᠷᠬᠡᠰᠢᠶᠡᠬᠦ       ᠨᠠᠷᠮᠠᠢ ᠶᠡᠭᠡ ᠰᠣᠪᠢᠩ ᠲᠠᠲᠠᠪᠠ       ᠠᠭᠤᠤ ᠡᠵᠢ ᠶᠢᠨ ᠰᠤᠷᠭᠠᠯ ᠳᠤ       ᠠᠤᠭ᠎ᠠ ᠵᠤᠷᠢᠭ ᠢ ᠬᠦᠪᠴᠢᠯᠡᠪᠡ       ᠠᠪᠤ ᠳᠡᠭᠡᠳᠦ ᠶᠢᠨ ᠬᠦᠰᠡᠯ       ᠠᠶᠣᠤᠯᠢᠬᠠᠢ ᠴᠡᠭᠡᠵᠢᠨ᠎ᠡ ᠪᠠᠲᠤᠵᠢᠪᠠ       ᠪᠡᠷᠬᠡ ᠪᠠᠷᠲᠠᠭ᠎ᠠ ᠬᠦᠴᠢᠷ ᠵᠤᠪᠠᠭᠤᠷᠢ ᠶᠢ       ᠪᠠᠭ᠎ᠠ ᠨᠠᠰᠤᠨ ᠠᠴᠠ ᠪᠠᠨ ᠲᠤᠭᠤᠯᠪᠠ       ᠪᠠᠳᠠᠷᠠᠯ ᠪᠠᠭᠤᠷᠠᠯ ᠤᠨ ᠶᠡᠭᠡ ᠶᠤᠰᠤ ᠶᠢ       ᠪᠠᠭᠠᠲᠤᠷ ᠡᠴᠢᠭᠡ ᠠᠴᠠ ᠪᠠᠨ ᠦᠪᠯᠡᠪᠡ       ᠠᠮᠢᠳᠤᠷᠠᠯ ᠤᠨ ᠤᠯᠠᠨ ᠳᠠᠪᠠᠭ᠎ᠠ ᠳᠤ       ᠠᠷᠭ᠎ᠠ ᠪᠤᠳᠤᠯᠭ᠎ᠠ ᠪᠠᠨ ᠳᠠᠪᠲᠠᠪᠠ       ᠠᠨᠳᠠ ᠨᠦᠬᠦᠳ ᠤᠨ ᠬᠠᠶᠢᠷ᠎ᠠ ᠲᠤᠰᠠᠯᠠᠮᠵᠢ       ᠠᠯᠮᠠᠰ ᠬᠦᠴᠦ ᠶᠢ ᠨᠢ ᠡᠷᠴᠢᠯᠡᠪᠡ᠃               ᠭᠤᠷᠪᠠ               ᠦᠨᠦᠴᠢᠨ ᠵᠤᠪᠠᠯᠠᠩ ᠤᠨ ᠬᠠᠲᠠᠭᠤ ᠳᠠᠪᠠᠭ᠎ᠠ       ᠦᠯᠦᠨ ᠮᠡᠬᠦᠰᠳᠡᠯ ᠤᠨ ᠭᠠᠴᠢᠭ ᠪᠡᠷᠬᠡ       ᠤᠭᠰᠠᠭ᠎ᠠ ᠪᠦᠯᠦᠭ ᠤᠨ ᠰᠢᠷᠦᠭᠦᠨ ᠳᠠᠭᠠᠷᠢᠯᠲᠠ       ᠤᠷᠢᠳᠦ ᠴᠠᠭ ᠤᠨ ᠦᠰ ᠬᠠᠷᠢᠭᠤ       ᠰᠡᠭᠦᠳᠡᠷ ᠠᠴᠠ ᠪᠠᠨ ᠦᠭᠡᠷ᠎ᠡ ᠬᠠᠨᠢ ᠦᠭᠡᠢ       ᠰᠦᠷᠦᠭ ᠠᠴᠠ ᠪᠠᠨ ᠦᠭᠡᠷ᠎ᠡ ᠮᠤᠷᠢ ᠦᠭᠡᠢ       ᠰᠠᠨᠠᠭ᠎ᠠ ᠤᠷᠭᠤᠭᠰᠠᠨ ᠴᠦ ᠣᠨᠤᠭ᠎ᠠ ᠮᠡᠬᠦᠰ       ᠰᠠᠷᠠᠪᠴᠢᠯᠠᠵᠤ ᠬᠠᠷᠠᠭᠰᠠᠨ ᠴᠦ ᠨᠤᠲᠤᠭ ᠡᠯᠦᠢ       ᠲᠠᠶᠢᠨ ᠳᠠᠵᠢᠨ ᠤ ᠬᠠᠷᠬᠢᠰ ᠴᠦᠯᠪᠡᠳᠡᠯ       ᠳᠠᠭᠠᠷᠢᠯᠲᠠ ᠳᠡᠭᠡᠷᠡᠮᠳᠡᠯ ᠤᠨ ᠨᠢᠯᠪᠤᠰᠤ ᠲᠡᠯᠴᠢᠯᠡᠯ       ᠲᠡᠲ᠋ᠡᠷ ᠮᠡᠷᠭᠢᠳ ᠤᠨ ᠬᠡᠷᠡᠶᠢᠳ ᠤᠯᠠᠨ ᠠᠶᠢᠮᠠᠭ       ᠲᠠᠰᠤᠳᠠᠵᠤ ᠡᠵᠡᠷᠬᠡᠭᠰᠡᠨ ᠬᠦᠴᠦᠷᠬᠡᠭ ᠳᠠᠭᠤᠨ       ᠲᠡᠮᠦᠵᠢᠨ ᠤ ᠡᠮᠦᠨ᠎ᠡ ᠳᠤᠷᠠᠶᠢᠨ ᠬᠠᠷᠠᠭᠳᠠᠨ᠎ᠠ       ᠲᠠᠩᠬᠢᠯ ᠨᠠᠰᠤᠨ ᠤ ᠤᠮᠤᠭ ᠢ ᠬᠦᠭᠵᠢᠭᠡᠨ᠎ᠡ       ᠳᠡᠷᠭᠡᠲᠡ ᠪᠠᠨ ᠬᠤᠷᠢᠶᠠᠮᠵᠢᠯᠠᠬᠤ ᠤᠬᠠᠭᠠᠨ ᠰᠤᠪᠢᠨ᠎ᠠ       ᠳᠡᠯᠡᠬᠡᠢ ᠳᠤ ᠪᠤᠰᠬᠤ ᠲᠠᠮᠢᠷ ᠴᠢᠩᠭᠠᠯᠠᠨ᠎ᠠ       ᠠᠮᠢᠳᠤᠷᠠᠯ ᠤᠨ ᠵᠦᠳᠡᠭᠦᠷᠢ ᠬᠠᠯᠠ ᠪᠠᠷ       ᠠᠨᠳᠠ ᠨᠦᠬᠦᠳ ᠢ ᠪᠦᠷᠢᠳᠦᠭᠦᠯᠪᠡ       ᠠᠶᠠᠨ ᠳᠠᠶᠢᠨ ᠤ ᠪᠡᠷᠬᠡ ᠭᠠᠴᠢᠭ ᠢᠶᠠᠷ       ᠠᠷᠭ᠎ᠠ ᠤᠬᠠᠭᠠᠨ ᠢ ᠪᠤᠯᠪᠠᠰᠤᠷᠠᠭᠤᠯᠪᠠ       ᠢᠯᠠᠭᠳᠠᠯ ᠤᠨ ᠬᠠᠷᠠᠰᠠᠯᠲᠤ ᠰᠤᠷᠭᠠᠮᠵᠢ ᠪᠠᠷ       ᠢᠯᠠᠯᠲᠠ ᠶᠢᠨ ᠵᠠᠮ ᠢ ᠳᠡᠪᠢᠰᠪᠡ       ᠠᠲᠠᠭ᠎ᠠ ᠵᠢᠲᠦᠭᠡ ᠶᠢᠨ ᠬᠤᠬᠢᠷᠠᠯ ᠢᠶᠠᠷ       ᠠᠳᠬᠤᠭᠰᠠᠨ ᠨᠢᠳᠤᠷᠭ᠎ᠠ ᠶᠢ ᠪᠠᠬᠢᠵᠢᠭᠦᠯᠪᠡ       ᠮᠦᠩᠬᠡ ᠲᠡᠭᠷᠢ ᠪᠠᠨ ᠰᠢᠲᠦᠵᠦ       ᠮᠤᠩᠭᠤᠯ ᠲᠦᠮᠡᠨ ᠢ ᠬᠤᠷᠤᠶᠢᠯᠠᠪᠠ       ᠮᠠᠨᠳᠤᠯ ᠨᠢᠭᠡᠲᠦᠯ ᠤᠨ ᠵᠤᠯᠠ ᠶᠢ       ᠮᠦᠩᠬᠡ ᠲᠡᠭᠷᠢ ᠳᠤ ᠡᠷᠭᠦᠪᠡ᠃               ᠳᠦᠷᠪᠡ               ᠠᠤᠭ᠎ᠠ ᠦᠢᠯᠡᠰ ᠲᠤ ᠰᠢᠭᠤᠷᠬᠠᠶᠢᠯᠠᠭᠰᠠᠨ       ᠠᠶᠠᠨ ᠵᠠᠮ ᠢᠶᠠᠨ ᠡᠬᠢᠯᠡᠭᠦᠯᠪᠡ       ᠠᠷᠪᠠᠨ ᠵᠦᠭ ᠲᠤ ᠪᠤᠲᠠᠷᠠᠭᠰᠠᠨ       ᠠᠷᠠᠳ ᠲᠦᠮᠡᠨ ᠢ ᠤᠷᠠᠶᠢᠯᠠᠪᠠ       ᠵᠦᠭ ᠵᠦᠭ ᠲᠤ ᠵᠠᠳᠠᠷᠠᠭᠰᠠᠨ ᠢ       ᠵᠦᠭᠰᠢᠷᠡᠭᠦᠯᠵᠦ ᠬᠤᠮᠢᠨ ᠴᠤᠭᠯᠠᠭᠤᠯᠪᠠ       ᠵᠦᠳᠡᠷᠡᠵᠦ ᠵᠤᠪᠠᠨᠢᠭᠰᠠᠨ ᠢᠷᠭᠡᠳ ᠢ       ᠵᠦᠪ ᠢᠶᠠᠷ ᠳᠠᠭᠠᠭᠤᠯᠤᠨ ᠳᠠᠶᠢᠴᠢᠯᠠᠪᠠ       ᠠᠷᠢᠭᠤᠨ ᠰᠠᠨᠠᠭᠠᠲᠦ ᠬᠦᠮᠦᠰ ᠨᠢ       ᠠᠯᠠᠭ ᠦᠭᠡᠢ ᠰᠡᠳᠬᠢᠯ ᠢᠶᠠᠷ ᠲᠤᠰᠠᠯᠠᠪᠠ       ᠠᠯᠲᠠᠨ ᠲᠦᠷᠦ ᠶᠢᠨ ᠡᠰᠡᠨᠢᠯ ᠳᠤ       ᠠᠯᠢᠪᠠ ᠪᠠᠨ ᠬᠠᠷᠠᠮ ᠦᠭᠡᠢ ᠡᠷᠭᠦᠪᠡ       ᠮᠤᠬᠤᠯᠠᠢ ᠪᠤᠭᠤᠷᠴᠤ ᠴᠢᠯᠠᠭᠤᠨ ᠨᠠᠷ       ᠮᠤᠬᠤᠰᠢ ᠦᠭᠡᠢ ᠡᠷᠡᠯᠬᠡᠭᠯᠡᠪᠡ       ᠮᠠᠭᠤ ᠦᠨᠳᠦᠷ᠂ ᠬᠦᠢᠲᠡᠨ ᠤ ᠳᠠᠶᠢᠯᠠᠯᠳᠤᠭᠠᠨ ᠳᠤ       ᠮᠠᠷᠭᠤᠰᠢ ᠦᠭᠡᠢ ᠢᠯᠠᠯᠲᠠ ᠶᠢ ᠤᠯᠪᠠ       ᠮᠡᠷᠭᠢᠳ ᠨᠠᠢᠮᠠᠨ ᠤᠯᠠᠨ ᠪᠦᠯᠦᠭ ᠢ       ᠮᠢᠨᠳᠠᠰᠤᠨ ᠵᠢᠯᠤᠭᠤ ᠪᠠᠷ ᠡᠪᠬᠡᠪᠡ       ᠴᠢᠩ ᠦᠨᠡᠨᠴᠢ ᠠᠬ᠎ᠠ ᠳᠡᠭᠦᠤᠰ       ᠴᠣᠴᠠᠯᠲᠠ ᠦᠭᠡᠢ ᠤᠷᠤᠭᠰᠢᠯᠠᠪᠠ       ᠴᠠᠭᠠᠨ ᠬᠡᠷᠡᠮ ᠤᠨ ᠡᠮᠦᠨ᠎ᠡ ᠤᠮᠠᠷ᠎ᠠ       ᠴᠡᠴᠡᠨ ᠮᠡᠷᠭᠡᠨ ᠢᠶᠠᠷ ᠳᠠᠶᠢᠯᠠᠯᠳᠤᠪᠠ       ᠠᠷᠪᠠᠨ ᠭᠤᠷᠪᠠᠨ ᠬᠦᠷᠢᠶ᠎ᠠ ᠶᠢᠨ ᠪᠠᠶᠢᠯᠳᠤᠭᠠᠨ       ᠠᠷᠠᠪ ᠢᠰᠠᠯᠠᠮ ᠤᠨ ᠤᠷᠤᠨ ᠬᠦᠷᠲᠡᠯ᠎ᠡ       ᠠᠭᠲᠠ ᠶᠢᠨ ᠵᠢᠯᠤᠭᠤ ᠰᠤᠯᠠᠷᠠᠭᠤᠯᠤᠯ ᠦᠭᠡᠢ       ᠠᠳᠬᠤᠨ ᠳᠤ ᠪᠠᠨ ᠤᠷᠤᠭᠤᠯᠵᠤ ᠡᠷᠬᠡᠰᠢᠶᠡᠪᠡ       ᠳᠤᠮᠳᠠᠳᠤ ᠤᠷᠤᠨ ᠤᠨ ᠤᠯᠤᠰ ᠭᠦᠷᠦᠨ ᠢ       ᠲᠤᠬᠤᠮ ᠤᠨ ᠲᠡᠳᠦᠢ ᠭᠠᠵᠠᠷ ᠨᠤᠲᠤᠭ ᠢ       ᠲᠤᠭ ᠰᠠᠵᠢᠭᠰᠠᠨ ᠡᠵᠡᠨ ᠪᠦᠬᠦᠨ ᠢ       ᠲᠤᠭᠠᠯᠠᠰᠢ ᠦᠭᠡᠢ ᠢᠷᠭᠡᠳ ᠢ       ᠲᠤᠭᠤᠷᠠᠢ ᠶᠢᠨ ᠴᠢᠮᠡᠭᠡ ᠪᠠᠷ ᠡᠭᠡᠭᠦᠯᠵᠦ       ᠲᠤᠩᠬᠠᠭᠯᠠᠭᠰᠠᠨ ᠵᠠᠷᠯᠢᠭ ᠢᠶᠠᠷ ᠬᠤᠷᠢᠶᠠᠮᠵᠢᠯᠠᠵᠤ       ᠲᠦᠪ ᠠᠽᠢᠶ᠎ᠠ ᠶᠢᠨ ᠡᠯᠢᠭᠡᠨ ᠳᠤ       ᠲᠦᠭᠦᠷᠢᠭ ᠭᠦᠷᠦᠨ ᠲᠤᠭᠲᠠᠨᠢᠪᠠ       ᠳᠦᠴᠢᠨ ᠲᠠᠪᠤᠨ ᠨᠠᠰᠤ ᠪᠤᠯᠲᠠᠯ᠎ᠠ       ᠳᠦᠷᠦᠭᠡ ᠦᠨᠳᠡᠶᠢᠨ ᠳᠤᠪᠲᠤᠯᠪᠠ       ᠲᠦᠷᠺ ᠲᠠᠩᠭᠤᠳ ᠤᠷᠤᠨ ᠠᠴᠠ       ᠠᠯᠲᠠᠢ ᠠᠭᠤᠯᠠ ᠶᠢᠨ ᠠᠷᠤ ᠬᠦᠷᠲᠡᠯ᠎ᠡ       ᠲᠦᠮᠡ ᠪᠤᠮᠠᠨ ᠴᠡᠷᠢᠭ ᠤᠨ       ᠠᠪᠤᠷᠭᠤ ᠶᠡᠭᠡ ᠬᠦᠴᠦᠨ ᠢᠶᠠᠷ       ᠳᠦᠷᠢᠮᠡᠬᠡᠢ ᠪᠦᠬᠦᠨ ᠢ ᠲᠦᠪᠰᠢᠳᠬᠡᠵᠦ       ᠠᠯᠲᠠᠨ ᠪᠡᠶ᠎ᠡ ᠶᠢ ᠴᠢᠯᠡᠭᠡᠨ       ᠲᠦᠷᠦ ᠶᠢᠨ ᠲᠠᠪᠴᠠᠩ ᠢ ᠴᠤᠭᠴᠠᠯᠠᠪᠠ᠃               ᠲᠠᠪᠤ               ᠬᠦᠳᠡᠭᠡ ᠠᠷᠠᠯ ᠤᠨ ᠡᠬᠢᠨ ᠳᠤ       ᠬᠦᠬᠡ ᠲᠤᠭ ᠮᠢᠨᠢ ᠨᠠᠮᠢᠷᠠᠪᠠ       ᠬᠦᠮᠦᠨ ᠲᠦᠷᠦᠯᠬᠢᠲᠡᠨ ᠤ ᠲᠡᠤᠬᠡ ᠶᠢᠨ       ᠬᠦᠰᠢᠭᠡ ᠠᠳᠡ ᠠᠴᠠ ᠰᠡᠬᠦᠭᠳᠡᠪᠡ       ᠳᠡᠯᠡᠬᠡᠢ ᠶᠢᠨ ᠪᠤᠯᠪᠠᠰᠤᠨ ᠤ ᠬᠠᠭᠤᠳᠠᠰᠤ       ᠲᠡᠭᠷᠢ ᠶᠢᠨ ᠢᠪᠡᠭᠡᠯ ᠳᠤ ᠳᠡᠯᠭᠡᠭᠳᠡᠪᠡ       ᠳᠡᠯᠭᠡᠷ ᠰᠠᠶᠢᠬᠠᠨ ᠦᠢᠯᠡᠰ ᠤᠨ       ᠳᠠᠶᠢᠴᠢᠨ ᠳᠠᠭᠤᠯᠠᠯ ᠬᠠᠩᠭᠢᠨᠠᠪᠠ       ᠨᠢᠭᠡᠲᠦᠭᠰᠡᠨ ᠶᠡᠭᠡ ᠭᠦᠷᠦᠨ       ᠨᠠᠷᠮᠠᠢ ᠲᠦᠮᠡᠨ ᠪᠤᠰᠬᠠᠪᠠ       ᠨᠠᠢᠮᠠᠨ ᠵᠦᠭ ᠤᠨ ᠠᠷᠠᠳ       ᠨᠡᠶᠢᠲᠡ ᠶᠢᠨ ᠪᠦᠯᠢ ᠪᠠᠶᠢᠭᠤᠯᠪᠠ       ᠲᠠᠷᠬᠠᠵᠤ ᠵᠠᠳᠠᠷᠠᠭᠰᠠᠨ ᠠᠶᠢᠮᠠᠭ       ᠳᠠᠷᠬᠠᠨ ᠲᠦᠷᠦ ᠳᠤ ᠪᠦᠭᠡᠮᠨᠡᠷᠡᠪᠡ       ᠲᠦᠷᠦ ᠶᠢᠨ ᠰᠦᠯᠳᠡ ᠳᠠᠭᠤᠤ       ᠳᠠᠶᠠᠩ ᠤᠨ ᠰᠣᠨᠣᠷ ᠲᠤ ᠬᠠᠩᠭᠢᠨᠠᠪᠠ       ᠪᠤᠲᠠᠷᠠᠵᠤ ᠰᠠᠷᠨᠢᠭᠰᠠᠨ ᠢᠷᠭᠡᠳ       ᠳᠡᠷᠪᠡᠵᠦ ᠲᠤᠲᠠᠭᠠᠭᠰᠠᠨ ᠨᠡᠭᠦᠳᠡᠯ       ᠠᠭᠤᠤ ᠲᠦᠷᠦ ᠶᠢᠨ ᠵᠠᠷᠯᠢᠭ ᠢᠶᠠᠷ       ᠠᠮᠤᠭᠤᠯᠠᠩ ᠰᠠᠶᠢᠬᠠᠨ ᠡᠶᠡᠯᠳᠦᠪᠡ       ᠠᠰᠢᠲᠠ ᠶᠢᠨ ᠪᠡᠯᠭᠡᠲᠦ ᠠᠮᠢᠳᠤᠷᠠᠯ ᠳᠤ       ᠠᠯᠠᠰᠭᠢᠨ ᠪᠠᠶᠠᠷᠯᠠᠵᠤ ᠬᠤᠷᠠᠯᠳᠤᠪᠠ       ᠡᠷᠳᠡᠮᠲᠡᠨ ᠮᠡᠷᠭᠡᠳ ᠮᠡᠳᠬᠡᠯᠴᠡᠨ       ᠡᠬᠡ ᠰᠤᠶᠤᠯ ᠮᠢᠨᠢ ᠮᠡᠨᠳᠦᠯᠡᠨ᠎ᠡ       ᠡᠯᠢᠭᠡ ᠨᠢᠭᠡᠲᠡᠨ ᠪᠦᠬᠦᠨ ᠤ       ᠡᠷᠢᠯ ᠬᠦᠰᠡᠯ ᠪᠡᠶᠡᠯᠭᠳᠡᠪᠡ       ᠪᠤᠰᠤᠭ᠎ᠠ ᠵᠢᠭᠳᠡ ᠦᠰᠦᠭ       ᠪᠤᠯᠲᠤ ᠤᠯᠠᠨ ᠳᠤ ᠬᠡᠷᠡᠭᠯᠡᠭᠳᠡᠪᠡ       ᠪᠤᠭᠳᠠ ᠶᠢᠨ ᠠᠷᠢᠭᠤᠨ ᠵᠠᠷᠯᠢᠭ       ᠪᠦᠮᠪᠦᠷᠴᠡᠭ ᠲᠤ ᠳᠠᠭᠤᠷᠢᠰᠪᠠ       ᠵᠦᠢᠯ ᠤᠨ ᠤᠯᠠᠨ ᠶᠠᠰᠤᠲᠠᠨ ᠢ       ᠵᠦᠭ ᠴᠢᠭᠯᠡᠯ ᠢᠶᠠᠷ ᠵᠠᠮᠴᠢᠯᠠᠪᠠ       ᠲᠦᠷᠦᠯ ᠤᠭᠰᠠᠭ᠎ᠠ ᠳᠤ ᠦᠮᠴᠢᠯᠡᠨ       ᠳᠡᠰ ᠵᠡᠷᠭᠡ ᠪᠠᠷ ᠬᠤᠪᠢᠶᠠᠷᠢᠯᠠᠪᠠ       ᠠᠯᠲᠠᠨ ᠤᠷᠤᠭᠲᠠᠨ ᠤ ᠤᠭᠰᠠᠭ᠎ᠠ       ᠠᠯᠢᠪᠠ ᠡᠷᠬᠡ ᠶᠢ ᠡᠵᠡᠮᠰᠢᠪᠡ       ᠠᠭᠢᠭᠠᠳ ᠵᠠᠳᠠᠷᠠᠨ ᠪᠤᠲᠠᠷᠠᠬᠤ       ᠠᠯᠪᠢᠨ ᠭᠠᠯ ᠨᠢᠭᠤᠭᠳᠠᠪᠠ       ᠠᠷᠠᠳ ᠤᠯᠠᠨ ᠶᠤᠰᠤ ᠶᠢ ᠳᠠᠭᠠᠵᠤ       ᠠᠯᠪᠠᠲᠦ ᠴᠡᠷᠢᠭ ᠲᠤ ᠬᠤᠰᠢᠭᠤᠴᠢᠯᠠᠪᠠ       ᠵᠤᠷᠢᠯᠲᠠ ᠵᠢᠷᠤᠮ ᠨᠢᠭᠡᠲᠡᠢ ᠪᠠᠷ       ᠵᠣᠤᠵᠠᠢ ᠬᠤᠯᠪᠤᠨ ᠤᠷᠤᠭᠰᠢᠯᠠᠪᠠ       ᠠᠭᠲᠠ ᠶᠢᠨ ᠳᠦᠷᠪᠡᠨ ᠲᠤᠭᠤᠷᠠᠢ       ᠠᠽᠢᠶ᠎ᠠ ᠡᠸᠦ᠋ᠷᠤᠫᠠ ᠶᠢ ᠳᠤᠷᠭᠢᠭᠤᠯᠪᠠ       ᠠᠭᠤᠤ ᠶᠡᠭᠡ ᠴᠢᠩᠭᠢᠰ ᠬᠠᠭᠠᠨ       ᠠᠯᠳᠠᠷ ᠭᠠᠪᠢᠶ᠎ᠠ ᠪᠠᠨ ᠪᠢᠰᠢᠷᠡᠭᠦᠯᠪᠡ       ᠠᠷᠪᠠᠨ ᠭᠤᠷᠪᠠᠳᠤᠭᠠᠷ ᠵᠠᠭᠤᠨ       ᠠᠪᠤᠷᠭᠤ ᠪᠦᠲᠦᠭᠡᠯ ᠲᠠᠢ ᠮᠦᠩᠬᠡᠷᠡᠪᠡ᠃               ᠵᠢᠷᠭᠤᠭ᠎ᠠ               ᠪᠤᠷᠬᠠᠨ ᠬᠠᠯᠳᠤᠨ ᠤ ᠳᠤᠮᠤᠭ       ᠪᠤᠳᠤᠯ ᠰᠡᠳᠬᠢᠯ ᠢ ᠡᠵᠡᠮᠳᠡᠨ᠎ᠡ       ᠬᠦᠳᠡᠭᠡ ᠠᠷᠠᠯ ᠤᠨ ᠲᠤᠩᠬᠠᠭ       ᠬᠦᠢ ᠵᠠᠯᠭᠠᠮᠵᠢ ᠳᠤ ᠰᠢᠪᠡᠨᠡᠨ᠎ᠡ       ᠨᠠᠢᠮᠠᠨ ᠵᠠᠭᠤᠨ ᠤ ᠳᠡᠷᠲᠡᠭᠡᠬᠢ       ᠨᠠᠶᠢᠷᠠᠮᠳᠠᠯ ᠤᠨ ᠳᠠᠭᠤᠨ ᠬᠠᠩᠭᠢᠨᠠᠨ᠎ᠠ       ᠨᠠᠷᠮᠠᠢ ᠲᠦᠮᠡᠨ ᠤ ᠵᠢᠳᠬᠦᠯ ᠤᠨ       ᠨᠠᠨᠳᠢᠨ ᠰᠤᠷᠭᠠᠯ ᠡᠷᠭᠢᠴᠡᠭᠦᠯᠦᠭᠳᠡᠨ᠎ᠡ       ᠮᠤᠩᠭᠤᠯ ᠦᠰᠦᠭ ᠢᠶᠠᠨ ᠪᠢᠴᠢᠬᠦ ᠳᠤ       ᠮᠢᠨᠤ ᠪᠤᠳᠤᠯ ᠳᠤ ᠤᠶᠢᠮᠤᠷᠠᠨ᠎ᠠ       ᠮᠢᠩᠭᠠᠨ ᠤᠨ ᠤ ᠲᠤᠨᠵᠢ ᠬᠦᠮᠦᠨ ᠢ       ᠮᠦᠩᠬᠡ ᠲᠡᠭᠷᠢ ᠳᠤ ᠳᠠᠭᠠᠳᠬᠠᠨ᠎ᠠ       ᠠᠭᠤᠤ ᠶᠡᠭᠡ ᠳᠡᠭᠡᠳᠦᠰ ᠤᠨ ᠮᠢᠨᠢ       ᠠᠷᠢᠭᠤᠨ ᠵᠢᠷᠦᠬᠡᠨ ᠳᠤ ᠪᠠᠨ ᠰᠢᠲᠦᠨ᠎ᠡ       ᠠᠷᠪᠠᠨ ᠭᠠᠯᠪᠠ ᠳᠤ ᠮᠦᠩᠬᠡᠷᠡᠬᠦ       ᠠᠪᠤᠷᠭᠤ ᠰᠦᠷᠯᠢᠭ ᠬᠦᠰᠢᠶ᠎ᠡ       ᠠᠮᠢᠯᠠᠭᠤᠯᠵᠤ ᠰᠤᠶᠤᠷᠬᠠᠭᠰᠠᠨ ᠪᠢᠴᠢᠭ       ᠦᠶ᠎ᠡ ᠶᠢᠨ ᠦᠶ᠎ᠡ ᠳᠤ ᠤᠯᠠᠮᠵᠢᠯᠠᠯ ᠲᠠᠢ       ᠠᠷᠠᠳ ᠲᠦᠮᠡᠨ ᠤ ᠢᠪᠡᠭᠡᠨ ᠬᠠᠶᠢᠷᠠᠯᠠᠭᠰᠠᠨ       ᠦᠭᠭᠢᠶᠡᠮᠦᠷ ᠪᠤᠶᠠᠨ ᠴᠢᠨᠢ ᠳᠤᠨᠳᠠᠷᠠᠰᠢ ᠦᠭᠡᠢ       ᠴᠠᠭ ᠲᠦᠷᠦ ᠶᠢᠨ ᠰᠠᠶᠢᠬᠠᠨ ᠳᠤ       ᠴᠡᠪᠡᠷᠬᠡᠨ ᠬᠡᠯᠡ ᠮᠢᠨᠢ ᠦᠪᠯᠡᠭᠰᠡᠭᠡᠷ       ᠴᠢᠩ ᠦᠨᠡᠨᠴᠢ ᠬᠦᠰᠡᠯ ᠢᠶᠠᠷ       ᠴᠠᠭᠯᠠᠰᠢ ᠦᠭᠡᠢ ᠪᠠᠭ᠋ᠠᠷᠬᠠᠭᠰᠠᠭᠠᠷ       ᠡᠭᠡᠰᠢᠭ ᠢᠷᠠᠭᠤ ᠬᠡᠯᠡ ᠮᠢᠨᠢ       ᠡᠭᠡᠭᠡ ᠠᠳᠠᠯᠢᠬᠠᠨ ᠬᠠᠩᠭᠢᠨᠠᠭᠰᠠᠭᠠᠷ       ᠡᠨᠡ ᠬᠤᠷᠸ᠎ᠠ ᠶᠢᠨ ᠵᠠᠢ ᠳᠤ       ᠡᠳᠦᠷ ᠠᠴᠠ ᠡᠳᠦᠷ ᠵᠢᠷᠭᠠᠭᠰᠠᠭᠠᠷ       ᠲᠦᠷᠯᠬᠢ ᠬᠡᠯᠡ ᠪᠠᠨ ᠲᠠᠶᠠᠭᠳᠠᠬᠤ       ᠲᠦᠬᠦᠭᠡ ᠦᠭᠡᠢ ᠬᠡᠤᠬᠡᠳ ᠤᠯᠠᠰᠢᠷᠠᠭᠰᠠᠭᠠᠷ       ᠲᠦᠪ ᠪᠢᠴᠢᠭ ᠢᠶᠠᠨ ᠭᠤᠯᠤᠬᠤ       ᠲᠦᠬᠦᠬᠡᠢ ᠬᠡᠤᠬᠡᠳ ᠨᠡᠮᠡᠭᠳᠡᠭᠰᠡᠭᠡᠷ       ᠲᠦᠷᠦ ᠵᠠᠰᠠᠭ ᠤᠨ ᠶᠤᠰᠤ ᠶᠢ       ᠲᠤᠷᠭᠤᠨ ᠮᠡᠬᠦᠰ ᠶᠠᠷᠢᠭᠰᠠᠭᠠᠷ       ᠲᠠᠷᠢᠬᠢ ᠲᠤᠯᠤᠭᠠᠢ ᠨᠢ ᠮᠤᠩᠬᠠᠷᠠᠨ       ᠳᠡᠮᠡᠢ ᠪᠠᠯᠠᠢ ᠴᠠᠯᠴᠢᠭᠰᠠᠭᠠᠷ       ᠮᠤᠨᠳᠠᠭ ᠴᠤᠯᠠ ᠪᠠᠨ ᠰᠢᠪᠰᠢᠭᠯᠡᠬᠦ       ᠮᠠᠭᠤ ᠬᠡᠤᠬᠡᠳ ᠰᠤᠯᠢᠶᠠᠷᠠᠭᠰᠠᠭᠠᠷ       ᠮᠦᠬᠦᠭᠰᠡᠨ ᠶᠤᠰᠤ ᠪᠠᠨ ᠮᠠᠵᠣᠤᠯᠠᠬᠤ       ᠮᠦᠨᠦᠭ ᠬᠡᠤᠬᠡᠳ ᠱᠠᠯᠴᠢᠭᠢᠨᠠᠭᠰᠠᠭᠠᠷ       ᠰᠦᠪᠡᠭᠡ ᠳᠠᠷᠤᠨ ᠡᠵᠡᠷᠬᠡᠬᠦ       ᠰᠤᠯᠢᠭᠠᠢ ᠠᠪᠵᠠᠭ ᠨᠢ ᠬᠦᠳᠡᠯᠦᠭᠰᠡᠭᠡᠷ       ᠡᠳ᠋ᠯᠡᠬᠦ ᠶᠤᠰᠤᠲᠠᠢ ᠡᠷᠬᠡ ᠪᠠᠨ       ᠦᠪᠡᠷ ᠢᠶᠠᠨ ᠲᠠᠶᠠᠭᠳᠠᠬᠤ ᠬᠡᠴᠡᠭᠦᠳᠡᠭᠰᠡᠭᠡᠷ       ᠦᠷᠦᠭᠡᠯ ᠤᠨ ᠨᠦᠬᠦᠴᠡᠯ ᠳᠤ ᠰᠢᠯᠲᠠᠭᠯᠠᠨ       ᠦᠷ᠎ᠡ ᠬᠡᠤᠬᠡᠳ ᠢᠶᠠᠨ ᠲᠠᠮᠳᠤᠭᠯᠠᠭᠰᠠᠭᠠᠷ       ᠠᠭᠤᠤ ᠶᠡᠭᠡ ᠠᠯᠳᠠᠷ ᠢ ᠴᠢᠨᠢ       ᠠᠮᠠᠨ ᠲᠠᠪᠠ ᠪᠠᠷ ᠢᠶᠠᠨ ᠶᠠᠷᠢᠭᠰᠠᠭᠠᠷ       ᠠᠶᠢᠯ ᠤᠨ ᠬᠡᠤᠬᠡᠳ ᠬᠡᠯᠡᠬᠦ ᠦᠭᠡᠢ ᠠᠲᠠᠯ᠎ᠠ       ᠠᠰ ᠤᠨ ᠦᠷᠡᠳᠡᠰ ᠴᠨᠢ ᠨᠠᠭᠠᠳᠤᠭᠰᠠᠭᠠᠷ       ᠴᠢᠩᠭᠢᠰ ᠭᠡᠬᠦ ᠦᠭᠡ ᠶᠢ       ᠡᠳᠦᠷ ᠤᠨ ᠵᠠᠭᠤ ᠳᠠᠭᠤᠳᠠᠭᠰᠠᠭᠠᠷ       ᠴᠢᠨᠤ ᠤᠯᠠᠨ ᠬᠡᠤᠬᠡᠳ ᠴᠢᠨᠢ       ᠡᠯᠳᠡᠪ ᠬᠤᠶᠠᠷ ᠢᠶᠠᠷ ᠲᠦᠢᠳᠦᠭᠰᠡᠭᠡᠷ       ᠠᠩᠬᠠᠨ ᠠᠴᠠ ᠴᠡᠭᠡᠷ ᠲᠠᠢ ᠤᠴᠢᠷ ᠢ       ᠠᠮᠠᠨ ᠲᠠᠪᠠ ᠪᠠᠷ ᠴᠠᠯᠴᠢᠭᠰᠠᠭᠠᠷ       ᠠᠷᠢᠬᠢ ᠲᠠᠮᠠᠬᠢᠨ ᠳᠤ ᠬᠦᠷᠲᠡᠯ᠎ᠡ       ᠠᠳᠠᠭ ᠪᠠᠯᠠᠢ ᠤᠩᠭᠢᠷᠠᠭᠰᠠᠭᠠᠷ       ᠠᠮᠠᠭᠠᠢ ᠵᠢᠯᠤᠭᠤ ᠦᠭᠡᠢ ᠰᠤᠯᠢᠶᠠᠷᠠᠨ       ᠠᠳᠠᠭ ᠮᠠᠭᠤ ᠴᠢᠨᠠᠷ ᠨᠢ ᠢᠯᠡᠷᠡᠭᠰᠡᠭᠡᠷ       ᠡᠨᠡ ᠤᠯᠠᠨ ᠮᠠᠭᠤ ᠤᠴᠢᠷ ᠢ        ᠡᠪᠦᠭᠡ ᠪᠤᠭᠳᠠ ᠳᠤ ᠦᠴᠢᠮᠦ       ᠡᠷᠭᠢᠭᠦ ᠪᠤᠯᠤᠭᠰᠠᠨ ᠬᠡᠤᠬᠡᠳ ᠢ       ᠡᠷᠲᠡᠬᠡᠨ ᠵᠠᠯᠬᠠᠭᠠᠵᠤ ᠰᠤᠷᠭᠠᠮᠤ       ᠠᠭᠤᠤ ᠶᠡᠭᠡ ᠴᠠᠭ ᠦᠶ᠎ᠡ ᠳᠤ       ᠠᠮᠤᠷ ᠲᠠᠶᠢᠪᠤᠭᠤᠨ ᠠᠮᠢᠳᠤᠷᠠᠶ᠎ᠠ       ᠠᠯᠲᠠᠨ ᠲᠦᠷᠦ ᠶᠢᠨ ᠬᠡᠰᠢᠭ ᠢᠶᠠᠷ       ᠠᠵᠠ ᠬᠡᠢ ᠮᠤᠷᠢ ᠲᠠᠢ ᠶᠠᠪᠤᠶ᠎ᠠ       ᠮᠢᠩᠭᠠᠨ ᠵᠢᠯ ᠤᠨ ᠬᠡᠯᠡ ᠪᠠᠨ       ᠮᠠᠷᠲᠠᠰᠢ ᠦᠭᠡᠢ ᠦᠪᠯᠡᠶ᠎ᠡ       ᠮᠠᠷᠭᠠᠰᠢ ᠶᠢᠨ ᠨᠠᠷᠠ ᠶᠢ ᠤᠭᠲᠤᠨ       ᠮᠠᠨᠳᠤᠯ ᠬᠦᠭᠵᠢᠯ ᠢ ᠬᠤᠷᠤᠶᠢᠯᠠᠶ᠎ᠠ       ᠠᠭᠤᠤ ᠶᠡᠭᠡ ᠳᠡᠭᠡᠳᠦᠰ ᠮᠢᠨᠢ       ᠠᠪᠤᠷᠠᠯ ᠰᠤᠶᠤᠷᠬᠠᠯ ᠢᠪᠡᠭᠡᠲᠦᠭᠡᠢ       ᠵᠦᠭ ᠵᠦᠭ ᠲᠤ ᠪᠠᠨ ᠰᠡᠭᠴᠢᠬᠦ       ᠵᠦᠷᠢᠭᠦᠦ ᠪᠡᠷᠳᠡᠭᠴᠢᠳ ᠢ ᠬᠤᠷᠢᠶᠠᠰᠤᠭᠠᠢ       ᠤᠷᠢᠳᠦ ᠶᠢᠨ ᠮᠠᠨᠠᠭᠰᠠᠨ ᠪᠤᠲᠠᠷᠠᠯ ᠤᠨ ᠭᠠᠯ ᠢ       ᠤᠳᠤ ᠦᠷᠪᠢᠰᠬᠦ ᠶᠢ ᠳᠠᠷᠤᠰᠤᠭᠠᠢ       ᠵᠤᠭᠤᠰ ᠮᠦᠩᠭᠦ ᠪᠠᠷ ᠰᠢᠭᠰᠢᠳᠡᠭ       ᠵᠤᠪᠠᠯᠠᠩ ᠤᠨ ᠦᠨᠳᠦᠰᠦ ᠶᠢ ᠲᠠᠰᠤᠯᠰᠤᠭᠠᠢ       ᠵᠤᠷᠢᠭ ᠪᠤᠰᠤᠭ᠎ᠠ ᠬᠦᠮᠦᠰ ᠲᠤ       ᠵᠤᠯᠠ ᠬᠦᠴᠦᠨ ᠢ ᠢᠪᠡᠭᠡᠰᠦᠭᠡᠢ       ᠮᠦᠩᠬᠡ ᠲᠡᠭᠷᠢ ᠶᠢᠨ ᠬᠦᠴᠦᠨ       ᠮᠠᠨᠤᠰ ᠢ ᠢᠪᠡᠭᠡᠬᠦ ᠪᠤᠯᠲᠤᠭᠠᠢ       ᠡᠭᠡᠯ ᠮᠢᠨᠤ ᠦᠴᠢᠭᠰᠡᠨ ᠢ       ᠡᠨᠡᠷᠢᠲᠦᠭᠡᠢ᠂ ᠦᠷᠦᠰᠢᠶᠡᠲᠦᠭᠡᠢ︕
  
ᠢᠷᠡᠯᠲᠡ᠄ ᠠᠷᠠᠳ ᠤᠨ ᠰᠥᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠨᠠᠮ ᠤᠨ ᠲᠥᠷᠥᠭᠰᠡᠨ ᠡᠳᠦᠷ ᠲᠤ ᠪᠢᠴᠢᠭᠰᠡᠨ ᠨᠢᠭᠡ ᠬᠤᠪᠢ ᠵᠠᠬᠢᠳᠠᠯ
ᠨᠤᠲᠤᠭ ᠤᠨ ᠤᠷᠮᠠᠰ
ᠰᠡᠳᠬᠢᠯ ᠤᠨ ᠵᠠᠢ
ᠰᠢᠪᠡᠷ ᠪᠢᠴᠢᠭ ᠤᠨ ᠰᠢᠷᠡᠭᠡ
ᠡᠬᠡ ᠪᠠᠶᠢᠭᠠᠯᠢ ᠶᠢᠨ ᠭᠤᠶᠤᠮᠰᠤᠭ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号